کراچی: شہر قائد میں پیر کے روز اغوا ہونے والی 3 کم عمر لڑکیاں گلشن اقبال سے بازیاب ہو گئیں۔
تفصیلات کے مطابق پیر کے روز کراچی کے علاقے تھانہ سولجر بازار کی حدود سے تین کم عمر لڑکیاں مبینہ طور پر اغوا ہوئی تھیں، پولیس نے گزشتہ رات تینوں کو گلشن اقبال سے بازیاب کرا لیا۔
مبینہ طور پر اغوا ہونے اور اب بازیاب ہونے والی بچیوں میں 12 سالہ نور، 14 سالہ عائشہ، اور 13 سالہ ماہین شامل ہیں۔
پولیس حکام کا کہنا ہے کہ لڑکیوں کی گمشدگی پر تھانہ سولجر بازار میں ورغلا کر اغوا کی دفعات کے تحت مقدمہ درج کیا گیا تھا، تینوں بچیاں آدم اسکوائر سولجر بازار نمبر 2 کے قریب سے اغوا ہوئیں، بچیوں کے مبینہ اغوا کا واقعہ پیر کی شام 5 بجے کے قریب پیش آیا تھا۔
پولیس حکام کے مطابق بچیاں بظاہر خود گھر سے گئی تھیں، ان کے پاس موبائل فون بھی تھا، جس کی لوکیشن ٹریس کر کے انھیں بازیاب کرایا گیا۔
