Tag: افغان ناظم الامور

اسلام آباد : پاکستان نے چمن میں افغان فورسز کی بلااشتعال فائرنگ اور گولہ باری پر افغان ناظم الامور کو دفترخارجہ طلب کرکے شدید احتجاج کیا۔

تفصیلات کے مطابق ترجمان دفترخارجہ کی جانب سے کہا گیا کہ افغان فورسز کی جانب سے پاکستانی سویلین آبادی پر بلااشتعال فائرنگ اور گولہ باری پر افغان ناظم الامور کو دفتر خارجہ طلب کیا گیا۔

ترجمان کا کہنا تھا کہ پاکستان نے چمن میں افغان فورسز کی بلااشتعال فائرنگ اور گولہ باری کی شدید مذمت کرتے ہوئے کہا کہ حالیہ واقعات کےنتیجےمیں جانی اورمالی نقصان ہوا۔

دفتر خارجہ کی جانب سے اعادہ کیا گیا شہریوں کاتحفظ دونوں فریقوں کی ذمہ داری ہے، پاکستان افغانستان کےساتھ برادرانہ تعلقات برقرار رکھنے کیلئے پرعزم ہے، پاک افغان سرحدپرامن اس مقصد کیلئےبنیادی ہے۔

گذشتہ روز بلوچستان میں افغان سرحدی علاقے چمن کے قریب اڈہ کہول میں افغان حدود سے بلا اشتعال شدید فائرنگ کی گئی تھی ، ایک مکان پرگولہ گرنے سے شہری شہید جبکہ دوبچوں سمیت بیس افراد زخمی ہوگئے تھے۔

فائرنگ کے باعث کسٹم ہاؤس خالی کرا لیا گیا، افغان فورسز کی جارحیت پرپاکستانی فورسز نے بھی بھرپور جوابی کارروائی کی اور بھاری توپ خانےکا استعمال کیا۔

افغانستان سے بار بارحملوں کے بعد اڈہ کہول، گری کہول، کلی فیضول، گلدارباغیچا، بارڈرروڈ اورمال روڈ سے شہریوں نے نقل مکانی شروع کردی ہے۔

اس سے قبل گیارہ دسمبر کو بھی افغانستان سے چمن کی آبادی پر حملہ کیا گیا تھا،آٹھ شہری شہید اوربیس زخمی ہوئے تھے