Tag: الیکشن 2018

لاہور: پاکستان پیپلزپارٹی کے رہنما اعتزاز احسن نے کہا ہے کہ شہباز شریف نے ایئرپورٹ جانا ہی نہیں تھا، شہباز شریف نے اپنے بھائی کو بلا کر پیٹھ میں چھرا گھونپا ہے۔

ان خیالات کا اظہار انہوں نے این اے 133 کے امیدوار عاصم بھٹی کے ہمراہ پریس کانفرنس کرتے ہوئے کیا، اعتزاز احسن نے کہا کہ شاہد خاقان عباسی، رانا ثنا اللہ اور دیگر استقبال کو نہیں پہنچے، یہ سب شیر کی کھال میں گیدڑ ہیں۔

انہوں نے کہا کہ فخر ہے ہمارا تعلق شہیدوں کے خاندان سے ہے، آصف زرداری نے ہمیشہ صبرو تحمل سے کام لیا ہے، زرداری منشور کے مطابق بات کرتے ہیں، پارٹی کا منشور بھوک مٹاؤ ہے لوٹ مار نہیں، ہماری پارٹی نے ہمیشہ غریب طبقے کا ہی ساتھ دیا ہے۔

اعتزاز احسن نے کہا کہ مریم نواز اور حمزہ شہباز کے درمیان اختلافات زیادہ ہوچکے ہیں، باتیں تو بہت ہوتی ہیں، شہباز شریف اتنے لوگ اکٹھے نہ کرسکے، ووٹ تو شہباز شریف مانگتے ہیں مگر انہیں لوہے کے چنے چبانے پڑے۔

مزید پڑھیں: نوازشریف اور مریم کے ساتھ دھوکا ہوا، اعتزاز احسن

انہوں نے کہا کہ شہباز شریف ریلی سے غائب ہوکر کس سے ڈیل کرنے گئے تھے، ن لیگ کے ووٹرز نے دیکھ لیا شہباز شریف ریلی سے تین گھنٹے غائب رہے، نواز شریف کی آمد کے موقع پر مسلم لیگ ن کے شیر سارے ڈھیر ہوگئے۔

رہنما پیپلزپارٹی نے کہا کہ بلاول بھٹو کل لاہور آئیں گے پھر قصور جائیں گے، پچ پر گڑ بڑ ہورہی ہے ہمارے کارکنان پر زور ڈالا جارہا ہے، ملک میں انتخابات شفاف ہونے چاہئیں۔

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

اسلام آباد: چیئرمین تحریک انصاف عمران خان نے کہا ہے کہ شہباز شریف نے میرے خلاف 32 ایف آئی آر درج کرائیں، شہباز شریف کو معلوم نہیں کے ان کے ساتھ کیا ہوگا، اڈیالہ ان کا انتظار کررہا ہے۔

ان خیالات کا اظہار انہوں نے نتھیا گلی میں جلسے سے خطاب کرتے ہوئے کیا، عمران خان نے کہا کہ نگراں وزیراعلیٰ کے پی کو پیغام دینا چاہتا ہوں کہ نیوٹرل امپائر بنیں، نگراں وزیراعلیٰ کے پی دوست محمد کے اکرم درانی، فضل الرحمان سے تعلقات ہیں، ہم چاہتے ہیں وہ غیرجانبدارانہ کردار ادا کریں۔

چیئرمین تحریک انصاف نے کہا کہ نگراں حکومت عام انتخابات شفاف بنانے کے لیے کردار ادا کرے، پاکستان کی تقدیر کا فیصلہ 25 جولائی کو ہونے جارہا ہے، آزاد حیثیت میں کھڑے ہونے والے ملک کا نقصان نہ کریں، الیکشن میں تحریک انصاف کے امیدواروں کو کامیاب بنائیں بلے کو ووٹ دیں۔

عمران خان نے کہا کہ نتھیا گلی میں ٹورازم کو فروغ دیں گے، کالج بنائیں گے جس میں ٹورازم سے متعلق ٹریننگ دی جائے گی، نتھیا گلی اور اطراف میں ریزارٹس بنا کر سیاحت کو فروغ دیں گے۔

انہوں نے کہا کہ نوجوانوں کو دور نہیں جانا پڑے گا اپنے علاقے میں ہی نوکریاں ملیں گی، علاقے میں پیسہ اور پانی آئے گا تو ترقیاتی کام بھی ہوں گے، گلگت بلتستان میں لوگ ٹیکنیکل ٹریننگ لے کر پوری دنیا میں کام کرتے ہیں، گاؤں گاؤں گھر گھر جاکر لوگوں کو ووٹ سے متعلق شعور دینا ہے۔

مزید پڑھیں: بھٹو کے نام پر سندھ میں لوگوں کا قتل عام ہورہا ہے، عمران خان

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

ڈی آئی خان: متحدہ مجلس عمل کے صدر اور جمعیت علمائے اسلام (ف) کے سربراہ مولانا فضل الرحمان نے کہا ہے کہ ملک میں بے حیائی کے کلچر کو فروغ دیا جارہا ہے۔

ان خیالات کا اظہار انہوں نے ڈی آئی خان میں جلسہ عام سے خطاب کرتے ہوئے کیا، مولانا فضل الرحمان نے کہا کہ ختم نبوت کے تحفظ کے علمبردار ہم ہی ہیں، حکومت کرنے والی قوتیں ہمارے نظریے کو نظر انداز کرتی ہیں۔

انہوں نے کہا کہ ختم نبوت کے قانون میں تبدیلی کا چور پکڑا جاچکا ہے، ختم نبوت کا چور جب پکڑا گیا تو خاموشی اختیار کرلی گئی، تہذٰیب پر حملہ کرکے قوم کو بیرونی قوتوں کا غلام بنایا جارہا ہے۔

مولانا فضل الرحمان نے کہا کہ عوام نے ووٹ کی پرچی سے یہ جنگ جیتنی ہے، ایم ایم اے کا مقابلہ مذہب کی مداخلت کو ختم کرنے والوں کے خلاف ہے، اگر تحریک انصاف کی حکومت آئی تو ملک میں اسلام نہیں رہے گا۔

انہوں نے کہا کہ متحدہ مجلس عمل میں اتحاد ہے جبکہ دیگر جماعتوں میں ٹکٹوں کی تقسیم پر مسئلہ بنا، مینڈیٹ ملنے کے بعد اتحاد کا فیصلہ کیا جائے گا۔

مولانا فضل الرحمان نے کہا کہ پوری قوم پر بڑی ذمہ داری عائد ہوگئی ہے کہ انہوں نے انتخابات میں مستقبل کا فیصلہ کرنا ہے، ایم ایم اے کا کوئی امیدوار کرپٹ نہیں ہے بلکہ ہمارے امیدوار دیانت دار اور امانت دار ہیں۔

ان کا کہنا تھا کہ ایم ایم اے حکومت میں آئی تو ملک سے کرپشن ختم ہوجائے گی، مخصوص طبقہ ملک کے اسلامی تشخص کی راہ میں بڑی رکاوٹ ہے۔

خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔