Tag: الطاف حسین

لندن : متحدہ قومی موومنٹ کے قائد الطاف حسین نے کہا ہے کہ طاقت کے استعمال سے ایم کیوایم کو نہیں روکا جا سکتا، کراچی کے عوام مقبوضہ کشمیر کے عوام نہیں ہیں، انتخابی عمل کےدوران بہت سے چیزیں آئین کےخلاف ہورہی ہیں۔

جناح گراوٴنڈعزیزآبادمیں ایم کیوایم کے مرکزی الیکشن سیل میں ایم کیوایم کے ذمہ داروں ،کارکنوں اورہمدردوں سے ٹیلی فون پر خطاب کرتے ہوئے الطاف حسین نے کہا کہ ضمنی الیکشن میں ایم کیوایم کی کامیابی کے حوالہ سے ہم پراعتماد ہیں، اگر قانون نافذ کرنے والے اداروں اور انتظامیہ کی جانب سے عوام کو حق رائے دہی کے استعمال میں تاخیری حربے استعمال نہ کیے گئے تو انشاء اللہ ایم کیوایم کے نامزد امیدوار بھاری اکثریت سے کامیاب ہوگا اور ایم کیوایم ماضی کے ریکارڈ توڑ دے گی۔

قائد الطاف حسین نے کارکنان سے خطاب کرتے ہوئے کہا کہ غصہ دلانے کیلئے حرکتیں کی جارہی ہیں لیکن میں غصےمیں آنیوالا نہیں، روح سے روح اور دل سے دل کا رشتہ ہوتا ہے، میں لوگوں کے دلوں میں رہتا ہوں اور طاقت کا ناجائز استعمال کرکے عوام کے دلوں سے میری محبت ختم نہیں کی جاسکتی اورنہ ہی لوگوں کو خوف زدہ کیاجاسکتا ہے۔

 انہوں نے کہا کہ میڈیا کھل کر بتا رہا ہے کہ ضمنی الیکشن کے دوران رینجرز کی جانب سے آئین اور قانون شکنی کی گئی، رینجرز اہلکاروں کی جانب سے عوام سے یہ پوچھا جارہا ہے کہ وہ کس کو ووٹ دیں گے جوکہ قطعی نا قابل قبول ہے۔

انہوں نے کہا کہ کراچی کے شہری مفتوح عوام نہیں ہیں،عوام کے خلاف طاقت کا ناجائز استعمال کرکے یا انہیں خوف زدہ کرکے لوگوں کے دلوں کو تسخیرنہیں کیاجاسکتا۔

انہوں نے کہاکہ اللہ تعالیٰ کاکرم ، ماوٴں ، بہنوں ، بزرگوں کی دعائیں اور شہیدوں کی قربانیوں کی بدولت چاروں جانب سے ایم کیوایم کے خلاف کی جانے والی سازشیں ناکام ثابت ہوئیں ۔

ایم کیوایم کے ہمدرد عوام کو زندہ لاشیں کہا گیا لیکن آج 90 سے 95 سال کے بزرگوں اور بزرگ خواتین نے اپنے بچوں کی گود میں پولنگ اسٹیشن آکر ایم کیوایم کے حق میں اپنا ووٹ کاسٹ کیا جس پر اللہ تعالیٰ کا جتنا بھی شکر ادا کیاجائے کم ہے۔

انہوں نے کہاکہ بعض چیزوں کی تعریف کیلئے لغت میں الفاظ نہیں ملتے اور تعریفی الفاظ کم پڑ جاتے ہیں، قومی اسمبلی کے حلقہ این اے 246 کے ضمنی الیکشن کے دوران عوام بالخصوص خواتین نے تمام ترمشکلات کے باوجود جو جراتمندانہ کردارادا کیا ہے اس کی مثال نہیں ملتی ۔ اتنے بہادر بزرگ،مائیں ،بہنیں اور ساتھی ایم کیوایم کے سوا کسی جماعت میں نہیں ہیں۔

الطاف حسین نے محنت ولگن سے دن رات کام کرنے پر ایم کیوایم کے تمام ذمہ داروں ، منتخب نمائندوں ، کارکنوں اور ہمدرد عوام کو دل کی گہرائیوں سے زبردست خراج تحسین پیش کرتے ہوئے کہا کہ میں آپ سب کو گلے لگا کر آپکے ماتھوں پر ہزاروں بوسے دے رہا ہوں اور سب کو شاباش پیش کررہا ہوں، الطاف حسین نے ایماندارانہ رپورٹنگ پر میڈیا کے نمائندوں کو بھی خراج تحسین پیش کیا۔