ماسکو : افغان طالبان کے سیاسی امور کے نگران ملا برادر اخوند نے کہا ہے کہ افغانستان میں قیامِ امن سے متعلق کسی بھی معاہدے پر اتفاق کیلئے بین الاقوامی افواج کا انخلاء انتہائی ضروری ہے۔
یہ بات انہوں نے ماسکو میں روس افغانستان سفارتی تعلقات میں استحکام کے حوالے سے منعقدہ تقریب میں گفتگو کرتے ہوئے کہی، تفصیلات کے مطابق افغانستان کے اہم سیاستدانوں اور طالبان کے اعلیٰ سطح مذاکرات میں شرکت کیلئے افغان طالبان کا چودہ رکنی وفد ماسکو پہنچ گیا، سیاسی امور کے نگران ملا برادر اخوند کی زیر قیادت وفد کا ایئر پورٹ پر استقبال کیا گیا۔
وفد نے گزشتہ روز ماسکو میں روس افغانستان سفارتی تعلقات میں استحکام کے حوالے سے منعقدہ تقریب میں بھی شرکت کی۔ طالبان ترجمان ذبیح اللہ مجاہد کے مطابق تقریب میں ماسکو میں تعینات افغان سفیر نے بھی شرکت کی۔
اس حوالے سے غیر ملکی خبررساں ادارے کا کہنا ہے کہ طالبان رہنما نے افغانستان میں قیامِ امن سے متعلق کسی بھی معاہدے پر اتفاق کیلئے بین الاقوامی افواج کا انخلاء ضروری قرار دیا ہے۔
افغان طالبان کا کہنا تھا کہ ہم ملک میں امن چاہتے ہیں لیکن اس کی جانب پیش قدمی سے قبل امن کی راہ میں حائل رکاوٹوں کو دور کرنا ہوگا۔
اس موقع پر روس کے وزیر خارجہ سرگئی لاروف نے کہا کہ افغانستان میں امن کے لیے غیر ملکی افواج کا انخلاء بہت ضروری ہے، قیام امن کے لیے سب فریقین کو مل جل کر فیصلہ کرنا چاہیے۔
