اسلام آباد: حکومت نے الطاف حسین کے خلاف قانونی ریفرنس تیار کر لیا ہے۔
قومی اداروں کے خلاف ہرزہ سرائی اور اشتعال انگیز تقاریر الطاف حسین کو مہنگی پڑگئیں، حکومت نے ایم کیو ایم کے قائد کے خلاف قانونی کارروائی کا آغاز کردیا ہے، وزارت داخلہ کے ذرائع کے مطابق الطاف حسین کے خلاف قانونی ریفرنس تیار کرلیا گیا ہے، جو وزیرِاعظم نواز شریف کی منظوری کے بعد برطانوی حکومت کو بھجوایا جائے گا۔
چند روز قبل وزیرِ داخلہ چوہدری نثار نے اپنی پریس کانفرنس میں ریفرنس بھیجنے کا اعلان کیا تھا، ذرائع کے مطابق قانونی ریفرنس میں الطاف حسین کے خلاف پاک فوج کو دھمکیاں دینےاور ان کےخلاف نازیبا زبان استعمال کرنے سمیت پاکستان کےخلاف را سے مدد مانگنے سے متعلق نکات شامل ہیں۔
گزشتہ روز کراچی کی انسدادِ دہشتگردی کی عدالت نے الطاف حسین کے خلاف نا قابل ضمانت وارنٹ گرفتاری جاری کر دیئے، وارنٹ نے کرنل طاہردھمکی کیس میں جاری کئے گئے، عدالت نےالطاف حسین کو بیس اگست تک پیش کرنے کا حکم جاری کیا ۔
