کابل: افغانستان کےمختلف صوبوں میں برفانی تودے گرنے سے100 سے زائد افراد ہلاک اور درجنوں زخمی ہوگئے۔
تفصیلات کےمطابق افغانستان کےمختلف صوبوں میں گزشتہ تین روز سے ہونے والے شدید برف باری کےنتیجے برفانی تودے گرنےسے100 سے زائد افراد جان کی بازی ہارگئے۔
وزیر مملکت برائےڈیزاسٹرمنیجمنٹ کےترجمان عمر محمدی کےمطابق اتوار کے روز افغان صوبے نورستان میں ایک گاؤں پر برفانی تودی گراجس کے نتیجے میں 50 افراد ہلاک ہوگئے۔
عمر محمدی کاکہناہے کہ صوبہ نورستان کےدو گاؤں برفانی تودہ گرنے کے نتیجے میں مکمل طور پر تباہ ہوگئے جہاں سے اب تک 50 لاشیں نکالی جاچکی ہیں جبکہ ہلاکتوں میں مزید اضافے کا خدشہ ہے۔
برفانی تودہ گرنے کا ایک اور واقعہ صوبہ پروان میں پیش آیا جس کے نتیجے میں 16 افراد ہلاک اور 8 زخمی ہوئے۔صوبہ بدخشاں میں برفانی تودہ گرنے کے نتیجے میں تین خواتین اور دو بچوں سمیت 18 افراد ہلاک ہوئے۔
افغان حکام کا کہنا ہے کہ دور دراز کے علاقوں سے اطلاعات موصول ہونے میں تاخیر ہورہی ہے اور توقع ہے کہ ہلاکتوں میں مزید اضافہ ہوگا۔
واضح رہےکہ برفانی تودے گرنے سے 550 سے زائد جانور بھی ہلاک ہوئے ہیں جبکہ ڈھائی ہزار ایکڑ رقبے پر پھیلی فصلیں بھی تباہ ہوچکی ہیں۔
