ماہ رمضان میں لوگ سحر و افطار میں طرح طرح کے پکوان بناتے ہیں لیکن اگر افطار دسترخوان میں چنے کی چاٹ نہ ہو تو اس کے بغیر افطاری ادھوری سی لگتی ہے۔
چاٹ اگر چنے کی ہو اور ساتھ آلو بھی ہوں تو پھر تو بات ہی الگ ہے تو آج پیش خدمت ہے آپ کے لئے چنا چاٹ آپ بھی خود اپنے گھر بنا سکتے ہیں۔
چنے نہ صرف ذائقے دار ہوتے ہیں بلکہ یہ صحت کے لیے بھی بہت مفید ہیں۔ چنے غذائیت سے بھرپور خوراک ہے جن میں وٹامن، فائبر اور پروٹین وافر مقدار میں پائے جاتے ہیں۔
امریکہ کے ہارورڈ میڈیکل اسکول کے ایک مضمون کے مطابق ایک کپ پکے ہوئے چنوں میں 14.5 گرام پلانٹ بیسڈ پروٹین پایا جاتا ہے۔
پلانٹ بیسڈ پروٹین ایسا پروٹین ہوتا ہے جو دالوں، سبزیوں، بیج اور خشک میوے جات سے حاصل کیا جاتا ہے۔
ایک کپ پکے ہوئے چنوں میں 12.5 گرام فائبر بھی پایا جاتا ہے جو نظامِ ہاضمہ کے لیے مددگار ثابت ہوتا ہے۔
ہارورڈ میڈیکل اسکول کے مضمون کے مطابق چنے آپ کا پیٹ دیر تک بھرا رکھتے ہیں جس سے آپ کو جلد بھوک محسوس نہیں ہوتی۔
پروٹین اور فائبر کے علاوہ چنوں میں بہت سے وٹامن اور منرلز بھی پائے جاتے ہیں۔ ان میں وافر مقدار میں مینگنیز پایا جاتا ہے جو دماغ کے لیے فائدے مند ہوتا ہے۔
چنوں میں وٹامن بی، کاپر، آئرن، زنک اور فاسفورس بھی پایا جاتا ہے۔اس کے علاوہ چنوں میں وٹامن اے، ای اور سی بھی موجود ہوتا ہے۔
آلو چنا چاٹ بنانے کی ترکیب
ایک پیالے میں کابلی چنے، آلو ، ہری مرچ، پیاز، لیموں کا رس، چینی، زیرہ، پسی لال مرچ، کٹی لال مرچ، چاٹ مصالحہ، نمک، ٹماٹر اور ہرا دھنیا ڈال کر اچھے سے مکس کریں۔
اب اس پر ہرا دھنیا، املی کی چٹنی اور پاپڑی ڈال کر سرو کریں۔اگر آپ چاہیں تو لیمو بھی ڈال سکتے ہیں۔
