Tag: الٹرا پروسیسڈ

دور حاضر میں لوگ وقت کی بچت کیلئے بازاری کھانوں پر زیادہ انحصار کرنے لگے ہیں جس کیلئے جنک فوڈ یا فاسٹ فوڈ منگوانے کے آرڈرز فون کال پر دینا اب عام سی بات ہوگئی اسی مناسبت سے اس کے نقصانات بھی سامنے آرہے ہیں۔

لیکن کیا آپ جانتے ہیں کہ جنک فوڈ یا الٹرا پروسیسڈ فوڈ کا زیادہ استعمال صحت کے لیے کتنا خطرناک ہے؟ فاسٹ فوڈ ہمارے مدافعتی نظام کو کمزور کر دیتا ہے، اس کے مضر اثرات ہارمونز کی تبدیلی کا بھی باعث بنتے ہیں۔

مدافعتی کمزوری کے سبب ہر وقت تھکاوٹ، سستی اور طبیعت بوجھل محسوس ہوتی ہے اور آپ اپنے دن بھر کے کام احسن طر یقے سے انجام نہیں دے پاتے۔

تاہم ایک نئی تحقیق میں فاسٹ فوڈز  کے مزید نقصانات کا احاطہ کیا گیا ہے جس کے مطابق ان غذاؤں کا استعمال 30 سے ​​زائد دماغی اور جسمانی امراض کے خطرے سے منسلک ہے۔

الٹرا پروسیسڈ فوڈزکے مزیدار ذائقے اور آسان حصول جس میں پیک شدہ بیکڈ اشیا اور اسنیکس، میٹھے، کاربونیٹیڈ مشروبات، کینڈی، میٹھے اناج اور کھانے کے لیے تیار مصنوعات شامل ہیں نے صحت بخش غذا کو کہیں پیچھے چھوڑ دیا ہے۔

ویسے تو لوگوں کی بڑی تعداد یو پی ایف کے زائد استعمال سے منسلک صحت کے خطرات سے بخوبی واقف ہیں، لیکن شاید آپ اس بات کو نہیں جانتے کہ یہ فاسٹ فوڈز آپ کی سوچ سے بھی کہیں زیادہ صحت کیلئے نقصان دہ ہیں۔

محققین نے الٹرا پروسیسڈ فوڈ (یو پی ایف) کے نقصانات کو جاننے کے لیے ماضی میں کیے جانے والے 45 الگ الگ مطالعات سے ڈیٹا اکٹھا کرکے ان کا تجزیہ کیا جسے ’امبریلا ریویوایویڈینس‘ کا نام دیا گیا۔

اس جائزے میں شامل شرکاء کی کل تعداد 10 ملین کے قریب تھی تمام میٹا تجزیہ پچھلے تین سالوں میں شائع کیے گئے تھے اور کسی کو بھی یو پی ایف تیار کرنے والی کمپنیوں کی طرف سے فنڈ نہیں دیا گیا تھا۔

محققین کے مطابق ان اعداد و شمار سے یہ بات سامنے آئی کہ یو پی ایف کا زیادہ استعمال 32 امراض کے خطرے سے منسلک تھا جس میں اموات، کینسر، دماغی، سانس سے متعلق، قلبی، معدے اور میٹابولک مسائل شامل تھے۔

الٹرا پروسیسڈ فوڈ کا زیادہ استعمال امراض قلب سے ہونے والی اموات کے تقریباً 50 فیصد بڑھتے ہوئے خطرے سے منسلک تھا، اسی طرح اضطراب اور عام دماغی صحت کے امراض کا خطرہ 48 سے 53 فیصد اور ٹائپ 2 ذیابیطس کا خطرہ 12 فیصد زیادہ تھا۔

اسی طرح یو پی ایف کی زیادہ مقدار کسی بھی وجہ سے موت کا خطرہ 21 فیصد بڑھا دیتی ہے، جس میں امراض قلب سے موت کا خطرہ 40 سے 66 فیصد، موٹاپا، ٹائپ 2 ذیابیطس، اور کم نیند کا خطرہ 22 فیصد بڑھ جاتا ہے۔ اس کے ساتھ ہی دمہ، معدے کی صحت، کینسر کی کچھ اقسام اور کارڈیو میٹابولک خطرے والے عوامل جیسے کہ خون میں چکنائی کا بڑھ جانا اور اچھے’ کولیسٹرول کی کم سطح سے وابستہ امراض کے ثبوت محدود تھے۔

اس تحقیق اور اس کے نتائج نے الٹرا پروسیسڈ فوڈ کے نقصانات سے آگاہی میں ایک اہم کردار ادا کیا ہے جس بعد لوگوں کی بڑی تعداد ان غذاؤں کو ترک یا محدود کرنے کے بارے کافی فکر مند دکھائی دے رہی ہے اور اسی طرح صحت بخش غذاؤں کی جانب راغب ہورہی ہیں۔