نیویارک : عاصم افتخار احمد نے اقوام متحدہ میں پاکستان کے مستقل مندوب کا منصب سنبھال لیا اور یو این منشور، کثیرالجہتی سفارتکاری کیلئے پاکستان کے غیرمتزلزل عزم کا اعادہ کیا۔

تفصیلات کے مطابق عاصم افتخار احمد نے اقوام متحدہ میں پاکستان کے مستقل مندوب کامنصب سنبھال لیا، انہوں نے اقوام متحدہ کے سیکریٹری جنرل انتونیو گوتریس کو اپنی اسناد پیش کیں۔

جس کے بعد سیکریٹری جنرل انتونیو گوتریس نے عاصم افتخار کو منصب سنبھالنے پر مبارکباد دی۔

عاصم افتخار نے یو این منشور، کثیرالجہتی سفارتکاری کیلئے پاکستان کے غیرمتزلزل عزم کا اعادہ کیا، انھوں نے منیر اکرم کی مدت پوری ہونے پر پاکستان کے مستقل مندوب کا منصب سنبھالا ہے۔

دوسری جانب نیویارک میں پاکستانی مندوب منیر اکرم کے اعزاز میں الوداعی تقریب اہتمام کیا گیا۔

اےآر وائی ڈیجیٹل نیٹ ورک کے تحت تقریب میں اقوام متحدہ میں نئے پاکستانی مندوب بھی شریک ہوئے جبکہ امریکا میں مقیم پاکستانی صحافیوں کیساتھ نیویارک میں پاکستانی کمیونٹی کے افراد نے بھی تقریب میں شرکت کی۔

تقریب میں منیراکرم کو پاکستان کیلئے کئی دہائیوں پر مبنی شاندار خدمات پر خراج تحسین پیش کیا گیا۔ مقررین نے عاصم افتخار کیلئے پاکستانی مندوب کا منصب سنبھالنے پر نیک خواہشات کا اظہار کیا، تقریب میں ڈی پی آر عثمان جدون اور قونصل جنرل عامر احمد اتوزئی بھی موجود تھے۔

اسلام آباد: دفتر خارجہ کے ترجمان نے کہا ہے کہ پاکستان نے اقوام متحدہ کے انسانی حقوق کے ادارے کے ریمارکس کا نوٹس لیا ہے، احتجاج کرنے والے عام مظاہرین نہیں بلکہ دہشت گرد تنظیموں کے کارکن تھے۔

ترجمان نے آج جمعرات کو بریفنگ میں کہا کہ احتجاج کرنے والوں کی دہشت گردی کا بڑا ثبوت سول اسپتال کوئٹہ پر حملہ، اور دہشت گردوں کی لاشوں پر قبضہ ہے، یو این ادارے کی پریس ریلیز دہشت گردی کے خلاف سپورٹ کے برعکس، دہشت گردوں کو تقویت دیتی ہے۔

ترجمان نے کہا حکومت اپنے شہریوں کے جان و مال کے تحفظ کی پابند ہے، مذہبی، نسلی پس منظر سے قطع نظر حکومت شہریوں کے تحفظ کے لیے پرعزم ہے، اور دہشت گردوں اور ان کے ہمدردوں کے لیے کوئی رعایت نہیں۔

ترجمان نے بتایا کہ نائب وزیر اعظم کی ہدایت پر نمائندہ خصوصی محمد صادق نے کابل کا دورہ کیا، 21 مارچ کو محمد صادق کی افغان عبوری وزیر خارجہ و وزیر تجارت سے ملاقات ہوئی، پاکستان اور افغانستان نے اعلیٰ سطح پر رابطے برقرار رکھنے پر اتفاق کیا، پاکستان اور افغانستان کے درمیان سفارتی ذرائع سمیت کئی سطح پر جامع بات چیت ہوئی ہے، امریکا یا کسی بھی ملک کے ساتھ تعلقات افغانستان کا اپنا معاملہ ہے، بگرام ایئر بیس کے حوالے سے اطلاعات محض قیاس آرائیاں ہیں۔

گوادر : کوسٹل ہائی وے پر مسلح افراد نے 6 مسافروں کو قتل کردیا

دفتر خارجہ کے ترجمان نے کہا پاکستان روس اور یوکرین کے درمیان محدود جنگ بندی کا خیر مقدم کرتا ہے، امید ہے موجودہ اقدامات سے مستقل اور پائیدار جنگ بندی کی راہ ہموار ہوگی، ترجمان نے کہا پاکستان مقبوضہ کشمیر میں حریت قیادت کے گھروں پر چھاپوں کی شدید مذمت کرتا ہے۔

ترجمان نے کہا پاکستان امریکی ایوان نمائندگان میں متعارف بل سے آگاہ ہے، پاکستان آزادی اظہار، انسانی حقوق اور آئین پر عمل درآمد کرتا ہے، ایوان نمائندگان میں آنے والا بل ایک رکن کا بل ہے جسے ابھی کئی مراحل سے گزرنا ہے، پاکستان سمجھتا ہے کہ مجوزہ بل امریکی انتظامیہ کی پالیسی نہیں ہے۔

ترجمان نے کہا حکومت پاکستانی صحافیوں کے دورہ اسرائیل کی اطلاعات سے آگاہ ہے، پاکستان کا پاسپورٹ اسرائیل کے لیے کارآمد ہے نہ پاکستان اسرائیل کو تسلیم کرتا ہے، دہری شہریت کے حامل شہری کسی دوسرے پاسپورٹ پر سفر کر سکتے ہیں، تکنیکی طور پر پاکستانی پاسپورٹ پر اسرائیل کا سفر ممکن نہیں۔

نیویارک : پاکستان نے اقوام متحدہ میں بھارتی مندوب کو کرارا جواب دیتے ہوئے کہا کہ جموں وکشمیر بھارت کا نام نہاد’’اٹوٹ انگ‘‘ نہیں اور نہ کبھی تھا۔

تفصیلات کے مطابق پاکستان کے مستقل مشن کے قونصلر گل قیصر سروانی نے سلامتی کونسل کے اجلاس میں بھارتی مندوب کو جواب دیتے ہوئے کہا کہ جموں و کشمیربھارت کا نام نہاد ’’اٹوٹ انگ‘‘ہے اور نہ کبھی تھا۔

گل قیصر سروانی کا کہنا تھا کہ جموں و کشمیر ایک متنازعہ علاقہ ہے، کوئی بھی ابہام قانونی، سیاسی اور تاریخی حقیقت کو نہیں بدل سکتا۔

پاکستانی قونصلر نے کہا کہ اقوام متحدہ کی متعدد قراردادوں میں کشمیری عوام سے وعدہ کیا گیا ہے اور ’’حتمی فیصلہ‘‘ کشمیری عوام نے یو این نگرانی میں استصوابِ رائے سے کرنا ہے۔

انھوں نے زور دیا کہ کشمیرکی متنازعہ حیثیت اقوام متحدہ اور عالمی برادری دونوں تسلیم کرتے ہیں، بھارت کشمیری عوام کے حق خودارادیت کو یقینی بنائے۔

پاکستانی قونصلر کا مزید کہنا تھا کہ بھارت نے مقبوضہ کشمیر میں تاریخ کی سنگین فوجی جارحیت مسلط کر رکھی ہے، مقبوضہ وادی میں ہر آٹھ کشمیری پر ایک بھارتی فوجی مسلط ہے اور بھارت مقبوضہ کشمیر میں ریاستی دہشت گردی کی بدترین شکل میں ملوث ہے

نیویارک: اقوام متحدہ میں پاکستان نے یمن کیلئے مذاکرات اور فوری انسانی امداد پر زور دیتے ہوئے کہا کہ تنازع سنگین بحران کو جنم دے رہا ہے۔

تفصیلات کے مطابق اقوام متحدہ کی سلامتی کونسل میں یمن سےمتعلق بریفنگ دیتے ہوئے پاکستان کےمستقل مندوب منیراکرم نے یمن میں بگڑتی صورتحال پر تشویش کا اظہارکرتے ہوئے یمن کیلئے مذاکرات اور فوری انسانی امداد پر زور دیا۔

انہوں نے کہا یمن تنازع سنگین انسانی، سیاسی، اقتصادی اور ماحولیاتی بحران کو جنم دے رہا ہے، فریقین امن معاہدوں پر مکمل عمل درآمد یقینی بنائیںَ

پاکستان کےمستقل مندوب نے بتایا کہ یمن کوفی الوقت 1.95 کروڑ افراد کو فوری انسانی امداد کی ضرورت ہے 1.71 کروڑ افراد غذائی عدم تحفظ کا شکار ہیں اور ایک کروڑ سے زائد بچے یمن میں بنیادی ضرورت سے محروم ہیں۔

غزہ کے حوالے سے ان کا کہنا تھا کہ غزہ میں جنگ بندی معاہدے پر مکمل عملدرآمد اور تحفظ ضروری ہے، غزہ میں مستقل جنگ بندی سے خطے میں استحکام آئے گا۔