ARYNews.tv | Urdu – Har Lamha Bakhabar

Tag: امتحانات

  • پانچویں اور آٹھویں جماعت کے طلبا ہوشیار ہوجائیں!

    پانچویں اور آٹھویں جماعت کے طلبا ہوشیار ہوجائیں!

    لاہور : پنجاب حکومت نے تعلیمی شعبے میں اہم قدم اٹھاتے ہوئے پانچویں اور آٹھویں جماعت کے امتحانات سرکاری طور پر لینے کی منظوری دے دی۔

    تفصیلات کے مطابق وزیراعلیٰ پنجاب مریم نواز کی زیر صدارت صوبائی کابینہ کا 28 واں اجلاس منعقد ہوا، جس میں 130 نکات پر مشتمل وسیع ایجنڈے کی منظوری دی گئی۔

    اجلاس میں عوامی فلاح، تعلیم، صحت، سیفٹی، سرمایہ کاری، فلڈ ریلیف اور گورننس سے متعلق اہم فیصلے کیے گئے۔

    کابینہ نے پانچویں اور آٹھویں جماعت کے امتحانات سرکاری طور پر لینے کی منظوری بھی دی، پانچویں کلاس کے طلبہ کا جائزہ اورآٹھویں کلاس کے طلبہ کا باقاعدہ امتحان ہوگا تاکہ تعلیمی معیار کا درست اندازہ لگایا جا سکے۔

    حکام کے مطابق، اس اقدام کا مقصد اسکولوں کی کارکردگی بہتر بنانا، طلبہ کی تعلیمی سطح کا تجزیہ کرنا اور تعلیم کے میدان میں شفافیت کو یقینی بنانا ہے۔

    سرکاری و نجی جامعات میں خزانچی، رجسٹرار اور کنٹرولر امتحانات کی یکساں تعیناتی کا فیصلہ بھی کیا گیا۔

    پنجاب ایکوپیشنل سیفٹی اینڈ ہیلتھ رولز 2024 اور پنجاب ریسٹرکشن آن ایمپلائمنٹ آف چلڈرن رولز 2024 کی منظوری دی گئی اور وزیراعلیٰ نے مزدوروں کی سیفٹی کے لیے لیبر ڈیپارٹمنٹ کو انفورسمنٹ فورس بنانے کی ہدایت کی۔

  • دسویں جماعت کے امتحانات میں پوزیشن ہولڈرز طلبہ کی فہرست

    دسویں جماعت کے امتحانات میں پوزیشن ہولڈرز طلبہ کی فہرست

    پنجاب کے مختلف شہروں میں آج دسویں جماعت کے سالانہ امتحانات کے نتائج کا اعلان کیا گیا ہے ان میں پنڈی ساہیوال اور سرگودھا بورڈز بھی شامل ہیں۔

    آج صوبہ پنجاب کے مختلف شہروں کے تعلیمی بورڈز نے دسویں جماعت کے سالانہ امتحانات کے نتائج کا اعلان کیا ہے۔ پنڈی، ساہیوال اور سرگودھا بورڈ کی جانب سے بھی نتائج کے ساتھ ٹاپ تھری پوزیشن ہولڈرز کے ناموں کا بھی اعلان کیا گیا ہے۔

    بورڈ آف انٹرمیڈیٹ اینڈ سیکنڈری ایجوکیشن ساہیوال نے اعلان کردہ نتائج کے مطابق میٹرک کے امتحانات میں مجموعی طور پر 71 ہزار 789 طلبہ نے شرکت کی۔ 48 ہزار 680 نے کامیابی حاصل کی۔ اس طرح کامیابی کا مجموعی تناسب 67.81 فیصد رہا۔

    ساہیوال بورڈ کے نتائج کے مطابق فیضان فرید نے 1189 نمبر حاصل کر کے پہلی پوزیشن حاصل کی۔ ام رومان نے 1187 نمبر حاصل کر کے دوسری جب کہ محمد فیضان نے 1185 نمبر لے کر تیسری پوزیشن حاصل کی۔

    ساہیوال بورڈ کے تحت میٹرک کے مکمل نتائج جاننے کے لیے اس لنک پر کلک کریں

    بورڈ آف انٹرمیڈیت اینڈ سیکنڈری ایجوکیشن سرگودھا نے بھی بدھ کے روز میٹرک کے سالانہ امتحانات کے نتائج کا اعلان کر دیا۔ جس میں سرکاری اور نجی اسکولوں کے طلبہ نے بہترین کارکردگی کا مظاہرہ کیا۔

    سرگودھا بورڈ میں پہلی پوزیشن نجی اسکول کی طالبہ مروہ سہیل کے نام رہی۔ انہوں نے 1187 نمبر حاصل کر کے ٹاپ پوزیشن پر قبضہ جمایا۔

    گورنمنٹ ہائی اسکول کمار مشانی کے طالب علم سراج خان نے 1186 نمبر لے کر دوسری پوزیشن حاصل کی، جب کہ اسد مبین اور منیب الرحمان نے 1184 نمبر حاصل کر کے مشترکہ طور پر تیسری پوزیشن حاصل کی۔

    سرگودھا بورڈ نے تمام پوزیشن ہولڈرز کی تعریف کی اور ان کی مستقبل کی تعلیمی کاوشوں کے لیے نیک خواہشات کا اظہار کیا۔

    سرگودھا بورڈ کے دسویں جماعت کے مکمل نتائج جاننے کے لیے اس لنک پر کلک کریں

    راولپنڈی تعلیمی بورڈ نے میٹرک کے نتائج کا اعلان کر دیا۔ لارنس کالج مری کے طالب علم محمد عثمان نے 1188 نمبرحاصل کرکے پہلی پوزیشن حاصل کلی۔ تلہ گنگ کی بسمہ نے دوسری جب کہ چکوال کی طالبہ مریم شہزادی نے تیسری پوزیشن حاصل کی۔

    راولپنڈی بورڈ میٹرک جنرل گروپ کے نتائج میں امام مسجد کی بیٹی عاصمہ ایمان نے 1125 نمبر حاصل کر کے پہلی پوزیشن حاصل کی

    راولپنڈی بورڈ کے تحت رواں سال مجموعی طور پر ایک لاکھ 20 ہزار 97 امیدواروں نے امتحان دیا۔ جن میں سے 75 ہزار امیدوار کامیاب ہوئے۔ کامیابی کا تناسب 63 فیصد رہا۔

    پنڈی بورڈ کے تحت میٹرک کے مکمل نتائج جاننے کے لیے اس لنک پر کلک کریں

    واضح رہے کہ آج صوبہ پنجاب کے لاہور، فیصل آباد، ڈی جی خان اور ملتان تعلیمی بورڈز نے بھی میٹرک کے سالانہ امتحانات کے نتائج کا اعلان کیا ہے۔

    لاہور بورڈ میں سبزی فروش کے بیٹے ملک فیضان رضا نے پہلی پوزیشن حاصل کر کے نہ صرف اپنے والد کا سر فخر سے بلند کیا بلکہ یہ بھی بتا دیا کہ تعلیم کسی کی میراث نہیں بلکہ کامیابی محنت سے ملتی ہے۔

    https://urdu.arynews.tv/class-10-results-vegetable-vendor-son-toppers-lahore-board/

  • انٹرمیڈیٹ سائنس آرٹس کے امتحانات شروع، ہر پرچے میں مخصوص کوڈ شامل

    انٹرمیڈیٹ سائنس آرٹس کے امتحانات شروع، ہر پرچے میں مخصوص کوڈ شامل

    کراچی: انٹرمیڈیٹ سائنس, آرٹس کے امتحانات آج سے شروع ہو رہے ہیں، نقل میں ملوث طلبہ اور واٹس ایپ پر پرچہ اپ لوڈ کرنے والوں کے خلاف سخت کارروائی ہوگی، جب کہ ہر پرچے میں مخصوص کوڈ شامل کیا گیا ہے۔

    تفصیلات کے مطابق اعلیٰ ثانوی تعلیمی بورڈ کے تحت انٹرمیڈیٹ سالانہ امتحانات کا آغاز آج سے ہو رہا ہے، آج صبح کی شفٹ میں گیارویں جماعت پری انجئیرنگ ریاضی میں فیل ہونے والے طلبہ کا پرچہ لیا جائے گا۔

    انٹرمیڈیٹ امتحانات کا پہلا مرحلہ 29 مئی تک جاری رہے گا، سائنس پری میڈیکل، پری انجینئرنگ، ہوم اکنامکس کے امتحانات صبح 9 سے 12 بجے تک ہوں گے، سائنس جنرل کے امتحانات دوپہر کی شفٹ میں 2 سے 5 بجے تک لیے جائیں گے۔

    امتحانات میں 1 لاکھ 26 ہزار 500 سے زائد طلبہ و طالبات شریک ہوں گے، مجموعی طور پر 182 امتحانی مراکز قائم کیے گئے ہیں، اور 36 مراکز کو انتہائی حساس قرار دیا گیا ہے۔

    واٹس ایپ کے ذریعے نقل : چیئرمین بورڈ نے امتحانات سے قبل ہی انٹر کے طلبہ کو خبردار کر دیا

    پرچہ آؤٹ ہونے سے روکنے کے لیے ہر پرچے میں مخصوص کوڈ شامل کیا گیا ہے، 16 سپر ویجیلینس ٹیمیں امتحانی مراکز کے دورے کر کے نگرانی کریں گی، موبائل فون، لیپ ٹاپ، ٹیبلٹس اور نقل کے مواد پر مکمل پابندی عائد کی گئی ہے، نقل میں ملوث طالب علم کو 3 سال کے لیے نااہل قرار دیا جائے گا۔

    دفعہ 144 کے تحت فوٹو اسٹیٹ دکانیں اور غیر متعلقہ افراد پر پابندی عائد ہے، جب کہ پرچہ آؤٹ کیے جانے اور نقل کی روک تھام کے خلاف ایف آئی اے سے مدد طلب کی گئی ہے، چیئرمین انٹربورڈ غلام علی نے خبردار کیا ہے کہ واٹس ایپ پر پرچہ اپ لوڈ کرنے والوں کے خلاف سخت کارروائی ہوگی۔

    ہنگامی صورت حال میں ریسکیو 1122 کی ایمبولینسیں تعینات ہوں گی، فرسٹ ایڈ کیمپس، فرسٹ ایڈ باکس اور ایمبولینس ہر امتحانی مرکز کے باہر موجود ہوں گے، جب کہ کمشنر آفس اور بورڈ آفس میں مانیٹرنگ سیلز قائم کر دیے گئے ہیں۔

  • رٹہ سسٹم کا خاتمہ کیسے کیا جا رہا ہے؟ ڈاکٹر غلام علی ملاح کا اہم بیان

    رٹہ سسٹم کا خاتمہ کیسے کیا جا رہا ہے؟ ڈاکٹر غلام علی ملاح کا اہم بیان

    کراچی: انٹر بورڈ کوآرڈینیشن کمیشن کے ایگزیکٹو ڈائریکٹر ڈاکٹر غلام علی ملاح نے امتحانات کے طریقہ کار میں تبدیلی کے حوالے سے اہم بیان میں کہا ہے کہ رٹہ سسٹم کا خاتمہ کیا جا رہا ہے۔

    پاکستان کے شعبہ امتحان میں جدت اور ڈیجٹلائزیشن کا سفر بیان کرنے کے لیے انٹر بورڈ کوآرڈینیشن کمیشن کی جانب سے سال 2024 کی سالانہ کارکردگی رپورٹ جاری کی گئی ہے، اس سلسلے میں منعقد ہونے والے اجلاس کی صدارت ایگزیکٹو ڈائریکٹر آئی بی سی سی ڈاکٹر غلام علی ملاح نے کی، جس میں ڈی جی آئی بی سی سی سمیت ڈائریکٹرز نے شرکت کی۔

    ایگزیکٹو ڈائریکٹر آئی بی سی سی ڈاکٹر غلام علی ملاح نے کہا کہ آئی بی سی سی ملک میں شفاف، جامع اور عالمی معیار کے نظام امتحان کے لیے کوشاں ہے، ماڈل اسسمنٹ فریم ورک کے تحت ملک میں رٹہ سسٹم کا خاتمہ کر رہے ہیں، سالانہ رپورٹ میں بھی کہا گیا ہے کہ رٹہ سسٹم کے خاتمے کے لیے ماڈل اسسمنٹ فریم ورک (MAF) کا اجرا کیا گیا ہے۔

    رپورٹ کے مطابق فریم ورک سے اسسمنٹ کے طریقہ کار کو قومی نصاب اور عالمی معیار کے ہم آہنگ بنایا گیا، اور ڈیجیٹل ٹرانسفارمیشن کے تحت ایکسپریس اٹیسٹیشن سروسز متعارف کروائی گئی، جس کے تحت 30 منٹ میں تصدیق کروائی جا سکتی ہے۔

    کیو آر کوڈ پر مبنی ڈیجیٹل اٹیسٹیشن اور ٹریکنگ سسٹم کے اجرا کے ساتھ ساتھ 2024 میں طلبہ کے لیے ڈیجیٹل پیمنٹس کا نظام بھی متعارف کروایا گیا ہے، اور ای گورننس کے تحت اسٹاف کی حاضری اور چھٹیوں کے مربوط ڈیجیٹل نظام کا نفاذ کیا گیا، رپورٹ میں کہا گیا ہے کہ آئی بی سی سی 10 نکاتی گریڈنگ سسٹم کے نفاذ میں کامیاب رہا، اور ملک میں پاسنگ مارکس کو 33 فی صد سے بڑھا کر 40 فی صد کیا گیا۔

    رپورٹ میں یہ بھی کہا گیا ہے کہ 2024 میں پیرسن، آکسفورڈ اور کیمبرج سمیت اہم عالمی اداروں کے ساتھ تعلیمی روابط میں اضافہ ہوا ہے۔

  • امتحانات کا تیسرا روز، کس شفٹ میں‌ کس جماعت کا پرچہ ہے؟

    امتحانات کا تیسرا روز، کس شفٹ میں‌ کس جماعت کا پرچہ ہے؟

    کراچی: میٹرک بورڈ کے سالانہ امتحانات کا آج تیسرا روز ہے، آج صبح کی شفٹ میں نویں جماعت سائنس گروپ کا حیاتیات (بائیولوجی) کا پرچہ لیا جائے گا۔

    میٹرک بورڈ کے مطابق امتحانات کا وقت صبح کی شفٹ میں ساڑھے 9 سے سہ پہر ساڑھے 12 بجے تک مقرر کیا گیا ہے، دوپہر کی شفٹ میں جنرل گروپ کا دسویں جماعت کا انگریزی کا پرچہ لیا جائے گا، اور پرچے کا وقت 2.30 بجے سے 5.30 بجے تک وقت مقرر کیا گیا ہے۔

    نہم و دہم جماعت کے سالانہ امتحانات کے لیے 499 امتحانی مراکز قائم کیے گئے ہیں، امتحانی مراکز پر دفعہ 144 نافذ کیا گیا ہے، 3 لاکھ 75 ہزار طلبہ و طالبات سائنس و جنرل گروپ ریگولر اور پرائیویٹ کے امتحانات میں شریک ہیں۔

    کراچی: میٹرک امتحانات میں لوڈشیڈنگ: طلبہ شدید گرمی میں پرچے حل کرنے پر مجبور

    امتحانی مراکز میں کسی بھی قسم کی ڈیوائس یا موبائل فون ملنے کی صورت میں اسے ضبط کر لیا جائے گا، امتحانی مراکز کے اطراف میں فوٹو اسٹیٹ کی مشینیں دوران امتحان بند رہیں گی، کے الیکٹرک سے امتحانات کے دوران لوڈ شیڈنگ نہ کرنے کی تحریری درخواست کی گئی ہے۔

    ادھر ذرائع نے انکشاف کیا ہے کہ کراچی میٹرک بورڈ میں غیر قانونی طور پر امتحانی مراکز تبدیل کیے گئے ہیں، جس پر امتحانی مراکز تبدیل کرنے والے 3 کلرکوں کو معطل کر دیا گیا ہے، کنٹرولر میٹرک بورڈ کے احکامات کے بعد آٸی ٹی ڈیپارٹمنٹ کو تالے لگ گٸے، آٸی ٹی ڈیپارٹمنٹ کو تاحال اگلے احکامات پر بند رکھنے کی ہدایت کی گئی ہے۔ مشتعل افراد نے آئی ٹی ڈیپارٹمنٹ پر پتھراؤ بھی کیا جس سے شیشے ٹوٹے، اور ناظم امتحانات ظہیر الدین بھٹو زخمی ہوئے۔

  • میٹرک امتحانات کب شروع ہوں گے؟ فیصلہ ہو گیا

    میٹرک امتحانات کب شروع ہوں گے؟ فیصلہ ہو گیا

    کراچی سمیت سندھ بھر میں ہر سال میٹرک کے امتحانات کا انعقاد مارچ میں کیا جاتا ہے تاہم اس بار رمضان المبارک کے باعث نیا شیڈول مرتب کیا گیا ہے۔

    اے آر وائی نیوز کے مطابق کراچی سمیت سندھ بھر میں اس سال نویں اور دسویں جماعت کا شیڈول تبدیل کر دیا گیا ہے اور تحریری امتحانات سے قبل پریکٹیکل امتحانات لینے کا فیصلہ کیا گیا ہے۔

    محکمہ تعلیم کی اسٹیئرنگ کمیٹی نے طلبہ وطالبات کے والدین کی درخواست پر میٹرک امتحانات کا شیڈول تبدیل کر دیا ہے اور اب یہ امتحانات عید کے بعد منعقد ہوں گے۔

    کراچی سمیت سندھ بھر میں اس سال نویں اور دسویں جماعت کے تحریری امتحانات 7 اپریل سے شروع ہوں گے اور 25 اپریل تک جاری رہیں گے۔

    اس سے قبل پریکٹیکل امتحانات کا انعقاد 10 مارچ سے ہوگا۔

    میٹرک امتحانات کے بعد فرست ایئر اور سیکنڈ ایئر کے امتحانات کا سلسلہ 28 اپریل سے شروع ہوگا

    اسٹیئرنگ کمیٹی کے فیصلے مطابق اس بار صوبے بھر میں نیا تعلیمی سال بھی اگست کے بجائے 7 اپریل سے شروع ہوگا۔

    ملک کے دیگر صوبوں میں میٹرک امتحانات درج ذیل شیڈول کے مطابق ہوں گے۔

    فیڈرل بورڈ

    فیڈرل بورڈ کے تحت میٹرک کے سالانہ امتحانات کی تاریخ کا اعلان کردیا گیا جس کے تحت امتحانات 18مارچ سے شروع ہوں گے، جبکہ 28 مارچ سے 3 اپریل تک امتحانات کی تعطیلات ہوں گی۔

    عیدالفطر کی چھٹیاں ہوں گی ، عید کے بعد پہلا امتحان 4 اپریل کوہوگا جبکہ پریکٹیکل 28اپریل سے شروع ہوں گے۔ فیڈرل بورڈ کے مطابق امتحانی مراکز میں موبائل فون اوراسمارٹ واچ لانے پر پابندی ہوگی۔

    پنجاب

    پنجاب میں میٹرک کے سالانہ امتحانات 4 مارچ 2025 سے شروع ہونے والے ہیں۔ ڈیٹ شیٹ کے تحت پہلے گروپ کا پہلا پرچہ عربی جبکہ دوسرے گروپ کا پہلا پرچہ تاریخ کا ہوگا۔

    5 مارچ 2025 دونوں گروپ انگریزی لازمی کا پرچہ دیں گے۔ 6 مارچ 2025 کو اکنامکس، ہیلتھ اور فزیکل ایجوکیشن کے پرچے ہیں۔ اس کے بعد 7 مارچ 2025 کو دونوں گروپوں بیالوجی اور کمپیوٹر سائنس کا امتحان دیں گے۔

    اس سال میٹرک کے امتحانات رمضان المبارک میں ہیں۔ مہینوں کی تیاری کے بعد امیدوار نتائج دیکھنے اور دوسری کلاسوں میں منتقلی ہونے کیلیے بے تاب ہیں۔

    پنجاب بورڈز کی طرف سے 10ویں کلاس کی ڈیٹ شیٹ کے اجرا کے ساتھ طلبہ کو مطالعے کی مؤثر طریقے سے منصوبہ بندی کا موقع ملے گا۔

    خیبرپختونخوا

    خیبرپختونخوا میں میٹرک اور انٹر کے سالانہ امتحانات ملتوی کرنے کا اعلامیہ جاری کیا گیا تھا، جس کے مطابق وزیراعلیٰ کی ہدایت پرپشاور بورڈ نے میٹرک امتحانات کا شیڈول تبدیل کر دیا تھا۔

    اعلامیہ میں کہا گیا تھا کہ پشاور بورڈ کے زیراہتمام امتحانات 8 اپریل کو عید کے بعد شروع ہوں گے۔ میٹرک کےامتحانات پہلے 15 مارچ سےشروع ہونے تھے۔

  • کراچی میں انٹر کے امتحانات کا آج سے آغاز، دفعہ 144 نافذ

    کراچی میں انٹر کے امتحانات کا آج سے آغاز، دفعہ 144 نافذ

    کراچی: شہر قائد میں انٹر کے امتحانات کا آغاز آج سے ہوگا، شہر میں 180 امتحانی مراکز قائم کر دیئے گئے۔

    اے آر وائی نیوز کے مطابق 26 امتحانی سینٹرز کو حساس قرار دیا گیا ہے، جبکہ رینجرز اہلکار سیکورٹی کے فرائض انجام دیں گے، انٹر کے امتحانات صبح و شام کی شفٹوں میں لیے جائیں گے۔

    امتحانات میں 1 لاکھ 39 ہزار طلبہ حصہ لیں گے، صبح میں پری انجینئرنگ، پری میڈیکل اور ہوم اکنامکس گروپ کا امتحان ہوگا، شام کی شفٹ میں جنرل سائنس گروپ کے پرچے لئے جائیں گے۔

    ذرائع کے مطابق آج صبح کی شفٹ میں 12 ویں جماعت کا انگلش لازمی کا پرچہ ہوگا، شام کی شفٹ میں بارہویں جماعت کا فزکس کا پرچہ لیا جائے گا جبکہ امتحانی مراکز کے اطراف دفعہ 144 نافذ ہوگی۔

    ہیٹ ویو کے باعث ملتوی ہونے والے میٹرک امتحانات آج سے دوبارہ شروع

    واضح رہے کہ ہیٹ ویو کے باعث ملتوی ہونے والے میٹرک امتحانات کا بھی آغاز ہوچکا ہے۔

  • نویں اور دسویں کے طالب علموں کے لئے اہم خبر

    نویں اور دسویں کے طالب علموں کے لئے اہم خبر

    کراچی : ثانوی تعلیمی بورڈ کے تحت نویں اور دسویں جماعت کے سالانہ امتحانات کل 8 مئی سے شروع ہوں گے۔ صبح کی شفٹ میں سائنس گروپ جبکہ دوپہر کی شفٹ میں جنرل گروپ کے امتحانات لئے جائیں گے۔

    تفصیلات کے مطابق ناظم امتحانات حبیب اللہ سہاگ نے کہا ہے کہ اس سال نہم و دہم جماعت کیلئے بورڈ کی طرف سے ایڈمٹ کارڈ آن لائن جاری کئے گئے ہیں مجموعی طور پر 3لاکھ 93ہزار264 طلباء و طالبات سائنس و جنرل گروپ ریگولر اور پرائیویٹ کے امتحانات دیں گے جبکہ بورڈ نے 524 امتحانی مراکز قائم کئے ہیں جس میں طلباء کیلئے 279اور طالبات کیلئے245 امتحانی مراکز بنائے گئے ہیں جس میں سرکاری اسکول اورنجی اسکول شامل ہیں۔

    اس دفعہ 19 حب امتحانی سینٹر بنائے گئے ہیں جو کراچی کے مختلف 18 ٹاؤنز میں قائم کئے گئے ہیں وہاں پر بورڈ کے آفیسرز امتحانی پرچوں کی ترسیل پر مامور ہیں۔ امتحانات کے دوران امتحانی سینٹر کے باہر ہدایات آویزاں کی گئی ہیں کہ کسی بھی قسم کی ڈیوائس، موبائل فون یا کسی بھی قسم کے نقل کا موادہر گز اپنے ساتھ نہ لائیں۔ تمام امتحانی مراکز پر دفعہ 144 نافذ کرنے کیلئے قانون نافذ کرنے والے اداروں کو بورڈ سے لیٹر جاری کئے گئے ہیں۔

    ثانوی تعلیمی بورڈ کراچی کے ناظم امتحانات حبیب اللہ سہاگ نے تمام امتحانی مراکز کے سینٹر سپرنٹنڈنٹ کو ہدایت کی ہے کہ بورڈ سے جاری کئے گئے امیدواروں کے ایڈمٹ کارڈ میں پرچہ کمپیوٹر، ہائیکو، اسلامیات، ایتھکس، اردو سلیس، سندھی اور تصویر، نام یا کسی بھی قسم کی غلطی کی صورت میں اسے امتحانی پر چہ دینے سے نہ روکیں اسے امتحان میں بیٹھنے کی اجازت ضرور دیں ان کے ایڈمٹ کارڈ کی غلطی کو امتحانات کے اختتام کے بعد درست کر دیا جائے گا اور کسی بھی قسم کی معلومات کے لیے بورڈ آفس کی آفیشل ویب سائٹ اور فیس بک پیج یا بورڈ آفس کے کسی بھی مجاز نمائندے سے معلومات حاصل کرسکتے ہیں۔

    انہوں نے بتایا کہ بعد ازاں صبح کی شفٹ میں سائنس گروپ جبکہ دوپہر کی شفٹ میں جنرل گروپ کے امتحانات لئے جائیں گے۔ 8مئی کو (صبح) نہم جماعت کمپیوٹر اسٹیڈیز(نظری)، (دوپہر) دہم جماعت جنرل گروپ جنرل سائنس۔9مئی کو (صبح)دہم جماعت کمپیوٹر اسٹیڈیز (نظری)، (دوپہر) جنرل گروپ نہم و دہم جماعت اردو (لازمی) نارمس کورس، سندھی نارمل کورس (لازمی)،انگریزی ادب، جغرافیہ آف پاکستان پرچہ اول،10مئی (صبح) نہم و دہم جماعت حیاتیات (نظری)، (دوپہر) جنرل گروپ دہم جماعت انگریزی (لازمی) پرچہ دوم، 11مئی (صبح)انگریزی (لازمی) پرچہ دوم، (دوپہر) جنرل گروپ نہم و دہم جماعت علم شہریت، علم بدن وحفظان صحت، تاریخ ہندو پاکستان، غذا اور تغزیہ نظری، کمپیوٹر اسٹیڈیز (اختیاری، نظری)، 12مئی(صبح) نہم و دہم جماعت کیمیا (نظری)، (دوپہر) جنرل گروپ دہم جماعت مطالعہ پاکستان، 13مئی(صبح) دہم جماعت ریاضی (پرچہ دوم)، (دوپہر) جنرل گروپ نہم و دہم جماعت انگریزی (لازمی) پرچہ اول،15مئی (صبح) نہم و دہم جماعت طبیعات (نظری)، دوپہر (جنرل گروپ)دہم جماعت ریاضی، 16مئی(صبح)دہم جماعت حیاتیات نظری(پرچہ دوم)، (دوپہر) جنرل گروپ نہم جماعت جنرل سائنس، 17مئی (صبح) نہم جماعت ریاضی(پرچہ اول)، (دوپہر) جنرل گروپ دہم جماعت سندھی سلیس (لازمی)، اردو سلیس (لازمی)، اردو متبادل کورس، جغرافیہ آف پاکستان پرچہ اول، 18مئی (صبح) دہم جماعت کیمیا نظری (پرچہ دوم)،دوپہر (جنرل گروپ)نہم جماعت اسلامیات (لازمی)،مذہبی مطالعہ، انگلش لٹریچر،19مئی (صبح) نہم و دہم جماعت ا ردو نارمل کورس (لازمی)، سندھی سلیس نارمل کورس (لازمی) جغرافیہ آف پاکستان پرچہ اول، (دوپہر)دہم جماعت تجارتی جغرافیہ،(پرچہ دوم)، جغرافیہ اختیاری (پرچہ دوم)، ملبوسات و پرچہ بافی (پرچہ دوم)،20مئی(صبح) دہم جماعت طبیعات نظری (پرچہ دوم)،(دوپہر)جنرل گروپ نہم ودہم جماعت تجارتی جغرافیہ (پرچہ اول)، جغرافیہ (اختیاری (پرچہ اول)،ملبوسات و پارچہ بافی،22 مئی (صبح) نہم و دہم جماعت انگریزی پرچہ اول (لازمی)، (دوپہر) جنرل گروپ دہم جماعت معاشیات (پرچہ دوم)، انتظام برائے اصلاح خانہ، تاریخ اسلام، اسلامک اسٹیڈیز (پرچہ دوم)، 23مئی(صبح) دہم جماعت سندھی سلیس(لازمی)، اردو سلیس (لازمی)، اردو متبادل کورس، جغرافیہ آف پاکستان پرچہ دوم، (دوپہر) جنرل گروپ نہم ودہم جماعت ریاضی (پرچہ اول)، 24مئی (صبح) نہم و دہم جماعت اسلامیات (لازمی)، مذہبی مطالعہ، (دوپہر)جنرل گروپ دہم جماعت جیومیٹریکل اینڈ ٹیکنیکل ڈرائنگ، بچے کی نشوونمااور خاندانی زندگی، آرٹ اینڈ ماڈل ڈرائنگ پرچہ دوم (نظری)،25مئی(صبح)دہم جماعت مطالعہ پاکستان، (دوپہر) جنرل گروپ نہم و دہم جماعت معاشیات (پرچہ اول)، انتظام برائے اصلاح خانہ (پرچہ اول)،اسلامک اسٹیڈیز، تاریخ اسلام پرچہ اول، 26مئی (دوپہر) دہم جماعت (جنرل گروپ) علم شہریت (پرچہ دوم) علم و بدن و حفظان صحت (پرچہ دوم)، تاریخ ہندو پاکستان (پرچہ دوم)، غذا اور تغذیہ نظری (پرچہ دوم) صرف طالبات کیلئے)، کمپیوٹر اسٹیڈیز (اختیاری)، (پرچہ دوم) نظری، 27مئی (دوپہر) نہم و دہم جماعت بریل نظری(پرچہ اول)، عربی (پرچہ اول)، فارسی (پرچہ اول)، حسابات خانہ داری اور متعلقہ مسائل، 29مئی (دوپہر) جنرل گروپ دہم جماعت بریل نظری(پرچہ دوم)، عربی پرچہ دوم، فارسی پرچہ دوم،30 مئی (دوپہر)جنرل گروپ نہم و دہم جماعت اردو ادب ختیاری(پرچہ دوم)، سندھی ادب اختیاری (پرچہ دوم)، انگریزی ادب اختیاری (پرچہ دوم)، آرٹ اینڈ ماڈل ڈرائنگ عملی(پرچہ دوم)،31مئی(دوپہر) جنرل گروپ دہم جماعت اردو ادب ختیاری(پرچہ دوم)، سندھی ادب اختیاری (پرچہ دوم)، انگریزی ادب اختیاری (پرچہ دوم)، آرٹ اینڈ ماڈل ڈرائنگ عملی (پرچہ دوم)، یکم جون (دوپہر) جنرل گروپ نہم و دہم جماعت جیو میٹریکل اینڈ ٹیکنیکل ڈرائنگ (پرچہ اول)، بچے کی نشوونما اور خاندانی زندگی (پرچہ او) صرف طالبات کیلئے)، آرٹ اینڈ ماڈل ڈرائنگ نظری (پرچہ اول) کے امتحانات لئے جائیں گے۔

  • امتحانات آؤٹ سورس، سوال نامہ بورڈ، جوابات کی کاپی تھرڈ پارٹی فراہم کرے گی

    امتحانات آؤٹ سورس، سوال نامہ بورڈ، جوابات کی کاپی تھرڈ پارٹی فراہم کرے گی

    کراچی: محکمہ تعلیم سندھ نے امتحانات آؤٹ سورس کرنے کے فیصلے کے بعد یہ طے کیا ہے کہ مکمل امتحانات نہ سہی لیکن کچھ سروس تھرڈ پارٹی سے لی جائے گی۔

    تفصیلات کے مطابق آج منگل کو کراچی میں وزیر جامعات و بورڈز کی زیر صدارت تعلیمی بورڈز کے چیئرمینز کا اجلاس منعقد ہوا، جس میں طے کیا گیا کہ امتحانات آؤٹ سورس کرنے سے متعلق ٹینڈر محکمہ بورڈز جاری کرے گا۔

    اجلاس میں یہ بھی طے کیا گیا کہ تمام بورڈز کم از کم ایک مرحلے کو آؤٹ سورس کریں گے۔

    وزیر جامعات و بورڈز اسماعیل راہو نے کہا کہ امتحانی شیڈول کسی صورت متاثر نہیں ہوگا،آؤٹ سورس کا فیصلہ امتحانی نظام کو شفاف بنانے کے لیے کیا گیا ہے، اور تھرڈ پارٹی کو رقم کی ادائیگی بورڈز کریں گے۔

    انھوں نے کہا مکمل امتحانات نہ سہی لیکن کچھ سروس تھرڈ پارٹی سے لی جائے گی، بورڈز کا کردار ختم نہیں ہوگا، امتحانات منعقد کرانا بورڈز کا ہی کام ہے۔

    اساتذہ نے امتحانی نظام آؤٹ سورس کرنےکا فیصلہ مسترد کر دیا

    اسماعیل راہو کا کہنا تھا کہ سوال نامہ بورڈ بنائے گا، اور جوابات کی کاپی تھرڈ پارٹی فراہم کرے گی۔

    وزیر جامعات کے مطابق رواں برس امتحانات آؤٹ سورس کرنے کا معاملہ بورڈز کی صوابدید پر ہوگا، جب کہ اگلے برس سے لازمی کچھ سروس آؤٹ سورس کرنا ہوگی۔

  • انٹر کے امتحانات میں فیل ہونے کا خوف، طلبہ نے خودکشی کرلی

    انٹر کے امتحانات میں فیل ہونے کا خوف، طلبہ نے خودکشی کرلی

    حیدرآباد: بھارت میں ایک لڑکی نے انٹر کے امتحانات میں فیل ہوجانے کے خوف سے پھانسی لگا کر خود کشی کرلی۔

    بھارتی میڈیا رپورٹ کے مطابق بھارت کے شہر حیدرآباد کے علاقے مادھا پور میں انٹرمیڈیٹ کے امتحانات میں فیل ہونے کے امکانی خوف سے ایک لڑکی نے خودکشی کرلی۔

    مادھا پور کی پولیس نے بتایا کہ دیویا نامی 17 سالہ لڑکی انٹر میڈیٹ میں زیرِ تعلیم تھی، خاندانی مسائل کی وجہ سے وہ تعلیم پر توجہ دینے سے قاصر تھی۔

    طلبہ کو اس بات کا خوف تھا کہ وہ امتحانات میں ناکام ہوجائے گی، اسی خوف میں کل اس نے پھانسی لے لی۔