جے یو آئی سربراہ مولانا فضل الرحمان نے کہا ہےکہ اسلامی دنیا کے حکمران امریکی کٹھ پتلی کا کردار ادا کر رہے ہیں امت مسلمہ کو غزہ کیلیے کھڑا ہونا ہوگا۔
اے آر وائی نیوز کے مطابق جمعیت علمائے اسلام (ف) کے زیر اہتمام کراچی میں اسرائیل مردہ باد مارچ ہوا، جس میں لوگوں کی بڑی تعداد نے شرکت کی۔
اسرائیل مردہ مارچ کےشرکا سے جے یو آئی کے سربراہ مولانا فضل الرحمان نے خطاب کرتے ہوئے کہا کہ اسرائیل نے مقدس سر زمین پر قبضہ کیا ہوا ہے اور مظلوم فلسطینی مسلمانوں کی نسل کشی کر رہا ہے جب کہ اسلامی دنیا کے حکمران امریکی کٹھ پتلی کا کردار ادا کر رہے ہیں۔ اب اسرائیلی مظالم کیخلاف متحد ہوکر سامنے آنے کا وقت آ گیا ہے۔ مسلم امہ اپنے حکمرانوں کی پروا کیے بغیر غزہ کے مظلوم مسلمانوں کے لیے کھڑی ہو جائے۔
فضل الرحمان نے کہا کہ اسرائیل بنا تو بانی پاکستان قائداعظم نے اسے برطانیہ کا ناجائز بچہ کہا تھا۔ جو اسرائیل کو تسلیم کرنے کیلیے فضا بنا رہے تھے، ہم نے ان کا نظریہ رد کر دیا۔ کوئی اسرائیل کو تسلیم کرنےکا سوچ رہا ہے تو ذہن سے نکال دے۔ کسی کے بھی کہنے پر اسرائیل کو تسلیم نہیں کریں گے۔
ان کا کہنا تھا کہ پہلے اسرائیلی صدر نے کہا تھا کہ نوزائیدہ اسلامی ریاست (پاکستان) کاخاتمہ خارجہ پالیسی کا حصہ ہے اور آج بھی اسرائیلی وزیراعظم پاکستان کو سب سے بڑا خطرہ کہتا ہے۔ پاکستانیوں کی تکبیر کے نعرے سے صہیونی قوتیں لرز رہی ہیں۔ ایوان تو بک جاتے ہیں، ہمارے ہاتھ میں ایوان نہیں بلکہ میدان ہے۔ اب اسرائیل، امریکا اور یورپ کی غلامی سےکام نہیں چلےگا۔ سب کو عوام کے جذبات کا احترام کرنا ہوگا۔
فضل الرحمان نے کہا کہ فلسطین میں بچوں اور خواتین کی شہادت حکمرانوں کونہیں جگا سکی، لیکن جے یو آئی روز اول سے فلسطین کے مؤقف کی حمایت کرتی رہی ہے۔ خون کے آخری قطرے تک فلسطینی عوام کے ساتھ رہیں گے۔ آج کے اجتماع سے پیغام دیا کہ مظلوم فلسطینی تنہا نہیں۔ 27 مارچ کو لاہور میں فلسطین مارچ کریں گے۔
جے یو آئی سربراہ نے مزید انسانی حقوق کے علمبرداروں کو آئینہ دکھاتے ہوئے کہا کہ وہ افغانستان اور سعودی عرب میں سزائے موت پر تو احتجاج کرتے ہیں، لیکن مسئلہ فلسطین اور غزہ کے مسلمانوں کی نسل کشی پر خاموش ہیں۔ فلسطین میں 60 ہزار افراد کو لقمہ اجل بنا کر بھی یورپ کی آگ ٹھنڈی نہیں ہوئی۔ یورپ اور امریکا کی نظر میں مسلمانوں کا خون سستا کیوں ہے؟
https://urdu.arynews.tv/bangladesh-one-million-people-oath-boycott-of-israel-product/
