Tag: اغوا کی وارداتیں

کراچی: شہر قائد میں پولیس نے اہم کارروائی کرتے ہوئے بچوں کےاغوامیں ملوث ملزم گرفتارکرلیا، کارروائی کے دوران ایک بچہ بھی بازیاب کرایا گیا ہے۔

تفصیلات کے مطابق ایس ایس پی ملیر عرفان بہادر نے میڈیا سے گفتگو کرتےہوئے بتایا کہ پولیس نے اطلاع پرکامیاب چھاپہ مار کارروائی کرتے ہوئے نا صرف ملزم کو حراست میں لیا ہے، بلکہ اس کی قید سے ایک سات سالہ بچہ بھی آزاد کرایا گیا ہے۔

ان کا کہنا تھا کہ گرفتار کیے گئے ملزم کا نام مراد ہے اور اس نے دورانِ تفتیش سنسنی خیز انکشافات کیے ہیں، ملزم اغوا شدہ بچوں کومحض10یا15ہزارکےعوض آگے فروخت کردیا کرتا تھا۔

دورانِ تفتیش ملزم نے بتایا کہ وہ بچوں کو اغوا کرکے آگے سہیل اور کامران نامی دو دیگر ملزمان کے حوالے کیا کرتا تھا ، ملزم نے اپنے بیان میں اس لرزہ خیز حقیقت سے بھی پردہ اٹھایا کہ یہ دونوں ملزمان ان بچوں کے ساتھ بدفعلی کرتےتھے۔

پولیس نے کارروائی کے دوران ملزم کے قبضے سے غیر قانونی پستول بھی برآمد کی ہے اور مقدمہ درج کرکے تفتیش کا آغاز کردیا ہے۔ دریں اثنا ء مقدمے میں ملوث سہیل اور کامران کی گرفتاری کے لیے بھی چھاپے مارے جارہے ہیں۔

یاد رہے کہ پاکستان میں آئے دن بچوں کے اغوا کے واقعات پیش آتے رہتے ہیں، رواں برس قصور کی زینب نام کی سات سالہ بچی اغوا کی گئی اور اس کی لاش کچرے کے ڈھیر پرپائی گئی۔ معاملہ سوشل میڈیا پر شہرت پا گیا اور ملک کے طول و عرض سے غم وغصے کا اظہار کیا گیا جس کے بعد قانون حرکت میں آیا اور ملزم کو گرفتار کرکے پاکستان کی تاریخ کا تیز ترین ٹرائل کرکے ملزم کو سزائے موت سنائی گئی او رتختہ دار کے حوالے کیا گیا۔

یاد رہے کہ چند ماہ قبل ایڈیشنل آئی جی کراچی امیر شیخ نے کہا تھا کہ رواں سال کراچی میں بچوں کے اغوا کے صرف آٹھ واقعات درج ہوئے جن میں تمام بچے بازیاب کرائے گئے تھے۔