عالمی امن کے لئے کوشاں اقوام متحدہ کے امن دستوں کا آج عالمی دن ہے، پاکستان اقوامِ متحدہ کے امن مشن میں اپنی افواج کے ذریعے سب سے زیادہ تعاون کرنے والا ملک ہے۔
تفصیلات کے مطابق پاکستان سمیت دنیا بھر میں ”اقوام متحدہ کے امن دستوں کا عالمی دن“ منایا جا رہا ہے، اس دن فروغ امن کیلئے کردار ادا کرنے والے بہادر مردوں اور خواتین کو خراج تحسین پیش کیا جاتا ہے، جنہوں نے دنیا بھر میں تنازعات سے متاثرہ علاقوں میں امن اور استحکام کیلئے پوری جانفشانی سے اقوام متحدہ کے امن مشنز میں خدمات انجام دیں۔
یہ دن اقوامِ متحدہ کا امن برقرار رکھنے کی کاوشوں، انسانی مصائب کے خاتمے، جنگوں اور اندرونی تنازعات کے شکار ممالک میں دیرپا امن و امان کی صورتحال قائم رکھنے کے عالمی عزم کی عکاسی کرتا ہے۔
پاکستان اقوامِ متحدہ کے امن مشن میں اپنی افواج کے ذریعے سب سے زیادہ تعاون کرنے والا ملک ہے، 1960سے لے کر اب تک پاکستان نے دنیا کے تقریباََ تمام براعظموں سمیت 29ممالک میں اقوامِ متحدہ کے48امن مشنز میں 2 لاکھ 35 ہزار فوجیوں کو تعینات کیا۔
اس وقت پاکستان کے تقریباََ3ہزارامن دستے ڈیموکریٹک ریپبلک آف کانگو، جنوبی سوڈان،، وسطی افریقی جمہوریہ، قبرص، مغربی صحارا اور صومالیہ کے امن مشنز میں خدمات سر انجام دے رہے ہیں۔
ترجمان کے مطابق پاکستان کو اقوام متحدہ کی قیام امن کی کوششوں میں اپنی دیرینہ وابستگی پر فخر ہے، پاکستانی امن دستوں نے تنازعات سے متاثرہ علاقوں میں امن اور استحکام کو فروغ دینے کے لئے غیر معمولی جرات، پیشہ ورانہ مہارت اور لگن کا مظاہرہ کیا۔
فرائض کی انجام دہی کے دوران مجموعی طور پر 181 پاکستانی امن دستوں نے جانوں کی قربانیاں دیں، امن کے اس عالمی دن پ ، عالمی امن کے عظیم مقصد کے لئے قربانیاں دینے والے اہلکاروں کو خراج تحسین پیش کرتے ہیں۔
پاکستان، اقوام متحدہ کی خواتین اہلکاروں کو بہتر اور یکساں نمائندگی کی فراہمی کی کوششوں کے لئے بھی پرعزم ہے۔
ترجمان نے اس عزم کا اعادہ کیا کہ پاکستان اقوام متحدہ کے امن دستوں کی سیکیورٹی کو بہتر بنانے کے لئے اقدامات کی بھی حمایت کرتا ہے، خصوصا ان کیلئے جو زیادہ خطرے کے علاقوں میں خدمات انجام دے رہے ہیں۔
اقوام متحدہ کے امن مشن میں پاکستان کی شراکت بین الاقوامی امن اور سلامتی کے لئے ہماری قوم کے عزم کا منہ بولتا ثبوت ہے اور پاکستانی امن دستے شورش زدہ علاقوں میں مقامی کمیونٹیز کی بہتری کے لئے کام جاری رکھیں گے۔