Tag: اقوام متحدہ کی جنرل اسمبلی

اسلام آباد : وزیراعظم شہباز شریف آج اقوام متحدہ کی جنرل اسمبلی سے خطاب کریں گے، جس میں کشمیر اور فلسطین کے تنازعات کے حل کا مطالبہ کریں گے۔

تفصیلات کے مطابق وزیراعظم شہباز شریف اقوام متحدہ کی جنرل اسمبلی کے 79 ویں اجلاس سے آج خطاب کریں گے۔

وزیراعظم اپنے خطاب میں کشمیر اور فلسطین کے تنازعات کے حل پر زور دیں گے ساتھ ہی عالمی اقتصادی تعلقات میں مساوات اور مالیاتی ڈھانچے میں اصلاحات کی اہمیت اجاگر کریں گے۔

وزیراعظم علاقائی اور عالمی امور پر پاکستان کا مؤقف پیش کریں گے جبکہ موسمیاتی تبدیلیوں سمیت اسلاموفوبیا کا معاملہ بھی اٹھایا جائے گا۔

اس کے علاوہ وزیراعظم عالمی امن، سلامتی اور خوشحالی کو فروغ دینے میں اقوام متحدہ کے کردار کی تعریف کریں گے۔

گذشتہ روز وزیراعظم شہباز شریف نے سلامتی کونسل کے اعلیٰ سطح مباحثہ میں اظہار خیال کرتے ہوئے کہا تھا ہمیں اسرائیل کو غزہ میں نسل کشی کی جنگ سے روکنا ہوگا، جس سے مشرق وسطیٰ میں وسیع تنازع پیدا ہورہا ہے، اب وقت آگیا ہے کہ اسرائیل کے خلاف پابندیوں پر غور کیا جائے، جس میں ہتھیاروں اور تجارتی پابندیاں بھی شامل ہوں، فلسطینی عوام کے خلاف جنگی جرائم پر اسرائیلی قیادت کا احتساب ہونا چاہیے۔

وزیراعظم کا کہنا تھا کہ اسرائیل کو اس کے جرائم پر جوابدہ بنانا ہوگا، تنازعات کے حل نہ کرنے سے ہمارا مستقبل تاریک ہوسکتا ہے یوکرین جنگ کو پھیلاؤ سے روکنا ہوگا،

انھوں نے زور دیا سلامتی کونسل یوکرین کی جنگ ختم کرنے کیلئے جامع اور غیر جانبدار منصوبہ بنائے اور طاقت کے غیرقانونی استعمال کو کسی صورت برداشت نہ کیا جائے۔

وزیراعظم کا کہنا تھا کہ جموں و کشمیر کا مسئلہ حل نہ ہونے سے خطے میں کے امن کو خطرہ درپیش ہے، سلامتی کونسل کو مسئلہ کشمیر کو بھی نظر انداز نہیں کرنا چاہیے، کونسل کو کشمیری عوام کے انسانی حقوق کی وسیع پیمانے پر خلاف ورزیوں کو روکنا چاہیے اور اپنی ان قراردادوں کے مطابق کشمیر میں حق خود ارادیت کے لیے استصواب رائے کرانا چاہیے۔

نیویارک : اقوام متحدہ کی جنرل اسمبلی نے غزہ میں فوری جنگ بندی کی قرارداد بھاری اکثریت سے منظور کرلی۔

تفصیلات کے مطابق اقوام متحدہ کی جنرل اسمبلی میں غزہ میں فوری جنگ بندی کی قرارداد منظورکرلی گئی، جنگ بندی کی قرارداد بھاری اکثریت سے منظور کی گئی۔

قرارداد کی ایک سو ترپن ممالک نے حمایت جبکہ دس ملکوں نے مخالفت کی اور تئیس ممالک نے رائے شماری میں حصہ نہیں لیا۔

قرارداد میں میں تمام یرغمال افراد کو غیرمشروط رہا کرنے کا مطالبہ بھی کیا گیا ہے۔

اقوام متحدہ میں غزہ میں جنگ بندی سے متعلق قرارداد کی مخالفت کرنے والے ممالک میں امریکا، اسرائیل کے علاوہ چیک ریپبلک، آسٹریا، پیراگوئے، پاپوا نیوگینی، لائیبریا اور مائیکرونیشیا سمیت نؤرو شامل ہیں۔

کینیڈا، آسٹریلیا اور نیوزی لینڈ کے رہنماؤں نے الگ الگ مشترکہ بیان میں جنگ بندی کا مطالبہ کرتے ہوئے کہا کہ حماس کو شکست دینے کی قیمت تمام فلسطینی شہریوں کی مسلسل تکلیف نہیں ہو سکتی۔

گذشتہ ہفتے اقوام متحدہ کی سلامتی کونسل میں غزہ میں انسانی بنیادوں پر جنگ بندی کی قرارداد کو امریکا نے ویٹو کردیا تھا۔

اقوام متحدہ میں امریکی نمائندے کا کہنا تھا کہ قرارداد میں اب بھی غیر مشروط جنگ بندی کا مطالبہ موجود ہے۔ سلامتی کونسل کے 15 میں سے 13 ارکان نے قرارداد کی حمایت کی، جبکہ برطانیہ نے اس میں حصہ نہیں لیا۔

امریکا کے مطابق یہ مطالبہ حماس کو اس قابل بنا دے گا جو اس نے 7 اکتوبر کو کیا تھا۔

خیال رہے صہیونی فورسزکی جانب سے غزہ میں قتل و غارت جاری ہے، مزید دو سوفلسطینیوں کو شہید کردیا گیا ، شہدا میں سات بچے بھی شامل ہیں۔

رفح میں اسرائیلی طیاروں نےدوگھروں کونشانہ بنایا، خان یونس میں ایک گاڑی پر میزائل سے حملہ کیا گیا جبکہ بیت الحنون میں اقوام متحدہ کے تحت چلنے والے دو اسکول تباہ کر دیے گئے۔

اسرائیلی فوج مسلسل اسپتالوں کو نشانہ بنا رہی ہے، دوماہ میں العودہ اسپتال کے پانچ ڈاکٹرشہید ہوچکے ہیں، جس کے بعد مجموعی طور پر شہید فلسطینیوں کی تعداد اٹھارہ ہزارچار سو سے زائد ہوچکی ہے، جس میں ساڑھے آٹھ ہزار بچے شامل ہیں جبکہ پچاس ہزار فلسطینی زخمی ہیں۔