Tag: افسران

کراچی: وزیر بلدیات سندھ ناصر حسین شاہ کا کہنا ہے کہ گندگی والےعلاقوں کے افسران کے خلاف کارروائی کی جائےگی۔

تفصیلات کے مطابق صوبائی وزیر بلدیات ناصر حسین شاہ نے میونسپل کمشنرز اور ضلعی انتظامیہ کو ہدایات دیتے ہوئے کہا کہ صوبے میں صفائی ستھرائی کے بہترین انتظامات کیے جائیں۔

ناصر حسین شاہ کا کہنا تھا کہ ہر شاہراہ،گلی، محلے کو گندگی سے پاک کر دیا جائے،کسی بھی مقام پر کچرے کے ڈھیر نظر نہیں آنے چاہئیں، میونسپل کمشنرز اپنی نگرانی میں صفائی کی سرگرمیوں کا معائنہ کریں۔

وزیر بلدیات سندھ نے کہا کہ کسی بھی وقت سرپرائز وزٹ کر کے صورت حال کا جائزہ لوں گا، ہر یونین کونسل کو صاف ستھرا نظر آنا چاہیے۔

ناصر حسین شاہ کا مزید کہنا تھا کہ گندگی والے علاقوں کے افسران کے خلاف کارروائی کی جائےگی۔

نالوں پر تجاوزات ہیں جن کی وجہ سے صفائی میں بھی مسئلہ آتا ہے، ناصر حسین شاہ

یاد رہے گزشتہ دنوں وزیر بلدیات سندھ ناصر حسین شاہ کا کہنا تھا کہ نالوں پر تجاوزات ہیں جن کی وجہ سےصفائی میں بھی مسئلہ آتا ہے،کئی بار صفائی شروع کی مختلف رکاٹوں کی وجہ سے تاخیر ہوئی،2 لاکھ ٹن سے زیادہ نالوں سے نکلا کچرا لینڈ فل سائٹ منتقل کیا گیا۔

کراچی: محکمہ خوراک سندھ کا کہنا ہے کہ افسران کی غلطی سے آٹے کی قیمتوں میں اضافہ برداشت نہیں کیا جاسکتا۔

تفصیلات کے مطابق محکمہ خوراک سندھ نے افسران کوگندم ریلیز کے لیے رشوت لینے پر نوٹس لے لیا جس میں کہا گیا ہے کہ گندم میں رکاوٹ ،رشوت طلب کرنے والوں کے خلاف کارروائی ہوگی۔محکمہ خوراک نے مختلف شہروں میں چیک پوسٹیں ختم کرنے کے احکامات بھی دے دیے۔

محکمہ خوراک سندھ کا کہنا تھا کہ کراچی کی فلور ملز کوگندم کی بلاتعطل فراہمی یقینی بنائی جائے،گندم ترسیل میں رکاوٹ ڈالنے پر افسران کے خلاف کارروائی ہوگی۔

محکمہ خوراک سندھ کا مزید کہنا تھا کہ فوڈ کنٹرولرز شہید بینظیرآباد،مٹیاری،جامشورو ہدایت پر عمل نہیں کر رہے،افسران کی غلطی سے آٹےکی قیمتوں میں اضافہ برداشت نہیں کیا جاسکتا۔

سندھ حکومت کا 7ارب کی گندم چوری کیس نیب کو بھیجنے کا فیصلہ

یاد رہے کہ رواں ہفتے 4 مئی کو کراچی میں چیف سیکریٹری سندھ کی زیر صدارت اجلاس ہوا تھا جس میں محکمہ خوراک،اینٹی کرپشن کے افسران نے شرکت کی تھی۔اجلاس میں 7 ارب کی گندم چوری کیس نیب کو بھیجنے کا فیصلہ کیا گیا تھا۔

کراچی: وزیراعلیٰ سندھ مراد علی شاہ نے سندھ بلڈنگ کنٹرول اتھارٹی کے 28 افسران کوگرفتار کرنے کا حکم دے دیا۔

تفصیلات کے وزیراعلیٰ سندھ مراد علی شاہ نے تبادلوں پر ایس بی سی اے افسران کی جانب سے آفس پر دھاوا بولنے والے 28 افسران کو گرفتار کرنے کا حکم دے دیا۔

وزیراعلیٰ سندھ نے آئی جی سندھ مشتاق مہر کو حکم دیا کہ افسران کو گرفتار کر کے مقدمہ درج کیا جائے، گرفتاریاں کر کے مجھے فوری طور پر اطلاع دے یں۔

مراد علی شاہ نے وزیربلدیات کو ہدایت کی کہ فوری ایس بی سی اے میں اپنا دفتر قائم کریں، ہم کسی کوغنڈہ گردی کی اجازت نہیں دے سکتے۔

سپریم کورٹ آف پاکسان کے حکم پر عمل کرتے ہوئے حکومت سندھ نے ایک حکم نامے کے ذریعے سندھ بلڈنگ کنٹرول اتھارٹی کے 28 افسران کو بدعنوانی کے الزام میں معطل کیا تھا۔

حکومت کی جانب سے معطل کیے جانے والے افسران نے گزشتہ روز ایڈیشنل ڈائریکٹر جنرل کے دفتر میں دھاوا بولا تھا۔ بعدازاں ایس بی سی اے انتظامیہ نے پولیس طلب جس کے بعد پولیس کی بھاری نفری نے بلڈنگ کنٹرول اتھارٹی کو گھیرے میں لے لیا جس پر احتجاج کرنے والے افراد موقع سے غائب ہوگئے تھے۔

کراچی: بے نظیرانکم سپورٹ پروگرام سے فائدہ اٹھانے والے افسران کو ایف آئی اے نے نوٹس جاری کرنا شروع کر دیے۔

تفصیلات کے مطابق بے نظیرانکم سپورٹ پروگرام سے فائدہ اٹھانے والے تمام افسران کو ایف آئی اے نے طلبی کے نوٹس جاری کر دیے۔ افسران کو ایف آئی اے کارپوریٹ کرائم سرکل طلب کیا جا رہا ہے۔

افسران کو ایف آئی اے کارپوریٹ کرائم سرکل طلب کیا جا رہا ہے۔ تمام افسران کوبی آئی ایس پی کی سلپ،دیگر دستاویز لانے کی ہدایت کر دی گئی ہے۔

یاد رہے کہ گزشتہ ماہ بے نظیر انکم سپورٹ پروگرام سے فائدہ اٹھانے والوں میں اعلیٰ سرکاری افسران کے شامل ہونے کا انکشاف ہوا تھا، رپورٹ کے مطابق گریڈ 17 سے 21 کے 2 ہزار 543 سرکاری افسران میں سے متعدد نے بیویوں کے نام پر پیسے وصول کیے، بلوچستان میں سب سے زیادہ سرکاری افسران پروگرام سے مستفید ہوئے۔

سندھ میں گریڈ 18 کے 342 افسران نے پروگرام سے فائدہ اٹھایا جبکہ سندھ سے گریڈ 21 کے 3 افسران بھی شامل تھے۔

ینظیرانکم سپورٹ پروگرام سے رقم بٹورنے والے چار افسران برطرف

بعدازاں بے نظیر انکم سپورٹ پروگرام سے رقم بٹورنے والے چارافسران کو برطرف کر کے افسران سے 4 لاکھ 40 ہزار روپے بھی وصول کر لیے گئے ہیں۔

اسلام آباد: وزیراعظم عمران خان کا کہنا ہے کہ نیب آرڈینس میں ترمیم مشکل فیصلہ تھا، نیب ترمیمی آرڈیننس کا تفصیلی جائزہ لیے بغیر واویلا مچایا گیا۔

تفصیلات کے مطابق وفاقی دارالحکومت اسلام آباد میں وزیراعظم عمران خان نے سول سرونٹس سے خطاب کرتے ہوئے کہا کہ نیب آرڈینس میں ترمیم مشکل فیصلہ تھا، نیب ترمیمی آرڈیننس کا تفصیلی جائزہ لیے بغیر واویلا مچایا گیا۔

انہوں نے کہا کہ ملک اس وقت قرضوں کے بوجھ تلے دبا ہوا ہے، ملک کو قرضوں سے نکالنے کے لیے اقدامات کر رہے ہیں، معیشت کے استحکام کے لیے کوششیں کر رہے ہیں، معاشی استحکام کے لیے گورننس کے نظام کو بہتر کرنا ہوگا۔

وزیراعظم نے کہا کہ 2008 کے بعد ملک پر24 ہزار ارب کے قرض کا بوجھ پڑا، پاکستان 2018 تک 30 ٹریلین قرضوں کے بوجھ تلے دبا تھا۔ انہوں نے کہا کہ ملک میں پیسہ اس وقت آئے گا جب صنعتیں چلیں گی۔

وزیراعظم پاکستان نے کہا کہ دیکھا افسر شاہی کو نیب کے معاملے پر کئی جائز شکایات تھیں، نیب کے خوف سے ترقیاتی منصوبوں میں بیوروکریسی کا کردارمحدود ہوگیا تھا، بیوروکریسی کو ضابطے کی غلطیوں پرنیب شکنجے سے بچانا مقصود تھا۔

انہوں نے کہا کہ جمع کیا گیا ٹیکس قرضوں کی قسط کی صورت میں چلا گیا، ملکی آمدن کا آدھاحصہ قرضوں کے سود کی صورت میں چلا جاتا ہے، حکومت نے معاشی استحکام کے لیے اصلاحات کیں، ٹیکس کیسزایف بی آر کے ہیں نیب کاعمل دخل نہیں بنتا۔

وزیراعظم عمران خان نے کہا کہ جمہوریت میں سیاسی مشاورت اور اتفاق رائے سے چلنا ہوتا ہے، جمہوریت میں پارٹی میں بھی اتفاق رائے پیدا کرنا ہوتا ہے۔

کراچی : وزیر اطلاعات سندھ سعید غنی نے کہا ہے کہ آئی جی سمیت تمام افسران کو اپنے دائرے میں رہ کر کام کرنا چاہیے، کوئی کسی کے اختیارات استعمال نہیں کرسکتا۔

تفصیلات کے مطابق صوبائی وزیر اطلاعات سعید غنی کا کہنا ہے کہ آئی جی سندھ کے پاس قانونی طور پر پوسٹنگ کا اختیار ہوتا ہے، آئی جی صاحب نے خادم حسین رند کو بری کیٹیگری میں کیوں رکھا؟۔

وزیراطلاعات سندھ نے کہا کہ آئی جی سمیت تمام افسران کو اپنے دائرے میں رہ کر کام کرنا چاہیے، کوئی کسی کے اختیارات استعمال نہیں کرسکتا، کسی کا اختیار چھیننا نہیں چاہتے، حکومت میں ہیں، بادشاہت نہیں کی۔

سندھ پولیس اور صوبائی حکومت کے درمیان اختیارات کا تنازع

یاد رہے کہ گزشتہ ہفتے آئی جی سندھ کلیم امام نے افسران کو صوبہ بدر کرنے پر چیف سیکریٹری کو خط لکھا تھا جس میں انہوں نے کہا تھا کہ خادم حسین رند سندھ پولیس کے اہم معاملات دیکھ رہے تھے، رضوان احمد شکار پور میں ڈاکوؤں کے خلاف اہم کردار ادا کر رہے تھے۔

آئی جی سندھ نے خط میں کہا تھا کہ اچانک افسران کےغیرمتوقع تبادلے نےغیر یقینی صورت حال پیدا کی، ان فیصلوں نے پولیس کے مورال اور آئی جی کی کمانڈ کو کمزور کیا۔

کراچی: آئی جی سندھ کلیم امام نے افسران کو صوبہ بدر کرنے پر سخت رد عمل کا اظہار کرتے ہوئے کہا کہ ان فیصلوں نے پولیس کے مورال اور آئی جی کی کمانڈ کو کمزور کیا۔

تفصیلات کے مطابق آئی جی سندھ کلیم امام نے افسران کو صوبہ بدر کرنے پر چیف سیکریٹری کو خط لکھا ہے جس میں انہوں نے کہا کہ خادم حسین رند سندھ پولیس کے اہم معاملات دیکھ رہے تھے، رضوان احمد شکار پور میں ڈاکوؤں کے خلاف اہم کردار ادا کر رہے تھے۔

آئی جی سندھ نے خط میں کہا کہ اچانک افسران کےغیرمتوقع تبادلے نےغیر یقینی صورت حال پیدا کی، ان فیصلوں نے پولیس کے مورال اور آئی جی کی کمانڈ کو کمزور کیا۔

انہوں نے کہا کہ میں فورس کا سربراہ ہوں اور مجھے یہ فیصلے میڈیا سے پتہ چلے، بدقسمتی سے یہ جب ہوا تو افسران سنجیدگی، دیانت داری سے کام کر رہے تھے۔

آئی جی سندھ نے خط میں سندھ ہائی کورٹ اور سپریم کورٹ کے احکامات سے بھی آگاہ کیا،عدالتی حکم کے مطابق آئی جی انفرادی طور پر تبادلے ،تقرری کا مجاز ہے۔ انہوں نے کہا کہ 2019 پولیس ایکٹ کے تحت بھی آئی جی تقرری، تبادلوں کا اختیار رکھتا ہے، درخواست ہے پولیس کو اپنا کردار بہتر انداز میں ادا کرنے دیا جائے۔

اسلام آباد: وزیراعظم عمران خان کا کہنا ہے کہ نئی سوچ اور بہتر طرز حکومت کی ضرورت ہے، افسران ذمہ داریاں جہاد اور قومی فریضہ سمجھ کر ادا کریں۔

تفصیلات کے مطابق وزیراعظم عمران خان سے ترقی پانے والے والے وفاقی سیکرٹریز نے ملاقات کی۔ ملاقات کے دوران وزیراعظم نے ترقی پانے والے افسران کو مبارکباد دی۔

وزیراعظم عمران خان نے کہا کہ افسران کی ترقی کارکردگی اورمیرٹ کو مدنظر رکھ کر کی گئی، امید ہے افسران فرض شناسی سے ملک وقوم کی خدمت کریں گے، پاکستان تاریخ کے اہم دوراہے پرکھڑا ہے، ملک کی تعمیروترقی کو بیوروکریسی نے بھی عملی جامہ پہنانا ہے۔

انہوں نے کہا کہ ہمارا ملک آج خطے میں دوسرے ممالک سے قدرے پیچھے رہ گیا، ملک پیچھے رہ جانے کی مختلف وجوہات ہیں، نئی سوچ اور بہتر طرز حکومت کی ضرورت ہے، آج سیاسی قیادت اور بیوروکریسی نے مستقبل کا تعین کرنا ہے۔

وزیراعظم سے ڈی جی ایف آئی اے واجد ضیاء کی ملاقات

وزیراعظم عمران خان نے کہا کہ اللہ نے پاکستان کو بے پناہ وسائل اور افرادی قوت سے نوازا ہے، افسران ذمہ داریاں جہاد اور قومی فریضہ سمجھ کر ادا کریں۔ انہوں نے کہا کہ بیوروکریسی طرز حکومت کے ضمن میں بھرپور کردار ادا کرے، بہتر طرزحکومت سے متعلق وفاقی بیوروکریسی مثال قائم کرے، سیکرٹریز اپنی توانائیاں اورتجربہ ملک وقوم کے لیے بروئےکار لائیں۔

وزیراعظم پاکستان نے کہا کہ موجودہ حکومت کی کوششوں کی وجہ سے آج معاشی استحکام ہے، سرمایہ کار وکاروباری برادری پالیسیوں پر اعتماد کا اظہار کر رہے ہیں، عالمی ادارے بھی معیشت میں بہتری کا اعتراف کر رہے ہیں۔