Tag: الیکشن

لاہور: پاکستان تحریک انصاف( پی ٹی آئی) نے رواں ہفتے انٹرا پارٹی الیکشن کرانے کا فیصلہ کیا ہے۔

پی ٹی آئی کی کور کمیٹی کے ذرائع کا کہنا ہےکہ پارٹی نے چیئرمین پی ٹی آئی عمران خان کی مشاورت سے انٹرا پارٹی الیکشن کرانے کا فیصلہ کیا ہے جو اسی ہفتے کرائے جائیں گے۔

ذرائع کے مطابق چیئرمین پی ٹی آئی بلا مقابلہ پارٹی چیئرمین رہیں گے جب کہ پارٹی میں باقی عہدوں پرانتخابات کروائے جائیں گے۔

واضح رہےکہ الیکشن کمیشن نے بلے کے نشان کے لیے تحریک انصاف کو 20 روز کے اندر انٹرا پارٹی الیکشن کرانے کا حکم دیا تھا۔

لاہور: سابق وزیراعلیٰ پنجاب چوہدری پرویزالہی کا کہنا ہے کہ تلہ گنگ ،اٹک ،گجرات ،منڈی بہاؤالدین سے الیکشن لڑوں گا۔

تفصیلات کے مطابق سابق وزیراعلیٰ پنجاب پرویز الٰہی نے جوڈیشل کمپلیکس میں میڈیا سے غیر رسمی بات چیت کرتے ہوئے کہا ن لیگ کی جانب سے انتظامیہ ،پولیس کو استعمال کیا جارہا ہے ، الیکشن کمیشن کو نوٹس لینا چاہئے۔

پرویز الہٰی کا کہنا تھا کہ تلہ گنگ ،اٹک ،گجرات ،منڈی بہاؤالدین سے الیکشن لڑوں گا ،انتظامیہ ن لیگ کے ووٹ مانگے گی تو کیا صورتحال ہو گی۔

سابق وزیراعلیٰ پنجاب نے کہا کہ انتخابی شیڈول کے بعد سپریم کورٹ سے بھی رجوع کریں گے، انتخابی تاریخ تبدیل نہیں ہو سکتی۔

الیکشن کے حوالے سے ان کا کہنا تھا کہ بلے کا نشان نہ ہوا تو کوئی الیکشن تسلیم نہیں کرے گا ، یہ کوئی جاتی امرا کا الیکشن تو نہیں ہے، مشورہ ہے پی ٹی آئی کو نہ چھوڑا جائے ووٹ پی ٹی آئی کا ہے، چیف الیکشن کمشنر اپنی ساکھ بحال رکھنا چاہتے ہیں تو جلسوں کی اجازت دی جائے۔

پرویز الہٰی نے مزید کہا کہ لاڈلے کو جو سلوک مل رہا ہے یہ فیئر پلے نہیں ہے ، الیکشن شفاف نہ ہوئے تو برا حشر ہو گا، شیڈول کے بعد پی ٹی آئی کے امیدوار سامنے آنا شروع ہو جائیں گے اور کسی کا دل کمزور ہے تو ساتھ کورنگ امیدوار وکیل کو کھڑا کر لیں۔

جے یو آئی (ف) کے سربراہ مولانا فضل الرحمان نے کہا ہے کہ کل الیکشن کرا دیں ہم پوری طرح تیار ہیں، پی ڈی ایم اتحادی حکومت نے مردم شماری پر الیکشن کا فیصلہ کیا۔

مولانا فضل الرحمان کا نجی ٹی وی کو انٹرویو دیتے ہوئے کہنا تھا کہ حلقہ بندیوں کا معاملہ الیکشن کمیشن کے پاس ہے وہ فیصلہ کرے کب الیکشن کرانا ہیں۔ صدر کو اختیار نہیں کہ الیکشن کی تاریخ دیں، غیرآئینی اقدام ہوگا۔ صدر اب پالیسی معاملات نہ چھیڑیں روزمرہ کے امور دیکھیں۔

انھوں نے کہا کہ کیا ہم الیکشن شیڈول کا اختیار سپریم کورٹ یا صدر کو دے دیں، پی ڈی ایم کے ساتھ پیپلزپارٹی دوسری بڑی قوت تھی۔ پی ڈی ایم اتحادی حکومت نے مردم شماری پر الیکشن کا فیصلہ کیا۔

فضل الرحمان نے کہا کہ ن لیگ حکومت نے جی ڈی پی گروتھ 6 فیصد کی، پی ٹی آئی نے صفر کر دی تھی۔ پی ٹی آئی نے ملک کو وہاں لا کھڑا کیا جہاں ڈیفالٹ ہونے جا رہا تھا۔ ہم نے 16 ماہ میں قرض کا بوجھ کم کیا ملک کو ڈیفالٹ سے بچایا۔

انھوں نے کہا کہ نگراں حکومت کو وہ ملک ملا جو ڈیفالٹ کے خطرے سے نکل چکا ہے۔ ہماری کچھ سیاسی غلطیوں کی وجہ سے پی ٹی آئی کو فائدہ ہوا۔

جب پی ٹی آئی کا گراف نیچے تھا ہم کہتے تھے الیکشن کی طرف جائیں۔ الیکشن کے بجائے ہم پارلیمنٹ کی طرف چلے گئے جوغلطی تھی۔ جب ہم پارلیمنٹ کی طرف آگئے تو ہماری مجبوری مختلف ہوگئی۔ پارلیمنٹ کی طرف آگئے تو الیکشن نہیں کرا سکتے تھےمدت پوری کرنا تھی۔

مولانا کے مطابق کہا تھا ہم ملک کو نہیں اٹھا سکیں گے، پی ٹی آئی کا گراف اوپر ہمارا نیچے جائے گا۔ چیئرمین پی ٹی آئی کے ساتھ سودے بازی کی بنیاد پر کسی بھی عمل کے خلاف تھے۔ ہم نے کہا تھا چیئرمین پی ٹی آئی بغیرشرط مستعفی ہو، عدم اعتماد خود بخود ختم ہوجائے گی۔

انھوں نے کہا کہ قمر جاوید باجوہ ہمارے آرمی چیف رہے، اخلاقی طور پر بیان بازی سے گریز کیا۔ قمر جاوید باجوہ نے بھی سوچا اب اس آدمی کو نہیں ہونا چاہیے ہم نے اس کو ویلکم کیا۔

فضل الرحمان نے کہا کہ چیئرمین پی ٹی آئی بظاہر کچھ کہتے تھے اندر صورتحال کچھ اور ہوتی تھی، جن کو پی ٹی آئی نے وفاقی وزیر بنایا اور بڑے عہدے دیے آج وہ بھی ان کے ساتھ نہیں۔ جو اپنی قیادت کے ساتھ ایسا سلوک کریں وہ میرے یا کسی اور کے ساتھ کیا کریں گے۔

انھوں نے کہا کہ چوہدری شجاعت کے ساتھ ان کے بھائی نے کیا کیا سب نے دیکھا۔ پرویز الٰہی اپنے گھر اور بڑے بھائی کے ساتھ وفاداری نہیں کر سکے۔ جو آدمی مفادات کی سیاست کرتا ہے وہ بھگتتا بھی ہے۔ میرے 2011 سے لے کر آج تک مؤقف میں کوئی جھول نہیں آیا۔ میں کسی بھی سیاستدان کو جیل میں رکھنے کے حق میں نہیں ہوں۔

کراچی: چیئرمین پیپلز پارٹی بلاول بھٹو آج سے ملک بھر میں الیکشن کیلئے عوامی رابطہ مہم کا آغاز کرینگے۔

تفصیلات کے مطابق چیئرمین پیپلزپارٹی بلاول بھٹو عوامی رابطہ مہم  کیلئے آج براستہ ٹھٹھہ، سجاول سے بدین پہنچیں گے، کراچی سے روانہ ہونے کے بعد مختلف مقامات پر ان کا استقبال کیا جائیگا۔

ذرائع نے بتایا کہ چیئرمین پیپلزپارٹی بلاول بھٹو بدین سے براستہ ٹنڈو محمد خان پھر حیدرآباد پہنچیں گے،  آج وہ بدین میں میڈیا سے گفتگو کریں گے اور رات حیدرآباد میں گزاریں گے۔

ذرائع کے مطابق چیئرمین پیپلز پارٹی اگلے دن حیدرآباد سے براستہ نوابشاہ، سکھر روانہ ہوں گے، اس کے بعد سکھر سے براستہ کشمور ہوتے ہوئے ملتان پہنچیں گے، ملتان سے بلاول بھٹو لاہور جائیں گے جہاں سی ای سی کا اجلاس ہوگا۔

اسلام آباد : وزیراعظم شہباز شریف کے نئی مردم شماری کے تحت الیکشن میں جانے کے بیان پر اتحادی جماعتوں نے حیرانگی کا اظہار کردیا۔

تفصیلات کے مطابق وزیراعظم شہباز شریف کی جانب سے نئی مردم شماری کے تحت الیکشن میں جانے کے بیان نے نیا پنڈورا باکس کھول دیا۔

وزیراعظم کے بیان پر اتحادی جماعتوں نے تحفظات کا اظہار کردیا، جے یوآئی کے کامران مرتضیٰ ایڈووکیٹ نے اے آر وائی نیوز کے پروگرام میں گفتگو کرتے ہوئے کہا کہ نہیں معلوم وزیراعظم نے اتنی بڑی بات کیسے کردی۔

کامران مرتضیٰ کا کہنا تھا کہ مردم شماری نوٹیفائی ہوگی تواس پراعتراضات کاعمل ہوگا اور نئی حلقہ بندیاں بنانےکےعمل میں چارپانچ ہفتےلگ جائیں گے۔

انھوں نے مزید کہا کہ مردم شماری جیسی گفتگوکیلئےیہ وقت مناسب نہیں، وزیراعظم کوپہلےاتحادی جماعتوں سے مشاورت کرنی چاہیے۔

جماعت اسلامی کے عبدالاکبر چترالی نے کہا کہ وزیراعظم کےبیان سے لگتاہےالیکشن اس سال نہیں ہونے والے، جان بوجھ کر ایسا ماحول پیدا کیا جارہا ہے کہ الیکشن وقت پر نہ ہوں۔

اسلام آباد: چیئرمین پاکستان تحریک انصاف (پی ٹی آئی) عمران خان  نے دو ٹوک الفاظ میں کہا ہے کہ شاہ محمود اور فواد چوہدری سے کہہ دیا ہے کہ اگر حکومت فوری اسمبلی توڑ کر الیکشن پر راضی ہو تب ہی بات کریں۔  

اسلام آباد ہائی کورٹ میں پیشی کے موقع پر صحافیوں سے غیر رسمی گفتگو کرتے ہوئے چیئرمین پاکستان تحریک انصاف (پی ٹی آئی) عمران خان کا کہنا تھا کہ قمرجاوید باجوہ خود کہتا ہےکہ عمران خان خطرناک ہے۔

انہوں نے کہا کہ 2 اسمبلیاں تحلیل ہوتی ہیں تو جوائنٹ الیکشن کیلئے تیار ہیں،  14 مئی کو بھی الیکشن نہیں ہوتے تو آئین ٹوٹ جائےگا، اگر  آئین ٹوٹ گیا تو پھر جس کا بھی زور ہوگا اسی کی بات چلےگی۔

سابق وزیر اعظم کا کہنا تھا کہ ہم نے ہمیشہ سب فیصلے سپریم کورٹ کے مانے ہیں، ہم آئین کیساتھ کھڑے ہیں اور پی ڈی ایم کےخلاف ہمارا ان سے کوئی موازنہ نہیں ہے۔

عمران خان نے کہا کہ مجھے بہت سی چیزیں پتہ ہیں مگر یہ قومی سلامتی کا معاملہ ہے، میں نہیں چاہتا کوئی انٹرنیشنل خبر بن جائے اور ملک کا نقصان ہو۔

عمران خان نے شاہ محمود قریشی اور فواد چوہدی کی موجودگی میں بیان دیا کہ مذاکرات کا پہلے دن سے کہہ رہا تھا الیکشن کی تاریخ پر کر سکتا ہوں، دونوں کو کہہ رہا ہوں حکومت فوری اسمبلی توڑ کر الیکشن چاہے تو ہی بات کریں، یہ دوبارہ ستمبر اکتوبر کی بات کرتے ہیں تو کوئی ضرورت نہیں مزاکرات کی۔

وزیر اعظم شہباز شریف نے کہا ہے کہ ثاقب نثار نے پی ٹی آئی کو الیکشن جتوانے کیلئے دھاندلی کا بازار گرم کیا۔

وزیر اعظم شہباز  شریف نے قومی اسمبلی میں اعتماد کا ووٹ حاصل کر لیا ہے ان پر ایوان کے 180 اراکین نے اعتماد کا اظہار کیا جس پر وزیر اعظم نے اسمبلی میں کہا کہ آج معزز ممبران نے بلاول بھٹو کی قرارداد پر مجھ ناچیز کو ایک بار پھر عزت سے نوازا، مجھے اعتماد کا ووٹ دینے پر سب کا شکریہ ادا کرتا ہوں۔

وزیراعظم کا کہنا تھا کہ اللہ تعالیٰ کا لاکھ لاکھ شکر ادا کرتاہوں، ایوان کی جانب سے اعتماد کا اظہار کرنے پر اللہ تعالی کا مشکور ہوں، اعتماد کا ووٹ دینے پر اتحادیوں کا دل کی گہرائیوں سے مشکور ہوں۔

انہوں نے کہا کہ ایوان نے مجھ نا چیز پر اعتماد کیا میں آپ کا مان رکھوں گا کبھی ٹھیس نہیں پہنچاؤں گا۔

وزیر اعظم شہباز شریف نے کہا کہ آج پاکستان شدید مشکلات میں ہے، پاکستان پر مشکلات میری یا اس ایوان کے ممبران کی وجہ سے نہیں،  2018 میں ملکی معیشت دنیا میں جانی مانی تھی جو تیزی سے ترقی کررہی تھی،2018 کے بعد ایک جھرلو الیکشن کے نتیجے میں جو ہوا سب سامنے آگیا ہے۔

انکا کہنا تھا کہ جنوبی پنجاب کے بعض لوگوں کو مجبور کیاگیا کہ فلاں کا ٹکٹ چھوڑیں اور ڈوپٹہ پہنیں، 2018 میں جھرلوزدہ فراڈ الیکشن ہوئے، دنیاجانتی ہےکس طرح آرٹی ایس کو بٹھایاگیا، 2018 میں یہ تاریخ کا پہلا الیکشن تھا دیہاتوں سے گھنٹوں میں نتائج آنا شروع ہوئے اور شہروں سے کئی کئی گھنٹے تاخیر کا شکار ہوئے۔

وزیراعظم شہباز شریف نے قومی اسمبلی سے اعتماد کا ووٹ لے لیا

وزیراعظم نے کہا ثاقب نثار نے حکم دیا کہ مزیدگنتی نہیں ہوگی،دھاندلی کے لئے کیا کیا انتظامات کیےگئے، یہ  ایوان 2018 کے الیکشن میں دھاندلی کی بھرپور تحقیقات کرائے، یاد دلانا چاہتا ہوں جب اسی فلور پر اسوقت کی حکومت اور وزیراعظم نے بیان دیا تھاکہ دھاندلی کی تحقیقات ہونگی، آج تک دھاندلی کی تحقیق نہیں ہوئی،جناب اسپیکرآپ کی خدمت میں مطالبہ پیش کرتا ہوں آپ دھاندلی کی تحقیقات کرائیں۔

انکا کہنا تھا کہ آئی ایم ایف سے گفتگو تیزی سے آگے بڑھ رہی تھی، عمران نیازی کےکہنے پر 2 وزرا سے کہا گیا کہ کہہ دیں ہم شرائط کو نہیں مانتے، سائفرکا سب کو اچھی طرح پتا ہے امریکاکو نشانہ بنایاگیا، کہاگیا امریکا نےسازش کے ذریعے حکومت بنوائی، چین اور روس کی جانب سے ہمدردی کا اظہارکیاگیا وہ ہمدردی کا اظہار نہیں مگرمچھ کے آنسو تھے۔

وزیر اعظم کا مزید کہنا تھا کہ ثاقب نثار اور خواجہ طارق رحیم کی آڈیولیک آئی ہے، وہ سازش کھل کر سامنے آگئی، ثاقب نثار نے پی ٹی آئی کو الیکشن جتوانے کیلئے دھاندلی کا بازار گرم کیا۔

انہوں نے کہا کہ  وہ ثاقب نثار جس نے پاکستان میں اسپتالوں کا نظام درہم برہم کردیا، وہ ثاقب نثارجس نے سوموٹو لےلےکر قوم کا حلیہ بگاڑ دیا، جس نے پی کے ایل آئی میں اپنے بھائی کو بھرتی کرانےکیلئےبیڑہ غرق کردیا، اس کا کردارپوری قوم کے سامنے آگیا ہے۔