کراچی : شہر قائد میں شہریوں سے چھینے گئے موبائل فونز تواتر کے ساتھ افغانستان اسمگل ہونے لگے، پولیس کے ہاتھوں گرفتار ملزم نے بتایا کہ کس سے موبائل فون خرید کر کیسے افغانستان بھیجتا تھا۔
تفصیلات کے مطابق کراچی کے شہریوں سے چھینے گئے موبائل جرائم پیشہ گروہوں سے خریدنے والا ملزم گلشن پولیس کے ہاتھوں پکڑا گیا، یہ موبائل فونز افغانستان اسمگل کرنے میں ملوث ایک گروہ کا سرگرم رکن تھا۔
ایس پی گلشن نے بتایا کہ گرفتار ملزم چھینے گئے موبائل فون کے آئی ایم ای آئی تبدیل کرکے فروخت کردیتا تھا اور جن کے آئی ایم ای آئی تبدیل نہیں ہوسکتے تھے ان کو افغانستان اسمگل کردیتا تھا۔
حکام کا کہنا تھا کہ گرفتار ملزم وسیم برفت کے مطابق وہ اب تک موبائل اسنیچرز سے خریدے ہوئے 100 موبائل فون افغانستان بھجواچکا ہے، جس کے بعد کراچی میں غیرقانونی مقیم غیرملکیوں کے خلاف ہی نہیں بلکہ ایسے جرائم پیشہ عناصر کے خلاف بھی بھرپور کریک ڈاون کی ضرورت ہے۔
ایس ایس نے مزید بتایا کہ ملزم کے ایک ساتھی کو ایک ہفتہ قبل نیو کراچی کی ایک موبائل مارکیٹ سے گرفتار کیا گیا تھا جو موبائل فونز کے آئی ایم ای آئی نمبر تبدیل کرتا تھا۔
یاد رہے رواں سال جولائی میں شہر قائد میں اسٹریٹ کرائم کی وارداتوں میں ملوث گرفتار ملزمان نے چھینے ہوئے موبائل فون آن لائن فروخت کرنے کا انکشاف کیا تھا ،
گذشتہ سال اکتوبر میں بھی کراچی کے شہریوں سے چھینے گئے قیمتی موبائل فونز کو افغانستان اسمگل کرنے کا انکشاف ہوا تھا، شہر سے چھینے گئے موبائل فون مختلف گروپ خرید لیتے ہیں اور پھر انہیں افغانستان اسمگل کر دیتے ہیں۔
