کابل: افغان طالبان نے افغان حکومت کے سیز فائر کے مطالبے کو ماننے سے انکار کردیا۔
غیرملکی خبررساں ادارے کی رپورٹ کے مطابق ترجمان افغان طالبان کا کہنا ہے کہ افغان حکومت سیز فائر معاہدے کے لیے سنجیدہ نظر نہیں آتی، افغان حکومت دوحہ مذاکرات میں طے معاہدوں پر عمل نہیں کررہی ہے۔
ترجمان افغان طالبان کے مطابق افغان حکومت نے قیدیوں کی رہائی میں بھی تعاون نہیں کیا، دوحہ معاہدے پر عمل نہیں ہوتا تو سیز فائر کیسے کرسکتے ہیں۔
واضح رہے کہ اس سے قبل ترجمان طالبان سہیل شاہین نے افغان حکومت کو متنبہ کیا تھا کہ قیدیوں کی رہائی میں تاخیر کا عمل مذاکرات پر اثر انداز ہوسکتا ہے۔
مزید پڑھیں: قیدیوں کی رہائی کا معاملہ، طالبان نے خبردار کردیا
ترجمان افغان طالبان کا کہنا تھا کہ افغان حکومت کو جو فہرست دی ان میں تمام قیدی سیاسی ہیں، تمام قیدیوں کو دوحہ امن معاہدے کے مطابق افغان حکومت کو رہا کرنا ہوگا۔
خیال رہے کہ امریکا اور طالبان کے درمیان ہونے والے تاریخی معاہدے میں طے پایا تھا کہ طالبان اور افغان حکومت آپس میں قیدیوں کی رہائی عمل میں لائیں گے جس پر عمل کیا جارہا ہے۔
یاد رہے کہ گزشتہ دو دنوں کے دوران طالبان نے 27 افغان فوجی اور پولیس اہلکاروں کو رہا کیا۔ جبکہ اس سے قبل متعدد بار رہائی کا سلسلہ عمل میں لایا جاچکا ہے۔
