Tag: افغانستان کی خبریں

بغلان: افغانستان کے شمالی صوبے بغلان کے شہر پل خمری میں طالبان نے پولیس ہیڈ کوارٹر پر بارود سے بھری گاڑی کے ساتھ حملہ کیا، جس میں 13 سیکورٹی اہل کار ہلاک ہو گئے۔

تفصیلات کے مطابق طالبان نے افغان صوبے بغلان کی پولیس کے ہیڈ کوارٹر پر تباہ کن خود کش حملہ کرتے ہوئے تیرہ سیکورٹی اہل کار مار دیے، حملے میں 50 سیکورٹی اہل کار بھی زخمی ہوئے۔

زخمیوں کے بارے میں بتایا جا رہا ہے کہ ان میں سے متعدد کی حالت تشویش ناک ہے جس سے ہلاکتوں میں اضافے کا خدشہ ہے، زخمیوں میں عام لوگ بھی شامل ہیں۔

غیر ملکی میڈیا کے مطابق طالبان نے حملے کا آغاز پولیس عمارت کے گیٹ پر بارود سے بھری گاڑی اڑانے سے کیا، جس کے بعد طالبان نے پولیس اہل کاروں پر فائرنگ کھول دی۔

خود کش حملے کے بعد افغان پولیس نے جوابی کارروائی میں تمام حملہ آوروں کو ہلاک کر دیا، طالبان نے حملے کی ذمہ داری قبول کر لی ہے۔

یہ بھی پڑھیں:  افغانستان میں قیام امن کیلئے کوشش جاری رہے گی، وزیراعظم عمران خان

میڈیا رپورٹس کے مطابق پولیس ہیڈ کوارٹر پر حملہ کرنے والے طالبان کی تعداد خود کش حملہ آور سمیت 9 تھی، جنھوں نے چھ گھنٹوں تک پولیس کے ساتھ مقابلہ کیا۔

افغان حکام کا کہنا تھا کہ پولیس کمپلیکس پر حملہ کرنے والے 8 افراد پولیس کی جوابی کارروائی کے دوران مارے گئے۔

خیال رہے کہ یہ حملہ ایسے وقت میں کیا گیا ہے جب افغانستان میں کل سے رمضان کا آغاز ہو رہا ہے، تین دن قبل لویہ جرگہ کے اجلاس میں طالبان کے ساتھ جنگ بندی کی قرارداد بھی منظور کی گئی ہے۔

افغان صدر اشرف غنی بھی دو روز قبل رمضان کے مہینے میں طالبان کو جنگ بندی کی پیش کش کر چکے ہیں۔

کابل: افغانستان میں حالیہ بارشوں اور سیلاب سے بڑے پیمانے پر تباہی مچ گئی ہے، بارشوں اور سیلاب سے 250 افراد جاں بحق جب کہ 300 سے زائد زخمی ہو چکے ہیں۔

تفصیلات کے مطابق افغانستان میں حالیہ بارشوں اور سیلاب نے بڑے پیمانے پر تباہی مچا دی جہاں طوفانی بارشوں اور سیلابی ریلوں سے 250 افراد جاں بحق اور 300 سے زائد زخمی ہو گئے ہیں۔

افغان نیشنل ڈیزاسٹر مینجمنٹ اتھارٹی کا کہنا ہے کہ بارشوں اور سیلاب کے باعث 33 ہزار گھر مکمل اور جزوی طور پر تباہ ہو چکے ہیں۔

افغان میڈیا کے مطابق حالیہ دنوں کے دوران افغان دارالحکومت کابل سمیت ملک کے 24 صوبوں میں شدید بارشوں اور اس کے نتیجے میں آنے والے سیلابی ریلوں نے بڑے پیمانے پر تباہی مچائی۔

یہ بھی پڑھیں:  ایران اورپاکستان کے بعد افغانستان میں طوفانی بارشوں نے تباہی مچادی

سیلابی ریلوں میں متعدد افراد لا پتا بھی ہوئے ہیں، اب تک 6 ہزار خاندانوں کو نقد مالی امداد دی جا چکی ہے جب کہ 19 ہزار کو خوراک فراہم کی گئی ہے۔

حکام کے مطابق رواں ماہ بدخشاں، تخار، ہرات، فریاب، بلخ، سمنگان، کنڑ سمیت دیگر افغان صوبے سیلاب سے متاثر ہوئے، اچانک آنے والے سیلابی ریلے مختلف علاقوں میں لوگوں کے سینکڑوں پالتو مال مویشی بہا کرلے گئے۔

افغان میڈیا رپورٹس کے مطابق افغانستان کے صوبے ہرات کے 5 اضلاع میں شدید بارشوں نے تباہی مچائی، سیلابی صورتح ال کے باعث مختلف حادثات میں 6 افراد ہلاک اور 17 لا پتا ہوئے۔

سیلابی ریلے میں لا پتا ہونے والے تمام افراد ایک بس میں سوار تھے، آخری اطلاعات تک لاپتا ہونے والے افراد کی تلاش جاری تھی۔

کابل: افغانستان کے دار الحکومت میں ایک کار بم حملے میں 4 افراد ہلاک جب کہ 44 زخمی ہو گئے ہیں، حملہ ایک غیر ملکی کمپاؤنڈ کے قریب کیا گیا۔

تفصیلات کے مطابق افغانستان کا دار الحکومت کابل ایک بار پھر دہشت گردوں کا نشانہ بن گیا، ایک قلعہ بند غیر ملکی کمپاؤنڈ کے قریب کار بم حملے میں چار افراد ہلاک جب کہ چوالیس زخمی ہو گئے۔

[bs-quote quote=”انتہائی محفوظ کمپاؤنڈ میں اقوام متحدہ کا عملہ رہائش پذیر تھا۔” style=”style-7″ align=”left” color=”#dd3333″][/bs-quote]

حکام کا کہنا ہے کہ فوری طور پر اس تباہ کن حملے کی ذمہ داری کسی نے قبول نہیں کی ہے۔

حکام کا یہ بھی کہنا ہے کہ اس حملے نے پورے شہر کو ہلا کر رکھ دیا ہے، یہ حملہ ایک ایسے وقت میں کیا گیا ہے جب کہ طالبان کے ساتھ سترہ سالہ جنگ کے خاتمے کے لیے جاری سفارتی کوششوں میں تیزی آ گئی ہے۔

وزارتِ داخلہ کے ترجمان نے میڈیا کو بتایا کہ دہشت گردوں نے ایک مصروف سڑک کے قریب واقع گرین ولیج کو نشانہ بنایا، جہاں غیر ملکی ورکرز کام کرتے ہیں۔

میڈیا رپورٹس کے مطابق کار بم حملے میں زخمی ہونے والوں میں دس بچے بھی شامل ہیں، دھماکا اتنا زوردار تھا کہ قریب موجود رہائشی علاقے کو بھی شدید نقصان پہنچا۔

یہ بھی پڑھیں: کابل: امریکی فضائی حملہ، ملا عبدالمنان سمیت 29 طالبان ہلاک

دہشت گردوں کا نشانہ بننے والے انتہائی محفوظ کمپاؤنڈ میں اقوام متحدہ کا عملہ رہائش پذیر تھا تاہم وزارت داخلہ کے ترجمان کے مطابق علاقہ اب خالی کیا جا چکا ہے اور وہاں صرف چند گارڈز ہی موجود تھے۔

یاد رہے کہ 21 نومبر کو بھی افغانستان کا دار الحکومت کابل بڑے دہشت گرد حملے کا نشانہ بنا تھا، جس میں 50 افراد اپنی زندگی کی بازی ہار گئے تھے۔

کابل: افغانستان کے دارالحکومت کابل کے علاقے قلعۂ وزیر میں دہشت گردوں نے ایک فوجی تربیتی مرکز کے قریب واقع کمپلیکس پر قبضہ جما کر ٹریننگ سینٹر کو ہدف بنا لیا، سیکورٹی فورسز کی کارروائی میں تمام دہشت گرد مارے گئے۔

تفصیلات کے مطابق قلعۂ وزیر میں واقع ایک ملٹری ٹریننگ سینٹر ’نیشنل ڈائریکٹوریٹ آف سیکورٹی‘ (این ڈی ایس) کے قریب واقع عمارت پر صبح دس بجے دہشت گردوں نے قبضہ کر کے فوجی تربیتی مرکز کو مسلسل نشانہ بنایا۔

کابل پولیس کے سربراہ کے ترجمان حشمت ستنکزئی نے میڈیا کو بتایا کہ قلعۂ وزیر میں دہشت گردوں نے زیرِ تعمیر عمارت میں مورچہ بندی کر لی تھی۔ دہشت گردوں نے عمارت پر قبضہ جما کر وہاں سے چھپ کر ٹریننگ سینٹر پر گولیاں اور راکٹ برسائے۔

دریں اثنا افغان میڈیا نمائندوں کے مطابق علاقے کے رہائشیوں کہا کہنا ہے کہ پولیس اور دہشت گردوں کے درمیان شدید جھڑپیں ہوئیں، اس دوران دو دھماکوں کی آواز بھی سنی گئی جو راکٹوں کی تھی۔

پولیس نمائندے ستنکزئی نے بتایا کہ سیکورٹی فورسز نے علاقے کو گھیرے میں لے کر مقامی لوگوں کو نکالا اور انھیں قریبی محفوظ علاقے کی طرف لے جایا گیا۔ پولیس کو دہشت گردوں کا صفایا کرنے میں چھ گھنٹے لگے جب کہ دہشت گردوں کے ساتھ جھڑپ میں تین افراد زخمی ہوئے۔

وزیرِ داخلہ ویس برمک نے شام چار بجے دہشت گردوں کے حملے کی تصدیق کرتے ہوئے کہا ہے کہ سیکورٹی فورسز نے حملے میں ملوث تین دہشت گردوں کو مار کر عمارت خالی کرالی ہے۔

خیال رہے کہ یہ رواں ہفتے فوجی عمارت پر یہ دوسرا حملہ ہے، پولیس کے مطابق منگل کو بغلان میں ملٹری بیس پر طالبان کے حملے میں افغان نیشنل آرمی کے 35 افسران اور دس پولیس اہل کار ہلاک ہوئے تھے، اس حملے میں 400 طالبان نے حصہ لیا تھا۔