بھارت میں حیدرآباد کے ایل بی نگر اسٹیشن کی حدود میں پیش آنے والے افسوسناک واقعے کے مجرم کو عدالت نے عمر قید کی سزا سنادی۔
بھارتی میڈیا رپورٹس کے مطابق ملزم نے ایل بی نگر پولس اسٹیشن کی حدود میں ایک آٹھ سالہ نابالغ بچی کو اغوا کرکے جنسی زیادتی کا نشانہ بنایا تھا۔
رپورٹس کے مطابق ملزم شیخ جاوید ولد شیخ امام، عمر 27 سال، پیشہ: آٹو ڈرائیور کو POCSO ایکٹ کے تحت عمر قید کی سزا سنائی گئی۔ اس کے علاوہ 25 ہزار روپے جرمانہ بھی ادا کرنے کا حکم دیا گیا۔
اس سے قبل رواں ماہ بھارت میں پیش آنے والے ایک واقعے میں ملزم نے جنسی زیادتی کی کوشش پر مزاحمت کرنے پر حاملہ خاتون کو چلتی ٹرین سے دھکا دے دیا۔
انڈین میڈیا کی رپورٹ کے مطابق ضلع کوئمبٹور میں حاملہ خاتون کو چلتی ٹرین سے دھکا دیا گیا جس سے وہ شدید زخمی ہوگئیں۔ افسوسناک واقعہ صبح تقریباً 10:30 بجے پیش آیا جب ریوتی نامی خاتون ٹرین میں تروپور سے آندھرا پردیش کے شہر چتور جانے کیلیے سوار ہوئیں۔
ریوتی صبح 6:40 بجے کے قریب ٹکٹ کے بغیر ٹرین میں سوار ہوئی تھیں۔ حکام نے بتایا کہ اس وقت کم از کم 7 دیگر خواتین بھی ڈبے میں موجود تھیں۔ ٹرین جب 10:15 کے قریب جولارپیٹائی ریلوے اسٹیشن پر پہنچی تو تمام خواتین اتر گئیں۔
جولارپیٹائی ریلوے اسٹیشن سے ملزم ہیمراج اس میں سوار ہوا۔ وہ کچھ دیر بیٹھا رہا اور جب اس نے ریوتی کو اکیلے دیکھا تو جنسی زیادتی کی کوشش کی۔
جب خاتون نے مزاحمت کرتے ہوئے اسے لات مار کر دور کیا تو وہ غصے آگ بگولہ ہوگیا اور اس نے چلتی ٹرین سے اسے باہر پھیک دیا۔
خاتون کے ہاتھوں، ٹانگوں اور سر پر چوٹیں آئیں اور اسپتال میں زیرِ علاج ہیں۔ پولیس نے خاتون کے بیان کی بنیاد پر مقدمہ درج کر کے ملزم کو گرفتار کیا۔
