اسلام آباد: وفاقی وزیر خزانہ اسد عمر کی زیرصدارت اقتصادی رابطہ کمیٹی کا اجلاس آج ہوگا جس میں 6 نکاتی ایجنڈے پر غور کیا جائے گا۔
تفصیلات کے مطابق وفاقی دارالحکومت اسلام آباد میں وزیرخزانہ اسد عمرکی زیرصدارت اقتصادی رابطہ کمیٹی میں 6 نکاتی ایجنڈے سمیت سال 2019 میں کپاس کی پیداوار میں اضافے کے حوالے سے بھی غور کیا جائے گا۔
اقتصادی رابطہ کمیٹی کے اجلاس میں قومی ایئرلائن کی معاونت سمیت گوادر پورٹ اور گوادر فری زون کے لیے ضروری ترامیم پیش کی جائیں گی۔
وزیرخزانہ کی زیرصدارت اجلاس میں پٹرولیم مصنوعات مارکیٹنگ لائسنس کے اجرا کے لیے نئے قواعد وضوابط کے حوالے سے سمری بھی پیش کی جائے گی۔
اقتصادی رابطہ کمیٹی کے اجلاس میں مائیک تروجابا آئل پائپ لائن منصوبے کا معاملہ بھی زیرغور آئے گا۔
آئی ایم ایف سے اختلاف دور ہوگئے ہیں، جلد معاہدہ ہوجائےگا، وزیرخزانہ اسد عمر
یاد رہے کہ گزشتہ روز وزیرخزانہ اسدعمرکا کہنا تھا کہ آئی ایم ایف اور پاکستان کے درمیان اختلافات میں کمی آئی ہے، امید ہے کہ جلدمعاہدہ طے پاجائےگا، کوشش ہوگی آئی ایم ایف سے معاہدہ آخری ہو۔
اسد عمر کا کہنا تھا کہ دبئی فورم میں وزیراعظم نے اپنے وژن سے متعلق بات کی، پاکستان کو ہم نے ہی اٹھانا ہے، کسی نے باہر سے نہیں آنا، بہتر فیصلے کریں گے تو پاکستان کی معیشت اٹھےگی۔
