رانا ثنااللہ نے کہا ہے کہ العزیزیہ کیس میں جوفیصلہ ہواتھااس کی کوئی میرٹ نہیں تھی، ہمیں صرف امید نہیں یقین بھی ہے نوازشریف بےگناہ ہیں۔
تفصیلات کے مطابق سابق وزیر داخلہ رانا ثنااللہ کا کہنا ہے کہ جج ارشد ملک نے ویڈیو میں خود کہا کہ مجھے دباؤ میں سزا سنانا پڑ رہی ہے۔ العزیزیہ سے متعلق نوازشریف کی کہیں مداخلت ہے ہی نہیں۔ پیسہ کہاں سے آیا ہے کس نے بھیجا ہے وہ اس کا جوابدہ ہونا چاہیے۔
مسلم لیگ ن کے سینئر رہنما نے کہا کہ پیسہ درست آیا ہے یا غلط آیا ہے جس نے کام کیا اس کو جواب دینا چاہیے۔ نیب کا کام ہے کہ تحقیقات کرے تیسرا شخص کیسے اس کا جوابدہ ہو سکتا ہے۔
رانا ثنااللہ کا کہنا تھا کہ پیسوں کے آنے اور ملز کے لگنے سے نواز شریف کا تعلق ہی نہیں بنتا۔ فیصلہ عدالت نے کرنا ہے پوری امید ہے ہمیں انصاف ملے گا۔
انھوں نے کہا کہ نیب کے وکلا کے پاس کوئی مواد نہیں ہے جس پر وہ بحث کرینگے۔ میں تو سمجھتا ہوں 12 تاریخ کو العزیزیہ کیس کا فیصلہ آجانا چاہیے۔
رانا ثنااللہ نے کہا کہ ہمارے پاس ہر حلقے میں 13، 13 امیدواروں کی درخواستیں آئی ہیں۔ دیہی علاقوں میں ن لیگ کی پوزیشن بہت مضبوط ہے۔ شہری علاقوں میں سوشل میڈیا وبال ہے لیکن ن لیگ کامیاب ہوگی۔
سابق وزیر داخلہ نے کہا کہ انتخابی مہم جیسے ہی شروع ہوگی ن لیگ کی مقبولیت نظر آئے گی۔ پی ٹی آئی کے نمائندے بالکل ڈور ٹو ڈور انتخابی مہم چلائیں۔
انھوں نے کہا کہ پی ٹی آئی کے پاس بلے کا انتخابی نشان رہنے دیں کوئی فرق نہیں پڑیگا۔ 10 دن کی انتخابی مہم کے بعد ساری صورتحال واضح ہوجائے گی۔
