امریکی شہر لاس اینجلس میں پولیس نے ایک اغوا کار خاتون کی سی سی ٹی وی فوٹیجز جاری کرتے ہوئے عوام سے اس کی شناخت میں مدد کی اپیل کی ہے۔
مقامی میڈیا کے مطابق لاس اینجلس پولیس نے ایک اغوا کار خاتون کی 2 سی سی ٹی وی فوٹیجز جاری کی ہیں جن میں وہ بچے اغوا کرنے کی ناکام کوشش کرتی دکھائی دے رہی ہے۔
دونوں ویڈیوز 18 اکتوبر کی ہیں، پہلی ویڈیو ایک مقامی ریستوران کی ہے جہاں ملزمہ گاڑی کے قریب کھڑی بچے کو گود میں اٹھائے ایک عورت کے پاس جاتی ہے، اور اس سے مطالبہ کرتی ہے بچہ اس کے حوالے کردو۔
ملزمہ کہتی ہے کہ مذکورہ 1 سالہ بچہ اس کا بھائی ہے جو اس کے حوالے کردیا جائے، بچے کو گود میں اٹھائے عورت وہاں سے دور ہٹتی ہے تو ملزمہ پیچھے سے بچے کو چھیننے کی کوشش بھی کرتی ہے۔
اسی دوران ایک راہگیر قریب آکر ملزمہ کو وہاں سے دور بھگانے کی کوشش کرتا ہے جس کے بعد وہ وہاں سے چلی جاتی ہے۔
بعد ازاں اسی روز وہ ایک رہائشی علاقے سے گزرتے ہوئے ایک گھر کے قریب رکتی ہے، گھر کے بیرونی حصے میں کئی بچے کھیل رہے ہیں، ملزمہ ان میں سے ایک 5 سالہ بچے کو اٹھا کر فرار ہونے کی کوشش کرتی ہے تاہم گھر والوں کی بروقت کارروائی سے اپنے مقصد میں ناکام رہتی ہے۔
واقعے کے بعد اغوا کار خاتون فرار ہوگئی اور تاحال پولیس اسے پکڑنے میں ناکام ہے، پولیس نے ملزمہ کی فوٹیجز جاری کر کے عوام سے اس کی شناخت میں مدد کی اپیل کی ہے۔
