Tag: الیکشن کمیشن

اسلام آباد : الیکشن کمیشن نے ملک بھر میں پولنگ اسٹیشنز کی کیٹیگریزفائنل کرلیں، چاروں صوبوں میں 91 ہزار 809 پولنگ اسٹیشنز قائم کیے جائیں گے۔

تفصیلات کے مطابق ملک میں عام انتخابات کی تیاریاں جاری ہے ، الیکشن کمیشن نے ملک بھر میں پولنگ اسٹیشنز کی کیٹیگریزفائنل کرلیں۔

نارمل،حساس اور انتہائی حساس پولنگ اسٹیشنز کا ڈیٹا اے آر وائی نیوزنے حاصل کرلیا ، ذرائع نے بتایا ہے کہ چاروں صوبوں میں 91 ہزار 809 پولنگ اسٹیشنز قائم کیے جائیں گے۔

ذرائع کا کہنا ہے کہ پنجاب میں کل 51 ہزار 821 پولنگ اسٹیشنز بنائے جائیں گے، جس میں 15 ہزار 829پولنگ اسٹیشن حساس اور 6 ہزار599 انتہائی حساس قرار دیئے گئے ہیں۔

ذرائع نے کہا ہے کہ سندھ میں 19 ہزار 236 پولنگ اسٹیشنز بنائے جائیں گے، جس میں 8 ہزار 30 پولنگ اسٹیشن حساس اور 4 ہزار 430پولنگ اسٹیشن انتہائی حساس ہوں گے۔

ذرائع کے مطابق بلوچستان میں 5 ہزار 15 پولنگ اسٹیشنز کا پروگرام فائنل کیا گیا ہے، بلوچستان میں 2 ہزار 68 حساس ، 2 ہزار 38 انتہائی حساس ہوں گے جبکہ خیبر پختونخواہ میں مجموعی طور پر 15 ہزار 737 پولنگ اسٹیشنز قائم کیے جائیں گے۔

ذرائع کا کہنا تھا کہ خیبر پختونخواہ میں 6 ہزار 581 حساس ، 4 ہزار 344 اسٹیشن انتہائی حساس ہوں گے۔

اسلام آباد : الیکشن کمیشن نے عام انتخابات کے لئے  انتخابی ڈیوٹی کیلیے نجی شعبے سے عملہ لینے پر غور شروع کردیا ، مجموعی طور پر 2 لاکھ 5 ہزار 388 اہلکاروں کی ضرورت ہے۔

تفصیلات کے مطابق الیکشن 2024 کی تیاریوں کے معاملے پر الیکشن کمیشن انتخابی ڈیوٹی کیلیے نجی شعبے سے عملہ لینے پر غور کررہی ہے اور پولنگ اسٹیشنز پر بھی نجی اداروں کے ملازمین کو انتخابی عملے کے طور پر تعینات کرنے کی تجویز دی گئی ہے۔

سندھ کے مختلف پولنگ اسٹیشنز پر نجی شعبے سے عملہ لینے کی تجویز ہے، انتخابات میں مجموعی طور پر 2 لاکھ 5 ہزار 388 اہلکاروں اور الیکشن ڈیوٹی کے لیے 2 لاکھ 38 ہزار 317 پولنگ اسٹاف کی ضرورت ہے۔

ذرائع کا کہنا ہے کہ 2 لاکھ 23 ہزار 317 سرکاری محکموں سے لیے جائیں گے تاہم کم پڑنے والا 15 ہزار عملہ نجی شعبے سے پورا کیے جانے کی تجویز ہے۔

یاد رہے الیکشن کمیشن نے انتخابات میں ڈیوٹی کرنے والے افسران کی فہرست تیار کی تھی، پریزائیڈنگ افسران، اسسٹنٹ پریزائیڈنگ افسران اور پولنگ اسٹاف کی فہرست تیار کی گئی تھی، دستاویزات میں بتایا گیا تھا کہ ملک بھر میں مجموعی طور پر 10 لاکھ 7361 افسران کو تعینات کیا جائے گا۔

اسلام آباد : الیکشن کمیشن نے فیض آباد دھرنا کیس میں سپریم کورٹ فیصلے پر عملدرآمد رپورٹ میں کہا ہے کہ ایسا کوئی ثبوت نہیں ملا کہ تحریک لبیک ریاست مخالف جماعت ہے۔

تفصیلات کے مطابق فیض آباد دھرنا کیس میں الیکشن کمیشن نے سپریم کورٹ فیصلے پر عملدر آمد رپورٹ جمع کرادی، جس میں کہا ہے کہ تحریک لبیک کےریاست مخالف سرگرمیوں میں ملوث ہونے پر وزارت داخلہ سےرپورٹ مانگی ، وزارت داخلہ رپورٹ کے مطابق تحریک لبیک ریاست مخالف سرگرمیوں میں ملوث نہیں۔

اسکروٹنی کمیٹی رپورٹ میں کہنا تھا کہ ٹی ایل پی کے فنڈنگ ذرائع کا بھی جائزہ لیا گیا، تحریک لبیک کو 15لاکھ ممنوعہ ذرائع سےموصول ہوئے، تحریک لبیک پارٹی کیلئے 15 لاکھ روپے کی فنڈنگ آٹے میں نمک کے برابر ہے۔

رپورٹ میں کہا گیا ہے کہ تحریک لبیک کو وصول چھوٹی رقم کو غیر ملکی فنڈنگ قرارنہیں دیا جا سکتا، ایسا کوئی ثبوت نہیں کہ ٹی ایل پی ریاست مخالف جماعت ہے۔

کمیٹی رپورٹ میں کہا ہے کہ الیکشن کمیشن نے انکوائری کے بعد تحریک لبیک کیخلاف نوٹس واپس لے لیا، الیکشن کمیشن نے سپریم کورٹ فیض آباد دھرنا کیس کے فیصلےپرعملدر آمد کردیا، الیکشن کمیشن کو اپنی آئینی ذمہ داریوں کا مکمل ادراک ہے۔

اسلام آباد : الیکشن کمیشن نے غیر ملکی مبصرین کے لیے دعوت نامہ جاری کر دیا، غیر ملکی مبصرین ویزے کے جلد حصول کیلیے وزارت خارجہ کے ”پاکستان آن لاٸن پورٹل“ پر کواٸف جمع کرا سکتے ہیں۔

تفصیلات کے مطابق الیکشن کمیشن آف پاکستان نے غیر ملکی مبصرین کے لیے دعوت نامہ جاری کر دیا، الیکشن کمیشن نے کہا ہے کہ انتخابات کی شفافیت کیلیے ملکی و غیر ملکی مبصرین کیلیے اوپن ڈور پالیسی ہے،غیر ملکی مبصرین کو الیکشن کمیشن میں ایکرڈیشن کروانا لازمی ہو گی۔

الیکشن کمیشن نے بتایا کہ غیر ملکی مبصرین ویزے کے جلد حصول کیلیے وزارت خارجہ کے ”پاکستان آن لاٸن پورٹل“ پر کواٸف جمع کرا سکتے ہیں، غیر ملکی مبصرین کو پاکستان پہنچنے کے بعد الیکشن کمیشن میں ایکریڈیشن کروانا ہوگی۔

الیکشن کمیشن کا کہنا تھا کہ ایکرڈیشن فارم الیکشن کمیشن کی ویب ساٸٹ سے ڈاٶن لوڈ کیے جا سکتے ہیں تاہم سیاسی وابستگی کے حامل افراد کو ایکریڈیشن جاری نہیں کیا جائے گا جبکہ غیر ملکی مبصرین کیلیے سیکیورٹی کلیرنس لازمی قرار دی گئی ہے۔

جاری دعوت نامہ میں کہا گیا ہے غیر ملکی مبصرین انتخابی بے قاعدگیوں کی رپورٹ جمع کراٸیں، غیر ملکی مبصرین رپورٹ میں انتخابی عمل کو مزید بہتر بنانے کیلیے تجاویز بھی دے سکتے ہیں۔

اسلام آباد : الیکشن کمیشن نے عام انتخابات میں عالمی مبصرین کیلئے اوپن ڈور پالیسی اختیار کرنے کا فیصلہ کرلیا اور وزارت خارجہ کو ہدایات جاری کردیں۔

تفصیلات کے مطابق عام انتخابات تیاریوں کے حوالے سے الیکشن کمیشن کا اجلاس ہوا ، جس میں عالمی مبصرین کیلئے اوپن ڈور پالیسی اختیار کرنے کا فیصلہ کرلیا.

اس سلسلے میں الیکشن کمیشن کی طرف سے وزارت خارجہ کو ہدایات جاری کردیں ہیں ، جس میں کہا ہے کہ تمام عالمی مبصرین کوانتخابات میں دعوت دی جائے ، یہ کام فارن مشنز کےذریعے ایک ہفتے میں مکمل کیاجائے۔

عالمی مبصرین کےویزا پراسس کوتیزی سےمکمل کریں اور ہرممکن سہولت فراہم کی جائیں۔

الیکشن کمیشن نے چاروں صوبوں کے جوائنٹ الیکشن کمشنر فوکل پرسن تعینات کردیئے ہیں اور کہا ہے کہ عالمی مبصرین کی سکیورٹی کوبھی یقینی بنایا جائے اور سیکیورٹی سے متعلق تمام امور کو 2 ہفتےمیں مکمل کیاجائے۔

الیکشن کمیشن اجلاس میں فیڈرل بورڈ آ ف ریونیو کو بھی ہدایت جاری کی گئی ہے ، جس میں کہا گیا ہے کہ عالمی مبصرین اورمیڈیانمائندگان کےتمام آلات کوکسٹم ڈیوٹی سےاستثنیٰ دیاجائے اور تمام آلات،کیمرےودیگرضروری سامان کو کسٹم ڈیوٹی سے استثنیٰ قرار دیا جائے۔

الیکشن کمیشن نے اس بارے میں ایک ایکشن کمیٹی بھی قائم کر دی ہے۔

الیکشن کمیشن آف پاکستان (ای سی پی) نے تمام نئے اہل رائے دہندگان (ووٹرز) سے کہا ہے کہ وہ اپنے ووٹ کا فوری اندراج کرائیں کیونکہ نئے ووٹرز کے اندراج، ان کے کوائف کی درستی اور ووٹوں کی منتقلی کا عمل بدھ کو بند ہوجائے گا۔

الیکشن کمیش آف پاکستان (ای سی پی) حکام کے مطابق اسلام آباد میں الیکشن کمیشن کی جانب سے چلائے جانے والے سہولت ڈیسک اور اس کے ضلعی سطح کے دفاتر اس کام کو انجام دینے میں سرگرم عمل ہیں۔

انہوں نے عوام پر زور دیا کہ وہ 25 اکتوبر 2023 تک اپنے کمپیوٹرائزڈ قومی شناختی کارڈ (سی این آئی سی) کے ڈیٹا کے مطابق اپنے ووٹ کے اندراج کو یقینی بنانے کے لیے اپنا نام ووٹر لسٹوں میں درج کرانے یا ان میں موجود خامیوں کو درست کروائیں۔

واضح رہے کہ الیکشن کمیشن نے الیکشن ایکٹ 2017 کے تحت 20 جولائی کو ووٹرز لسٹیں منجمد کی تھیں تاہم بعد میں الیکشن کمیشن کا کہنا تھا کہ ووٹرز لسٹیں 25 اکتوبر 2023 تک غیر منجمد رہیں گی تاکہ تمام اہل افراد اپنے ووٹ کا اندراج کروا سکیں، 25 اکتوبر تک ووٹ کا اخراج، منتقلی اور شناختی کارڈ کے مطابق کوائف کی درستی کی جا سکتی ہے۔

اسلام آباد : الیکشن کمیشن نے  عام انتخابات میں ڈیوٹی کرنے والے افسران کی فہرست تیار کرلی، ملک بھر میں مجموعی طور پر 10 لاکھ 7361 افسران کو تعینات کیا جائے گا۔

تفصیلات کے مطابق ملک بھر میں عام انتخابات کی تیاریاں جاری ہے ، الیکشن کمیشن نے انتخابات میں ڈیوٹی کرنے والے افسران کی فہرست تیار کرلی ہے۔

پریزائیڈنگ افسران، اسسٹنٹ پریزائیڈنگ افسران اور پولنگ اسٹاف کی فہرست تیار کی گئی ہے، دستاویزات میں بتایا گیا ہے کہ ملک بھر میں مجموعی طور پر 10 لاکھ 7361 افسران کو تعینات کیا جائے گا۔

پنجاب میں 54 ہزار 706 پریزائیڈنگ افسران ، 3لاکھ10ہزار968اسسٹنٹ پریزائیڈنگ افسران اور ایک لاکھ60ہزار445پولنگ اسٹاف تعینات کیا جائے گا، صوبے میں مجموعی طور پر 5 لاکھ 26 ہزار123 افسران تعینات کیے جائیں گے۔

سندھ میں 20 ہزار 315 پریزائیڈنگ افسران ، ایک لاکھ62ہزار523اسسٹنٹ پریزائیڈنگ افسران اور 81ہزار262پولنگ اسٹاف تعینات کیے جائیں گے، سندھ میں مجموعی طور پر2لاکھ64ہزار100افسران تعینات ہوں گے۔

اسی طرح خیبرپختوننوا میں 16525پریزائیڈنگ افسران ، ایک لاکھ85 اسسٹنٹ پریزائیڈنگ فسران،50ہزار45 پولنگ اسٹاف تعینات ہوگا جبکہ مجموعی طورپرایک لاکھ66 ہزار655افسران کو تعینات کیاجائےگا۔

بلوچستان میں 5ہزار266پریزائیڈنگ افسران،30ہزار150 اسسٹنٹ پریزائیڈنگ افسران ، 15ہزار75 پولنگ اسٹاف تعینات کیے جائیں گے جبکہ مجموعی طور پر 50 ہزار 491 افسران تعینات ہوں گے۔

اسلام آباد: عام انتخابات کی تیاریوں کا جائزہ لینے کے لیے الیکشن کمیشن نے اہم اجلاس آ ج کوئٹہ میں طلب کیا گیا ہے۔

تفصیلات کے مطابق عام انتخابات کی تیاریوں کے جائزہ کے لیے الیکشن کمیشن نے اہم اجلاس طلب کیا ہے ، چیف الیکشن کمشنر اجلاس کی صدارت کریں گے۔

اجلاس میں الیکشن کمیشن حکام، آئی جی اور چیف سیکریٹری بلوچستان شریک ہونگے، اجلاس میں بلوچستان میں انتخابی تیاریوں کا جائزہ لیا جائے گا۔

چیف سیکرٹری اور آئی جی بلوچستان صوبے کے انتظامی امور اور سیکیورٹی صورتحال پر بریفنگ دینگے جبکہ چیف الیکشن کمشنر عام انتخابات کی تیاریوں کے حوالے سے اہم ہدایات جاری کرینگے۔