ARYNews.tv | Urdu – Har Lamha Bakhabar

Tag: اقوام متحدہ

  • سیلاب سے تباہ کاریاں: اقوام متحدہ کا پاکستان کے لئے ڈونرز کانفرنس کرنے کا فیصلہ

    سیلاب سے تباہ کاریاں: اقوام متحدہ کا پاکستان کے لئے ڈونرز کانفرنس کرنے کا فیصلہ

    اسلام آباد : اقوام متحدہ نے رواں سال کے آخر تک پاکستان کے لئے ڈونرز کانفرنس کرنےکا فیصلہ کرلیا۔

    تفصیلات کے مطابق پاکستان میں سیلاب سے تباہ کاریاں اورعالمی اپیل پر انتہائی اہم پیشرفت سامنے آئی۔

    اقوام متحدہ نے پاکستان کے لئے ڈونرز کانفرنس کرنےکا فیصلہ کرلیا ہے۔

    ذرائع کا کہنا ہے کہ اقوام متحدہ اب ڈونرز کانفرنس کا خود انعقاد اور میزبانی کرے گی، پاکستان کیلئے ڈونرز کانفرنس اس سال کے آخرتک منعقد کی جائے گی۔

    ذرائع کے مطابق ڈونرزکانفرس میں فرانس بھی میزبانی کرےگا ، اقوام متحدہ نےپاکستان کیلئےڈونرزکانفرنس کیلئے تیاریاں شروع کردیں ہیں۔

    ڈونرزکانفرنس کیلئے عالمی برادری کی جانب سے فوری اور مثبت ردعمل سامنے آیا ہے ، ڈونرز کانفرنس کے ذریعے پاکستان کوسیلاب سے ہونے والی تباہی سے نمٹنے میں خاطر خواہ مدد ملے گی۔

    یاد رہے وزیراعظم شہبازشریف نے نیویارک میں سیکریٹری جنرل اقوام متحدہ انتونیو گوتریس سے ملاقات کی تھی۔

    ملاقات میں بین الاقوامی صورتحال اورسیلاب کی تازہ صورتحال پرتبادلہ خیال کیا گیا۔

    وزیراعظم نے سیکریٹری جنرل اقوام متحدہ کو سیلاب کی تازہ صورتحال سےآگاہ کرتے ہوئے سیلاب سے نمٹنے کیلئے یواین کے بروقت کردار اور امداد کو سراہا۔

    وزیراعظم کا کہنا تھا کہ سیلاب سے پاکستان کو تیس ارب ڈالر نقصان ہوا، یواین سیکریٹری جنرل جلد ڈونرز کانفرنس بلائیں گے۔

  • وزیر اعظم نے سیلاب کی تباہ کاریوں کو مفصل انداز میں بیان کیا: منیر اکرم

    وزیر اعظم نے سیلاب کی تباہ کاریوں کو مفصل انداز میں بیان کیا: منیر اکرم

    نیویارک: اقوام متحدہ میں پاکستان کے مستقل مندوب منیر اکرم کا کہنا ہے کہ وزیر اعظم نے اپنے خطاب میں سیلاب کی تباہ کاریوں کو مفصل انداز میں بیان کیا، کوشش ہے کہ سیلاب کے حوالے سے ڈونرز کانفرنس اچھے طریقے سے ہو۔

    تفصیلات کے مطابق اقوام متحدہ میں پاکستان کے مستقل مندوب منیر اکرم نے اے آر وائی نیوز سے گفتگو کرتے ہوئے کہا کہ وزیر اعظم نے سیلاب کی تباہ کاریوں کو مفصل انداز میں بیان کیا۔

    منیر اکرم کا کہنا تھا کہ وزیر اعظم نے مسئلہ کشمیر اور افغانستان سے متعلق پاکستان کا مؤقف بیان کیا، انہوں نے خطاب میں کشمیر اور افغانستان کے زمینی حقائق بیان کیے۔

    انہوں نے کہا کہ سیلاب کے حوالے سے ڈونرز کانفرنس اچھے طریقے سے ہوگی، کوشش ہوگی پوری دنیا کانفرنس میں شریک ہو تاکہ کثیر الجہتی مدد مل سکے۔

    خیال رہے کہ گزشتہ روز وزیر اعظم شہباز شریف نے اقوام متحدہ کی جنرل اسمبلی سے خطاب کرتے ہوئے کہا تھا کہ پاکستان کا بڑا حصہ سیلابی پانی میں ڈوبا ہوا ہے، خواتین اور بچوں سمیت 3 کروڑ 30 لاکھ افراد بے گھر ہوئے ہیں۔

    وزیر اعظم نے کہا تھا کہ 1500 سے زائد افراد سیلاب کے باعث جاں بحق ہوئے، سیلاب کی وجہ سے لوگوں کو جانی و مالی نقصان اٹھانا پڑا۔

    انہوں نے کہا تھا کہ پاکستان میں ایسی قدرتی آفت کو نہیں دیکھا جس نے لوگوں کی زندگی بدل دی ہو، ماحولیاتی مسائل کی وجہ سے پاکستان شدید متاثرہو رہا ہے۔

    وزیر اعظم کا مزید کہنا تھا کہ دنیا میں جو کاربن فضا میں بھیجی جا رہی ہے، پاکستان کا اس میں ایک فیصد بھی حصہ نہیں، ہمیں جن مسائل کا سامنا ہے ہم اس کا سبب نہیں ہیں۔

  • یمن کے ساحل پر برسوں سے کھڑے خراب بحری جہاز کے لیے 17 ممالک مدد کو آ گئے

    یمن کے ساحل پر برسوں سے کھڑے خراب بحری جہاز کے لیے 17 ممالک مدد کو آ گئے

    یمن کے ساحل پر برسوں سے کھڑے خراب بحری جہاز کے لیے 17 ممالک مدد کو آ گئے، ماحولیاتی بحران سے بچنے کے لیے اقوام متحدہ کی کوششوں سے درکار 75 ملین ڈالر جمع ہو گئے۔

    تفصیلات کے مطابق اقوام متحدہ کا کہنا ہے کہ یمن کے ساحل کے قریب بحیرہ احمر میں پھنسے زنگ آلود آئل ٹینکر سے نمٹنے کے لیے مناسب فنڈز مل گئے ہیں، جس سے جلد ہی اس کے گلنے سڑنے کے خطرات سے بچاؤ کا آپریشن شروع کر دیا جائے گا۔

    عرب نیوز کے مطابق یمن کے لیے اقوام متحدہ کے کوآرڈینیٹر ڈیوڈ گریلسے نے کہا ہے کہ 17 ممالک نے آپریشن کے پہلے مرحلے کے لیے درکار 75 ملین ڈالر جمع کرنے میں تعاون کیا ہے، جس میں سعودی عرب کے دس ملین ڈالر بھی شامل ہیں۔

    نیدرلینڈز نے 7 ملین ڈالر کا عطیہ دیا، اس بحری جہاز پر ایک اعشاریہ 14 ملین بیرل تیل موجود ہے، جو سات سال سے یمن کے ساحل کے قریب کھڑا ہے، اقوام متحدہ کے مطابق اگر تیل سمندر میں بہہ جاتا ہے تو صفائی کے آپریشن پر 30 ارب ڈالر تک کا خرچہ آ سکتا ہے۔

    ڈیوڈ گریلسے کے مطابق اگر اس مسئلے سے درست طور پر نہ نمٹا گیا تو ایک ماحولیاتی بحران آ سکتا ہے، جس سے نہ صرف یمن متاثر ہوگا بلکہ قریبی ممالک بھی لپیٹ میں آئیں گے، جن میں سعودی عرب اور صومالیہ بھی شامل ہیں، جب کہ ماہی گیری اور جہاز رانی میں بھی خلل پڑے گا۔

    بچاؤ آپریشن 2 مراحل پر مشتمل ہوگا، پہلے مرحلے میں تیل کو محفوظ طور پر منتقل کیا جائے گا۔ گریسلے کا کہنا تھا کہ امید ہے اگلے ماہ کے آخر تک رقوم ہاتھ میں آ چکی ہوں گی۔

    یاد رہے کہ 2015 میں یمن کے مغربی ساحلی شہر الحدیدہ میں صافر نامی آئل ٹینکر کو اس وقت بین الاقوامی میرین انجینیئرز لاوارث چھوڑ کر چلے گئے تھے جب حوثیوں نے وہاں کا کنٹرول سنبھالا تھا۔

  • ’عالمی برادری سے پوچھتا ہوں بھارت میں اقلیتوں کے قتل عام پر وہ کیا کر رہی ہے؟‘

    ’عالمی برادری سے پوچھتا ہوں بھارت میں اقلیتوں کے قتل عام پر وہ کیا کر رہی ہے؟‘

    نیویارک: وزیر خارجہ پاکستان بلاول بھٹو زرداری نے عالمی برادری سے سوال کیا ہے کہ بھارت میں اقلیتوں کا قتل عام دنیا کے سامنے ہونے کے باوجود وہ کیوں کچھ نہیں کر رہی ہے۔

    تفصیلات کے مطابق بلاول بھٹو نے نیویارک میں بدھ کو اقلیتوں کے حقوق کے ڈیکلیئریشن پر اجلاس سے خطاب میں کہا ’’میں عالمی برادری سے پوچھتا ہوں بھارت میں اقلیتوں کے قتل عام پر وہ کیا کر رہی ہے؟‘

    انھوں نے کہا بھارت کے اندر اور مقبوضہ کشمیر میں بھارتی مظالم اور انسانی حقوق کی خلاف ورزیاں دنیا کے سامنے ہے، جہاں مسلمانوں کو تعصب کا نشانہ بنایا جا رہا ہے، بھارت ہندوتوا نظریے پر عمل پیرا ہے اور اقلیتیں غیر محفوظ ہو چکی ہیں۔

    وزیر خارجہ نے کہا دنیا کو اقلیتوں سے امتیازی سلوک جیسے مسائل کا سامنا ہے، بھارت میں آر ایس ایس کے ہندوتوا نظریے کو فروغ اور اس کے ذریعے مذہبی اقلیتوں کو نشانہ بنایا جا رہا ہے، میں عالمی برادری سے پوچھتا ہوں بھارتی مظالم پر وہ کیا کر رہی ہے؟

    بلاول بھٹو نے کہا بھارت مقبوضہ وادی میں مسلم اکثریت کا آبادیاتی تناسب تبدیل کرنے کے اقدامات کر رہا ہے، عالمی برادری بھارت اور مقبوضہ کشمیر میں انسانی حقوق کی سنگین خلاف ورزیوں کا نوٹس لے۔

    انھوں نے کہا اسلاموفوبیا بھی آج کے دور کا ایک بڑا مسئلہ ہے، دنیا کو اسلاموفوبیا سے نمٹنے کے لیے اقدامات کرنا ہوں گے۔

    او آئی سی رابطہ گروپ کا اجلاس

    قبل ازیں، یو این جنرل اسمبلی سائیڈ لائن پر جموں و کشمیر سے متعلق او آئی سی رابطہ گروپ کا اجلاس منعقد ہوا، جس میں مقبوضہ کشمیر سے متعلق او آئی سی کی رپورٹ پر مفصل غور ہوا۔

    اجلاس کے بعد او آئی سی کا مشترکہ اعلامیہ جاری کیا گیا، جس میں کہا گیا ہے کہ وزیر خارجہ بلاول بھٹو نے مقبوضہ کشمیر کی تازہ ترین صورت حال پر شرکا کو اعتماد میں لیا، اور مؤقف دہرایا کہ حق خود ارادیت کشمیریوں کے بنیادی، یو این قراردادوں کے مطابق تسلیم شدہ حق ہے، اور کشمیر کا حل کشمیریوں کی خواہشات کے مطابق، آزاد استصواب رائے سے ہی ممکن ہے۔

    او آئی سی رابطہ گروپ نے کشمیر سے متعلق 5 اگست 2019 کے بھارتی اقدامات کی مذمت کی، اور قرار دیا گیا کہ مقبوضہ کشمیر پر اقوام متحدہ کا چارٹر، اور سلامتی کونسل کی قراردادیں لاگو ہوتی ہیں۔

    او آئی سی نے مقبوضہ کشمیر میں غیر کشمیریوں کو جعلی ڈومیسائل دینے کے فیصلے کو مسترد کیا، اور مطالبہ کیا کہ بھارت فوری طور پر 5 اگست 2019 کے تمام اقدامات واپس لے، اور آبادی کے تناسب کو بدلنے کے اقدامات فوری روکے۔

  • ’پاکستان جیسے ملک سیلاب اور بڑھتے قرضوں کے بوجھ تلے دبے ہیں، جی 20 خصوصی فنڈ قائم کرے‘

    ’پاکستان جیسے ملک سیلاب اور بڑھتے قرضوں کے بوجھ تلے دبے ہیں، جی 20 خصوصی فنڈ قائم کرے‘

    نیویارک: سیکریٹری جنرل اقوام متحدہ انتونیو گوتریس نے کہا ہے کہ پاکستان جیسے ملک سیلاب اور بڑھتے قرضوں کے بوجھ تلے دبے ہیں، جی 20 خصوصی فنڈ قائم کرے۔

    تفصیلات کے مطابق اقوام متحدہ کی جنرل اسمبلی سے افتتاحی خطاب کرتے ہوئے سیکریٹری جنرل انتونیو گوتریس نے کہا کہ موسمیاتی تبدیلی سے دنیا کو خطرات لاحق ہیں، گرین ہاؤس گیسز کا اخراج موسمیاتی تبدیلی کی بڑی وجہ ہے، اس کی وجہ سے کئی ممالک کو قدرتی آفات کا سامنا ہے۔

    یو این سیکریٹری جنرل نے کہا ہماری دنیا خطرے میں ہے، اور مفلوج ہے، تعاون اور بات چیت ہی آگے بڑھنے کا واحد راستہ ہے، کسی بھی بڑے عالمی چیلنج کو ’رضامندی کے اتحاد‘ سے حل نہیں کیا جا سکتا، ہمیں دنیا کے اتحاد کی ضرورت ہے۔

    انھوں نے کہا موسمیاتی تبدیلی کی وجہ سے عالمی سطح پر غیر معمولی بارشیں تباہی پھیلا رہی ہیں، پاکستان میں سیلاب سے بڑے پیمانے پر تباہی پھیلی، متاثرہ ممالک عالمی برادری کی جانب سے ٹھوس اقدامات کے منتظر ہیں۔

    ان کا کہنا تھا موسمیاتی تبدیلی سے نمٹنے کے لیے عملی اقدامات کی ضرورت ہے، ترقی یافتہ ممالک آگے بڑھیں، ہمیں توانائی کے روایتی ذرائع سے ہٹ کر قابل تجدید ذرائع کی جانب جانا ہوگا، پائیدار ترقی کے لیے غریب اور ترقی یافتہ ممالک کو ساتھ لے کر چلنے کی ضرورت ہے۔

    انتونیو گوتریس نے کہا جی 20 جیسے ترتی یافتہ ممالک کو ترقی پذیر ممالک کی مدد کے لیے آگے آنا ہوگا، ترقی پذیر ممالک پر قرضوں کا بوجھ کم کرنے کے لیے عالمی سطح پر اقدامات کی ضرورت ہے، اور ایک مؤثر حکمت عملی درکار ہے۔

    انھوں نے کہا ترقی پذیر ممالک کی خصوصی مدد کے لیے جی 20 ممالک کو خصوصی فنڈز قائم کرنا چاہیے، پاکستان جیسے ملک سیلاب کے ساتھ بڑھتے قرضوں کے بوجھ سے نبرد آزما ہیں۔

    یو این سیکریٹری جنرل نے کہا ہمیں عام آدمی کے مسائل حل کرنے کے لیے خصوصی توجہ دینا ہوگی، ترقی پذیر ملکوں پر قرضوں کا بوجھ کم کر کے عوام کے لیے ترقی کے مواقع پیدا کرنا ہوں گے۔

  • اقوام متحدہ سیکریٹری جنرل انتونیو گوتریس پاکستان پہنچ گئے

    اقوام متحدہ سیکریٹری جنرل انتونیو گوتریس پاکستان پہنچ گئے

    اسلام آباد: اقوام متحدہ کے سیکریٹری جنرل انتونیو گوتریس پاکستان پہنچ گئے۔

    تفصیلات کے مطابق یو این سیکریٹری جنرل پاکستان پہنچ گئے ہیں، حنا ربانی کھر نے ایئر پورٹ پر ان کا استقبال کیا۔

    اقوام متحدہ کے سیکریٹری جنرل 2 روزہ دورے پر سیلاب سے متاثرہ علاقوں کا دورہ کرنے پہنچے ہیں، وہ اپنے دورے کے دوران وزیر اعظم شہباز شریف، وزیر خارجہ بلاول بھٹو اور حکومت کے دیگر رہنماؤں سے ملاقاتیں کریں گے۔

    انتونیو گوتریس نے عالمی برادری سے اپیل کرتے ہوئے کہا ہے کہ پاکستان کی بڑے پیمانے پر امداد کی جائے، انھوں ںے کہا میں تباہ کن سیلاب سے متاثر افراد سے اظہار یک جہتی کے لیے پاکستان پہنچا ہوں، پاکستان موسمیاتی تباہی سے نبرد آزما ہے۔

    واضح رہے کہ اقوام متحدہ کے سیکریٹری جنرل انتونیو گوتریس کی پاکستان سے محبت نئی نہیں ہے، انتونیو گوتریس اس سے قبل بھی متعدد بار پاکستان سے اپنی محبت کا اظہار کر چکے ہیں۔

    انتونیو گوتریس اس سے قبل 10 سال تک مہاجرین کے ہائی کمشنر بھی رہ چکے ہیں، یو این سیکرٹری جنرل نے ہمیشہ دہشت گردی کے خلاف پاکستان کی خدمات کو سراہا۔

    یواین قیادت نےعالمی سطح پر پاکستان کی پُرامن فوج کی کارکردگی کو بڑے پیمانے پر تسلیم کیا، اور امن مشنز میں پاکستانی خواتین کے نہایت متاثر کُن کردار کو ہمیشہ سراہا۔

    خیال رہے کہ پاکستان وہ واحد ملک ہے جس نے امن مشنر میں خواتین کی نمائندگی اور درجہ بندی پر خصوصی توجہ دی۔

  • پاکستان میں مزید بارشوں سے حالات بدترین ہونے کا خدشہ ، اقوام متحدہ نے خبردارکردیا

    پاکستان میں مزید بارشوں سے حالات بدترین ہونے کا خدشہ ، اقوام متحدہ نے خبردارکردیا

    اسلام آباد : اقوام متحدہ نے خبردار کیا ہے کہ پاکستان میں مزید بارش متوقع ہے ، جس سے حالات کے بدترین ہونے کا خدشہ ہے۔

    تفصیلات کے مطابق اقوام متحدہ کے ادارہ برائے مہاجرین یو این ایچ سی آر کی جانب سے بیان میں کہا گیا ہے کہ پاکستان میں آئندہ مہینوں میں مزید بارشیں ہونےکی توقع ہے، جس سے سیلاب متاثرین کی حالات مزید خراب ہوسکتی ہے۔

    نیشنل ڈیزاسٹر ایجنسی نے کہا کہ مون سون کی ریکارڈ بارشوں اور شمال میں گلیشیر پگھلنے سے آنے والے سیلاب نے 33 ملین افراد کو متاثر کیا اور کم از کم 1,325 افراد ہلاک ہوئے ہیں جن میں 466 بچے بھی شامل ہیں۔

    رپورٹ میں مزید کہا گیا کہ تقریباً 636,940 بے گھر افراد کو خیمہ بستیوں میں رکھا گیا ہے، پانی مکانات، سڑکیں، ریل اور ٹیلی کمیونیکیشن سسٹم کو بہا لے گیا اور ساتھ کھڑی اور ذخیرہ شدہ فصلیں تباہ ہو گئی ہیں۔

    اقوام متحدہ کے سیکریٹری جنرل انتونیو گوتیریس نو سے گیارہ ستمبر تک تین روزہ دورے پر پاکستان آئیں گے اور سیلاب سے ہونے والے نقصانات کا جائزہ لیں گے۔

    دورے کے موقع پر انتونیو گوتیریس وزیراعظم شہباز شریف، وزیر خارجہ بلاول بھٹو اور پی ڈی ایم کی زیر قیادت اتحادی حکومت کے دیگر رہنمائوں سے بھی ملاقات کریں گے۔

  • اقوام متحدہ کا طالبان عہدیداروں کے لیے سفری پابندی سے استثنیٰ کا خاتمہ

    اقوام متحدہ کا طالبان عہدیداروں کے لیے سفری پابندی سے استثنیٰ کا خاتمہ

    نیویارک: اقوام متحدہ نے 13 طالبان عہدیداروں کے لیے سفری پابندیوں سے استثنیٰ کا خاتمہ کردیا ہے، کسی رکن کی جانب سے اعتراض نہ ہونے پر یہ نافذ العمل ہوجائے گا۔

    بین الاقوامی ویب سائٹ کے مطابق اقوام متحدہ، طالبان کے 13 عہدیداروں کے لیے سفری پابندی سے استثنیٰ ختم کرنے کا ارادہ رکھتی ہے جب تک کہ سلامتی کونسل کے اراکین کی جانب سے اس حوالے سے ممکنہ توسیع کا معاہدہ نہیں ہو پاتا۔

    چین اور روس نے طالبان کے عہدیداروں کے لیے سفر کی پابندی سے استثنیٰ کی مدت میں توسیع کے لیے کہا ہے جبکہ ایسے طالبان رہنماؤں کی فہرست میں کمی کا مطالبہ کیا ہے جن کو استثنیٰ ہے۔

    امریکا نے یہ بھی کہا ہے کہ سفر کی پابندی سے مستثنیٰ طالبان رہنما کن مقامات پر جا سکتے ہیں، ان کی تعداد بھی کم اور مخصوص کی جائے۔

    اقوام متحدہ کی سلامتی کونسل کی 2011 کی قرارداد کے تحت 135 طالبان عہدیداروں پر پابندیاں عائد ہیں اور ان کے اثاثے بھی منجمد ہیں، تاہم ان میں سے 13 کو سفری پابندی سے استثنیٰ دیا گیا تاکہ وہ بیرون ملک دوسرے ممالک کے عہدیداروں سے مل سکیں۔

    رواں سال جون میں اقوام متحدہ کی سلامتی کونسل کی 15 رکنی کمیٹی نے طالبان کی جانب سے خواتین کے حقوق کو پامال کرنے پر کابل کے 2 وزرائے تعلیم کو استثنیٰ کی فہرست سے نکال دیا تھا۔

    سلامتی کونسل کی کمیٹی نے دیگر 13 طالبان عہدیداروں کے لیے سفری پابندی سے استثنیٰ کی مدت میں 19 اگست تک توسیع کی تھی جو ختم ہوگئی ہے۔

    اب اس پابندی سے استثنیٰ کی مدت میں مزید توسیع کی جانی ہے، سفارتی ذرائع کا کہنا ہے کہ کمیٹی میں شامل آئر لینڈ نے اس پر اعتراض کیا ہے۔

    سفارتی ذرائع کا کہنا ہے کہ سلامتی کونسل کی کمیٹی میں تازہ ترین تجویز یہ ہے کہ صرف 6 طالبان عہدیداروں کو سفارتی وجوہات کی بنا پر سفر کرنے کی اجازت دے جائے، اگر پیر کی سہ پہر تک کونسل کا کوئی رکن اس پر اعتراض نہیں کرتا تو یہ استثنیٰ تین ماہ کے لیے نافذ العمل ہو جائے گا۔

    جن 13 طالبان عہدیداروں کو سفر پر پابندی سے استثنیٰ حاصل تھا ان میں نائب وزیر اعظم عبد الغنی برادر اور نائب وزیر خارجہ شیر محمد عباس ستانکزئی بھی شامل ہیں۔

    ان دونوں عہدیداروں نے اس وقت کے صدر ڈونلڈ ٹرمپ کی امریکی حکومت کے ساتھ مذاکرات میں اہم کردار ادا کیا تھا جس کی وجہ سے سنہ 2020 میں افغانستان سے امریکا کے انخلا کی راہ ہموار ہوئی۔

  • اقوام متحدہ میں پاکستانی سفارتکار کا بھارت کو کرارا جواب

    اقوام متحدہ میں پاکستانی سفارتکار کا بھارت کو کرارا جواب

    نیویارک : پاکستانی سفارتکار اقوام متحدہ میں بھارتی مندوب کی تقریر پر کرارا جواب دیتے ہوئے کہا بھارت پاکستان میں دہشت گرد تنظیموں کا سہولت کار ہے۔

    تفصیلات کے مطابق پاکستان نے اقوام متحدہ کی سلامتی کونسل میں بھارت کا گھناؤنا کردار بے نقاب کردیا۔

    پاکستانی سفارتکار محمد راشد نے بھارتی مندوب کی تقریر پر کرارا جواب دیتے ہوئے کہا بھارت نے آج تک سلامتی کونسل کی قراردادوں پرعمل نہیں کیا۔

    پاکستانی سفارتکار کا کہنا تھا کہ بھارت نے مقبوضہ کشمیر میں ریاستی دہشتگردی جاری رکھی ہوئی ہے، جموں وکشمیر بھارت کا کبھی حصہ نہیں رہا، یہ متنازع خطہ ہے اور بھارت مقبوضہ کشمیر پر اقوام متحدہ کی قراردادوں پر عملدرآمد کا پابند ہے۔

    محمد راشد نے کہا کہ پاکستان میں دہشت گرد حملوں کے پیچھے ٹی ٹی پی اور بی ایل اے ملوث ہیں اور بھارت پاکستان میں دہشت گرد تنظیموں کا سہولت کار ہے۔

    پاکستانی سفارتکار نے مزید بتایا کہ آرمی پبلک اسکول پر حملے میں بھارتی ایجنسیوں کے ملوث ہونے کے ثبوت موجود ہیں۔

  • آزادی مارچ کے شرکاء پر حکومت کا کریک ڈاؤن، پی ٹی آئی نے شواہد اقوام متحدہ کو بجھوادیے

    آزادی مارچ کے شرکاء پر حکومت کا کریک ڈاؤن، پی ٹی آئی نے شواہد اقوام متحدہ کو بجھوادیے

    اسلام آباد : تحریک انصاف نے حقیقی آزادی مارچ کے دوران چادر اور چار دیواری کی پامالی اور تشدد کے شواہد اقوام متحدہ کے متعلقہ ذمہ داران کو بھجوادیئے۔

    تفصیلات کے مطابق آزادی مارچ کے شرکا پر حکومت کے کریک ڈاؤن اور انسانی حقوق کی خلاف ورزی پر تحریک انصاف نےاقوام متحدہ کے متعلقہ ذمہ داران کو خصوصی مراسلے ارسال کر دیئے۔

    پی ٹی آئی کی جانب سے حقیقی آزادی مارچ کے دوران چادر اور چار دیواری کی پامالی اور تشدد کے شواہد سمیت آنسوگیس کے پر امن شہریوں پر استعمال کی تفصیلات بھی بجھوادی گئی ہے۔

    اقوام متحدہ کے ہائی کمشنر برائےانسانی حقوق کو بھی مراسلہ اور شواہد ارسال کیا گیا ، خطوط سابق وفاقی وزیراورکورکمیٹی رکن ڈاکٹر شیریں مزاریں کی جانب سے بجھوائے گئے۔

    ڈاکٹرشیریں مزاری نے کہا کہ عمران خان کی حکومت ہٹانے کے بعد پاکستان سیاسی بحران کاشکار ہوا، منی لانڈرنگ کےمقدمات میں ملوث سیاستدان کواقتدارمیں لایاگیا، اس سازش پر عوام نے شدید ردعمل کا اظہار کیا۔

    رہنما پی ٹی آئی کا کہنا تھا کہ عمران خان کی جماعت نے ملک بھر میں بڑےجلسے منعقد کئے، وفاقی حکومت نےکارکنان اوررہنماؤں کے خلاف کریک ڈاؤن کیا، عدم گرفتاری کی صورت میں خواتین کودھمکایاگیااورہراساں کیا گیا۔

    انھوں نے مزید کہا کہ پنجاب،سندھ اور اسلام آباد میں شہریوں پر طاقت کا استعمال کیا گیا، قانون نافذ کرنے والے ادروں نے آنسو گیس کا استعمال کیا، کارکنان و قائدین کی فوری رہائی کا مطالبہ کیا جائے۔