Tag: الیونتھ آور

کراچی: وفاقی وزیر سائنس اینڈ ٹیکنالوجی فواد چوہدری کے انٹرویو پر پی ٹی آئی اور پیپلز پارٹی کے اراکین اسمبلی کا ملا جلا ردِ عمل سامنے آیا ہے۔

اے آر وائی نیوز کے پروگرام الیونتھ آور میں گفتگو کرتے ہوئے پی ٹی آئی خاتون رہنما عندلیب عباس نے کہا کہ فواد چوہدری نے انٹرویو کے شروع ہی میں کہہ دیا تھا کہ یہ میرا تجزیہ ہے، ضروری نہیں انھوں نے جو باتیں کیں وہ سب ٹھیک ہوں۔

عندلیب عباس کا کہنا تھا عثمان بزدار کی طرح پرویز خٹک پر بھی سب تنقید کرتے تھے، لیکن پرویز خٹک نے کے پی میں دوبارہ انتخاب کرایا اور زیادہ ووٹ ملے، ایک وقت آئے گا عثمان بزدار کی بھی تعریفیں کی جائیں گی، کے پی میں ہم نے چوتھے سال پولیس اور تعلیمی اصلاحات کی تھیں، وفاق میں ہم نے ابھی 2 سال گزارے ہیں۔

پی پی کے رہنما اور صوبائی وزیر سندھ ناصر حسین شاہ نے پروگرام میں کہا فواد چوہدری ہمیشہ سے اس قسم کی باتیں کرتے آئے ہیں، ان کی کچھ باتوں میں حقیقت بھی ہے، پی ٹی آئی کی پرفارمنس سب نے دیکھ لی ہے۔

گزشتہ روز پی ٹی آئی کے وفاقی وزیر آبی وسائل فیصل واوڈا نے کہا تھا کہ فواد چوہدری کا 6 ماہ کا بیان مس کوٹ کیا گیا، اس کا حکومت کے جانے سے کوئی تعلق نہیں، حکومت کہیں نہیں جا رہی، 6 ماہ کی بات کنسٹرکشن صنعت سے متعلق تھی۔

سینیٹر فیصل جاوید نے کہا تھا فواد چوہدری نے کہا تھا کہ یہ میرا تجزیہ ہے اور غلط بھی ہو سکتا ہے، جو واقعی غلط تھا، پوری پارٹی عمران خان کی قیادت میں متحد ہے، پارٹی میں کوئی اختلاف رائے رکھتا ہو تو اظہار اندرونی طور پر ہونا چاہیے، تمام لوگ عمران خان کے ووٹ بینک پر آئے ہیں، عوام نے ووٹ عمران خان کے نظریے پر دیے۔

اسلام آباد: وزیر خارجہ شاہ محمود قریشی کا کہنا ہے کہ ملک میں کرونا کا عروج مئی کے آخر یا جون کے شروع میں ہوگا۔

تفصیلات کے مطابق وزیر خارجہ شاہ محمود قریشی نے اے آر وائی نیوز کے پروگرام ’الیونتھ آور‘ میں گفتگو کرتے ہوئے کہا کہ کرونا وائرس کے باعث مسلسل لاک ڈاؤن رہتا ہے تو اس کے بھی نقصانات ہیں، لاک ڈاؤن کے سبب کاروباری طبقہ، سفید پوش طبقہ پریشان ہے۔

انہوں نے کہا کہ ملک میں وینٹی لیٹرز پر مریضوں کی تعداد کم ہے، اسپتالوں میں تیاری ہے ہمیں لوگوں کے مسائل بھی دیکھنے ہیں، اللہ نہ کرے اگر صورتحال خطرناک ہوتی ہے تو ہمیں بندوبست کرنا ہوگا، پی پی ایز، ٹیسٹنگ میں اضافہ کیا ہے، قرنطینہ سہولت کو بڑھا دیا ہے، ہم نے رضاکار فورس بھی تیار کرلی، معاشی مسائل بھی دیکھنے ہیں۔

وزیر خارجہ نے کہا کہ ہمارے پاس دس لاکھ تک رضاکاروں نے خود کو رجسٹرڈ کیا ہے، ہمارے مخالفین کو خدشہ تھا ٹائیگر فورس سیاسی ہے جو بالکل غلط ہے، ضلعی سطح پر کمیٹیاں بنائی ہیں اور سرکاری افسران کو سربراہ رکھا ہے، ٹائیگر فورس سے متعلق کمیٹیوں میں سب جماعتوں کو شمولیت دی ہے، ہم دعوت دے رہے ہیں آئیں ہمارے ساتھ چلیں اور قومی فریضہ پورا کریں۔

ایک سوال کے جواب میں شاہ محمود قریشی نے کہا کہ سندھ جانے کے لیے وزیراعظم عمران خان ہروقت تیار ہیں، وہ ضرور سندھ جائیں گے اس میں کوئی قباحت نہیں تاہم سندھ حکومت نے جو زبان استعمال کی اور رویہ اپنایا وہ دوستانہ نہیں۔

اٹھارویں ترمیم کے حوالے سے ان کا کہنا تھا کہ ہم نے کئی بار کہا اٹھارویں ترمیم کے تحت سندھ حکومت مکمل بااختیار ہے، اٹھارویں ترمیم ایک بہت بڑی پیشرفت تھی آج بھی سراہتا ہوں، ترمیم کو دس سال ہوگئے ہیں ہمیں ان تجربات کا جائزہ لینا چاہئے، اٹھارویں ترمیم کو کوئی نہیں چھیڑ رہا، اس میں بہتری کی گنجائش ہے تو اچھی بات ہے، اس کو بلڈوز کرنے کا کوئی ارادہ نہیں۔

شاہ محمود قریشی نے کہا کہ ن لیگ اور پی پی کی 10 سال حکومت رہی نیب قوانین پر غور کیوں نہیں کیا، نیب قوانین سے متعلق اپوزیشن آئے اور بات کرے، ایک طبقہ چاہتا ہے نیب کا ادارہ بالکل کمزور اور بے اختیار ہوجائے، ایک طبقہ نیب کو اینٹی کرپشن جیسا ادارہ بنانا چاہتا ہے، بلاول اور شہباز شریف کے پاس ٹھوس تجاویز ہیں تو آئیں بات کریں، این آر او کی تلاش میں نہ جائیں ٹھوس بات کریں۔

کراچی: وفاقی وزیر برائے آبی وسائل فیصل واوڈا نے کہا ہے کہ ہم سندھ حکومت کے ساتھ کھڑے ہیں، تنقید صرف ان کی مدد کے لیے کر رہے ہیں۔

اے آر وائی نیوز کے پروگرام الیونتھ آور میں گزشتہ رات گفتگو کرتے ہوئے فیصل واوڈا نے کہا کہ اندرون سندھ کرونا وائرس کے درجنوں مریض ہیں، سندھ حکومت سے درخواست ہے ان مریضوں پر توجہ دیں۔

وفاقی وزیر کا کہنا تھا ہم ساتھ چلتے ہیں یہ وقت ایک دوسرے پر تنقید کا نہیں ہے، ہم تنقید صرف ایک دوسرے کی مدد کے لیے کر رہے ہیں، سب متحد ہیں، سوالوں کا جواب ہمیں بھی اور اپوزیشن کو بھی دینا ہوگا۔ چیف جسٹس پاکستان نے جو کچھ کہا ہے اس کا خیر مقدم کرتے ہیں۔

پروگرام سے گفتگو کرتے ہوئے وزیر تعلیم سندھ سعید غنی نے کہا کہ فیصل واوڈا گزشتہ ڈیڑھ ماہ سے غائب تھے اب اچانک سامنے آ گئے، ان کو جس نے بھی معلومات دیں انتہائی غلط دی ہیں، سندھ حکومت کو پرائیویٹ لوگوں نے 15 کروڑ روپے کے فنڈز دیے، راشن کی تقسیم کے لیے ہم نے مجموعی 1 ارب 8 کروڑ ریلیز کیے، سندھ کی ہر یو سی میں 7 لوگوں کی ایک ایک کمیٹی بنائی گئی ہے۔

کتنا راشن کس کو دیا؟سپریم کورٹ کا سندھ حکومت سے جواب طلب

انھوں نے بتایا کہ صوبے میں فلاحی کام کرنے والے اداروں کو ایک ایپ کے ذریعے جوڑا گیا ہے، میں اس بات کا چیلنج قبول کرتا ہوں کہ ہم 6 لاکھ خاندانوں کو زکواۃ کی مد میں رقم دے چکے ہیں، ایک ایک آدمی کا شناختی کارڈ نمبر وفاقی وزیر فیصل واوڈا کو بھیجتا ہوں۔

کراچی: ممتاز عالم دین مفتی تقی عثمانی نے کہا ہے کہ کرونا وائرس کے پیش نظر حکومت نے جو ہدایت کردی ہم اس کے پابند ہیں۔

تفصیلات کے مطابق ممتاز عالم دین مفتی تقی عثمانی نے پروگرام ’الیونتھ آور‘ میں گفتگو کرتے ہوئے کہا کہ کرونا وائرس کے سبب حکومت نے جو ہدایات دی ہیں عوام کو اس پر عمل کرنا چاہئے۔

مفتی تقی عثمانی نے کہا کہ نماز جمعہ کے اجتماعات پر پابندی کا فیصلہ سندھ حکومت نے طبی ماہرین کی رائے میں کیا ہے، تمام ساتھیوں سے کہیں گے حکومت سندھ کے فیصلے پر عمل کریں۔

انہوں نے کہا کہ معاشرے میں برائیاں بڑھ گئی ہیں، اللہ کی آزمائش جاری ہے، ہمیں اپنی برائیوں اور کوتاہیوں پر اللہ سے معافی مانگنی چاہئے، اللہ ہمیں آزمائش سے گزرنے کی ہمت اور توفیق دے۔

مزید پڑھیں: سندھ حکومت نے نماز جمعہ کے اجتماعات پر پابندی لگادی

واضح رہے کہ اس سے قبل مفتی تقی عثمانی کا کہنا تھا کہ ’سوشل میڈیا پر مختلف علاج یا خبروں پرعمل نہ کریں اور ذمہ داری کا مظاہر ہ کرتے ہوئے انہیں آگے نہ پھیلائیں، اس معاملے میں طبی ماہرین کے مشوروں پر ہی عمل کریں‘۔

انہوں نے ہدایت کی کہ ’گھروں میں بیٹھ کر لوگ روزانہ کم از کم 100 بار آیتِ کریمہ کا ورد کریں، خود کو گھروں میں مخصوص کرلیں اور کھانے پینے سے پہلے سنت نبوی ﷺ کے مطابق بسم اللہ پڑھیں‘۔

مفتی تقی عثمانی نے دعا کی کہ اللہ اہل وطن اور تمام انسانوں کو اس موذی وبا سے محفوظ رکھے۔

کراچی: امیر جماعت اسلامی پاکستان سراج الحق نے کہا ہے کہ کشمیری 6 ماہ سے محصور ہیں، مسئلہ کشمیر پر ملائیشیا اور ترکی کے سوا کسی ملک نے ہمارا ساتھ نہیں دیا۔

ان خیالات کا اظہار انھوں نے اے آر وائی نیوز کے پروگرام الیونتھ آور میں کیا، سراج الحق کا کہنا تھا کہ مسئلہ کشمیر کے حل کے لیے پاکستان کو معاشی طور مضبوط کرنا چاہیے، ملک میں قومی یک جہتی کی ضرورت ہے، جب کہ حکومت نے مسئلہ کشمیر پر ایک دن بھی سیاسی جماعتوں کو نہیں بلایا، مسئلہ کے حل کے لیے کشمیری قیادت کو آگے لانا چاہیے۔

امیر جماعت کا کہنا تھا کہ حکومت نے تو کشمیر کے معاملے پر کچھ کیا ہی نہیں، اقوام متحدہ میں تو ہر حکمران نے تقریریں کی ہیں، 27 ستمبر کی تقریر خود عمران خان کو ڈھونڈ رہی ہے، حکومت کے پاس کوئی روڈ میپ نہیں، مشرف دور میں جو باڑ لگی اس کو ہٹانا چاہیے۔

حکومت گرانے سے متعلق سراج الحق کا کہنا تھا کہ جماعت اسلامی کبھی کسی سازش کا حصہ بنی اور نہ بنے گی، مولانا فضل الرحمان کا دھرنے کا فیصلہ ان کا اپنا تھا، خود ہی چلے گئے، مولانا سے کہا تھا حکومت گرانے کے بعد کس کو لانا ہے یہ بتائیں، حکومت گرانا آسان کام ہے، اصل مسئلہ اچھی حکومت کو لانا ہے۔

انتخابات سے متعلق انھوں نے کہا کہ پاکستان میں کبھی شفاف الیکشن نہیں ہوئے، پاکستان میں جب بھی شفاف الیکشن ہوئے تو جماعت اسلامی ہی آئے گی، پاکستان میں جمہوریت کبھی بھی آزاد نہیں رہی۔