لاہور : مسلم لیگ (ق) نے ن لیگ کے ساتھ سیٹ ایڈجسٹمنٹ نہ کرنے کا فیصلہ کرلیا اور کہا ہمارے امیدوار جہاں کھڑے ہوں گے ہم بھی وہیں کھڑے ہوں گے۔
تفصیلات کے مطابق سربراہ چوہدری شجاعت حسین کی زیر صدارت پاکستان مسلم لیگ ق کا ہنگامی اجلاس ہوا، جس میں چوہدری شجاعت حسین نے کہا کہ مسلم لیگ ق نے ن لیگ کے ساتھ سیٹ ایڈجسٹمنٹ کو مسترد کردیاہے، ق لیگ نے اپنی ذات کی حد تک ن لیگ سے سیٹ ایڈجسٹمنٹ کو مسترد کیا ہے۔
مسلم لیگ ق کے سربراہ کا کہنا تھا کہ اپنے امیدواروں کو دہرے معیار کا شکار نہیں ہونے دیں گے ، ہم نے جن امیدواروں سے وعدہ کیا تھا ان کے ساتھ ہیں، ہمارے امیدوار جہاں کھڑے ہوں گے ہم بھی وہیں کھڑے ہوں گے۔
اجلاس میں چوہدری سالک نے کہا کہ ن لیگ نے ہمارے مطلوبہ حلقوں میں اپنے امیدوار کھڑے کردیئے ہیں، پارٹی قیادت کا فیصلہ ہے ،ہم دہرے معیار کا شکار نہیں ہوں گے اور ن لیگ سے سیٹ ایڈجسٹمنٹ نہیں کریں گے۔
چوہدری سالک حسین کا کہنا تھا کہ ہم بنا سیٹ ایڈجسٹمنٹ کےالیکشن میں مقابلے کے لیےتیار ہیں، ہمارےدیگرامیدوار وں کے مقابلے میں ن لیگ نےٹکٹ جاری کر دیے۔
ق لیگی رہنما نے کہا کہ ق لیگ نے ہمیشہ پاکستان اور عوام کی ترقی و خوشحالی کیلئےکردار ادا کیا ، گجرات سے بھی میرے اورمیرےبھائی کے خلاف ن لیگ نے ٹکٹ جاری کیا، چوہدری شافع حسین نے بھی اس بات پر اتفاق کیا ہے۔
ان کا مزید کہنا تھا کہ ہم نے جن امیدواروں سے عہد کیا وہ ہمارے ساتھ ہیں ، ن لیگ ہمارے امیدواروں کامقابلہ کرے گی تو ہم بھی ساتھیوں کےساتھ کھڑے ہوں گے۔
ذرائع کے مطابق ق لیگ کو مطلوبہ تعداد میں ایم این اے، ایم پی ایز کی نشستیں دینے سے انکار کیا گیا۔
