Tag: افغان شہریوں

اسلام آباد : اسلام آباد ہائیکورٹ نے 18 افغان شہریوں کی ملک بدری روک دی اور وزارت داخلہ، نادرا، ڈی جی امیگریشن، ایف آئی اے اور پولیس کو نوٹس جاری کرتے ہوئے جواب طلب کر لیا۔

تفصیلات کے مطابق اسلام آباد ہائیکورٹ کے چیف جسٹس سرفراز ڈوگر نے افغان شہریوں کی جانب سے دائر درخواست پر تحریری حکمنامہ جاری کردیا، درخواست گزاروں کی جانب سے وکیل عادل عزیز قاضی اور دیگر عدالت میں پیش ہوئے۔

تحریری حکمنامے میں کہا گیا کہ حکومت نے 4 اگست کو درخواست گزاروں کے پی او آر کارڈز منسوخ کرتے ہوئے انہیں واپس بھجوانے کا حکم دیا تھا۔

وکیل نے مؤقف اپنایا کہ درخواست گزار مرحوم فضل الرحمان کے خاندان سے تعلق رکھتے ہیں، فضل الرحمان مرحوم نے 2008 میں تمام قانونی تقاضے پورے کرنے کے بعد شہریت کے لیے درخواست دی تھی، تاہم تاحال اس درخواست پر کوئی فیصلہ نہیں کیا گیا۔

عدالت نے فریقین کو ہدایت کی ہے کہ آئندہ سماعت پر پیراوائز کمنٹس جمع کرائیں اور تحریری حکمنامے میں کہا گیا ہے کہ آئندہ سماعت تک درخواست گزاروں کے خلاف کسی بھی قسم کی کارروائی نہ کی جائے۔

اسلام آباد ہائیکورٹ نے 18 افغان شہریوں کو واپس بھجوانے کی کارروائی آگے بڑھانے سے روک دیا۔

عدالت نے وزارت داخلہ، نادرا، ڈی جی امیگریشن، ایف آئی اے اور پولیس کو نوٹس جاری کرتے ہوئے جواب طلب کرلیا اور کیس کی مزید سماعت 18 ستمبر کو مقرر کردی۔

اسلام آباد : قانونی طور پر مقیم افغان شہریوں کو اسلام آباد اور راولپنڈی سے نکالنے کی تیاریاں کرلی گئی اور منتقلی کیلئے 31مارچ کی ڈیڈ لائن دی گئی ہے۔

تفصیلات کے مطابق افغان مہاجرین کو پاکستان سے واپس بھجوانے کے منصوبے کا اگلا مرحلے کا آغاز کیا جارہا ہے۔

دوسرے مرحلے میں افغان سٹیزن کارڈ رکھنے والوں کو واپس بھجوایا جائے گا، پاکستان میں تقریباً 8 لاکھ افغان مہاجرین اے سی سی کارڈ پر ہیں۔

قانونی طور پر مقیم افغان شہریوں کو بھی اسلام آباد اور راولپنڈی سے نکالنے کی تیاریاں کرلی گئیں ، وزارت داخلہ نے وزیراعظم کی زیرصدارت اجلاس کے فیصلوں پرعملدرآمد شروع کردیا۔

افغان شہریوں کی وفاقی دارالحکومت اور راولپنڈی سے منتقلی کیلئے 31مارچ کی ڈیڈ لائن دی گئی ہے، افغان سٹیزن کارڈ رکھنے والوں کو31 مارچ تک دوسرے شہروں پھر افغانستان منتقل کیا جائے گا۔

تیسرے ملک جانے کے خواہشمند افغانیوں کے قیام کی اجازت میں 30 جون تک توسیع کی گئی ہے ، کسی اور ملک کے ویزے کے منتظر افغان شہری بھی اسلام آباد میں نہیں رہ سکتے۔

اداروں کی عملدرآمد رپورٹ وزارت داخلہ ہر 15 روزبعدوزیراعظم آفس کوبھیجے گی اور ستمبر تک کسی اور ملک نے ویزہ نہ دیا توافغان باشندےغیر قانونی تصور ہوں گے۔

پشاور : افغان شہریوں کو جعلی پاکستانی پاسپورٹ پراٹلی بھجوانے میں ملوث 2 ایجنٹس کو گرفتار کرلیا گیا، ملزمان سے 15 پاکستانی پاسپورٹ اور موبائل فونز برآمد ہوئے۔

تفصیلات کے مطابق ایف آئی اے لنک آفس اٹلی کی نشاندہی پر انسانی اسمگلرز کیخلاف کریک ڈاؤن کیا گیا، کریک ڈاؤن میں افغان شہریوں کو جعلی پاکستانی پاسپورٹ پر اٹلی بھجوانے میں ملوث دو ایجنٹوں کو پشاور سے گرفتار کرلیا گیا۔

ایف آئی اے نے بتایا کہ گرفتار ایجنٹ شفیع اللہ اور خورشید کو صدرپشاور میں خفیہ دفتر سے گرفتار کیا اور ملزمان سے 15 پاکستانی پاسپورٹ اور موبائل فونز برآمد کرلیے ہیں۔

ترجمان کا کہنا تھا کہ ملزمان کے موبائل سے پاکستانی ،افغان پاسپورٹس کی معلومات و دیگرشواہد برآمد ہوئے، ملزمان متعدد شہریوں سے ویزا فراڈ کر کے بھاری رقوم بٹور چکے تھے۔

یاد رہے گذشتہ ہفتے ایف آئی اے فیصل آباد زون نے انسانی اسمگلروں کے خلاف کارروائی میں بین لاقوامی گینگ کی خاتون ایجنٹ حمیرا کنول کو گرفتار کیا تھا۔

ترجمان ایف آئی اے کے مطابق ملزمہ حمیرا کنول کو فیصل آباد سے گرفتار کیا گیا، بین الاقوامی گینگ کے دیگر ارکان آذربائیجان سے گینگ چلا رہے تھے۔