لاہور : وفاقی وزیر برائے اطلاعات پرویز رشید نے کہا ہے کہ زید حامد پاکستان کی بدنامی کا باعث بن رہے ہیں،ان کا کہنا ہےکہ الطاف حسین برطانوی شہری ہیں۔
ایم کیو ایم کو بھارتی فنڈنگ پر برطانیہ سے ثبوت مانگے ہیں، را کے سابق سربراہ کے بیان پر فی الوقت کچھ نہیں کہ سکتے۔
ان خیالات کا اظہار انہوں نے لاہور میں افطار ڈنر کے موقع پر میڈیا سے گفتگو کرتے ہوئے کیا، وفاقی وزیر اطلاعات و نشریات کا کہنا تھا کہ وہ را کے سابق سربراہ کے بیان پر تو کچھ نہیں کہیں گے لیکن بھارت سے متحدہ کو ملنے والی مبینہ فنڈنگ پر برطانیہ سے ثبوت مانگ لئے ہیں۔
پرویز رشید کا کہنا تھا کہ جوڈیشل کمیشن کے فیصلے پر تو وہ تبصرہ نہیں کریں گے لیکن عمران خان کو اپنے قریبی دوستوں سے محتاط رہنے کی درخواست ضرور کریں گے۔
انہوں نے اس موقع پرمذہبی اسکالر زید حامد کو بھی آڑے ہاتھوں لیتے ہوئے کہا کہ وہ پاکستان کی بدنامی کا باعث بنے جبکہ انہوں نے ڈاکٹر طاہر القادری کو اعتکاف کے دوران قوم کو دعائیں دینے کا مشورہ دیا۔
وفاقی وزیر کا کہنا تھا کہ بلدیاتی انتخابات کے پیش نظر کارکن اور رہنما سیاسی جماعتیں تبدیل کر رہے ہیں۔ جلسوں کا وقت نکل گیا اب عوامی مسائل حل کرنے کیلئے کارکردگی دکھانے کی ضرورت ہے۔
