اداکار و کامیڈین افضل خان المعروف جان ریمبو نے انکشاف کیا ہے کہ والدین صاحبہ کو بہو بنانے سے گھبرا رہے تھے۔
حال ہی میں نجی ٹی وی کے مارننگ شو میں ریمبو اور صاحبہ نے شرکت کی جہاں انہوں نے نجی زندگی اور شوبز کیریئر سے متعلق اظہار خیال کیا۔
ریمبو نے بتایا کہ میرے والدین بہت سادہ لوگ تھے لہٰذا وہ بہو کے طور پر اداکارہ کو لانے سے گھبرا رہے تھے لیکن اہلیہ نے شاندار انداز میں ذمہ داریاں نبھا کر والدین کے بھی دل جیت لیے۔
پروگرام کے دوران انہوں نے یہ اعتراف بھی کیا کہ انہیں اچھا بنانے میں اہلیہ کا بھی ہاتھ ہے، ورنہ وہ بہت غلط فیصلے کرتے رہے ہیں۔
انہوں نے بتایا کہ صاحبہ سے شادی کرنے کے لیے انہیں اپنی ساس اور ماضی کی مقبول اداکارہ نشو کی 6 سال تک منتیں کرنی پڑیں، تب جا کر ساتویں سال ان کی شادی ہوئی۔
ریمبو نے صاحبہ کی والدہ اداکارہ نشو کی بھی تعریفیں کیں اور کہا کہ انہوں نے اتنی بڑی اداکارہ ہونے کے باوجود اپنی بیٹیوں کی اچھی تربیت کی، انہیں امور خانہ داری سکھائی۔
اداکار نے بتایا کہ مجھے یاد ہے کہ پہلی فلم کی شوٹنگ کے لیے پنڈی سے آیا تھا اور پروڈیوسر نے مجھے پک اینڈ ڈراپ دی اور ہوٹل میں قیام فراہم کیا تھا جب کہ صاحبہ اپنے منیجر، ڈرائیور اور چار افراد کی ٹیم کے ساتھ آئی تھیں، انہیں ایک شخص جوتے پہنا رہا تھا، میں ان کے طرز زندگی سے خوفزدہ تھا لیکن صاحبہ نے خود کو بہت بدل لیا ہے۔
دوسری جانب صاحبہ نے بتایا کہ ہماری محبت کی شادی تھی اور جب لوگوں کے درمیان محبت ہو تو ان معمولی سمجھوتوں سے کوئی فرق نہیں پڑتا۔
واضح رہے کہ صاحبہ اور جان ریمبو کی شادی 1997 میں ہوئی اور ان کے دو بیٹے احسن اور زین ہیں۔
