کراچی : معروف قوال امجد صابری کے قتل کے ماسٹر مائنڈ حافظ قاسم رشید سے تفتیش کے لئے جےآئی ٹی تشکیل دینے کا فیصلہ کرلیا گیا۔
تفصیلات کے مطابق معروف قوال امجدصابری کے قتل کے ماسٹر مائنڈ حافظ قاسم رشید کی گرفتاری کے معاملے پر ملزم سے تفتیش کے لئے جے آئی ٹی تشکیل دینے کا فیصلہ کرلیا گیا۔
پولیس نے بتایا کہ جےآئی ٹی تشکیل دینےکیلئے خط لکھ دیا گیا ہے،ذرائع کا کہنا ہے کہ جےآئی ٹی میں پولیس،دیگراداروں کےافسران بھی شامل ہوں گے اور جےآئی ٹی ملزم سےامجدصابری قتل سےمتعلق تحقیقات کرے گی۔
یاد رہے 24 اکتوبر کو محکمہ انسداد دہشت گردی (سی ٹی ڈی) نے کارروائی کرتے ہوئے کالعدم لشکر جھنگوی کے خطرناک ملزم قاسم رشید کو گرفتار کیا تھا ، سی ٹی ڈی نے بتایا تھا کہ ملزم حال ہی میں جیل سے رہا ہوا اور ساتھیوں کو دوبارہ فعال کررہاتھا، گرفتار ملزم قاسم کی جیل سے ہدایت پر عاصم کیپری اور اسحاق بوبی نے امجد صابری کو قتل کیا۔
واضح رہے کہ سال 2016 میں رمضان میں لیاقت پل کے نزدیک معروف قوال امجد صابری کو نامعلوم مسلح افراد نے فائرنگ کرکے اس وقت قتل کردیا گیا تھا جب وہ ایک نجی چینل کی رمضان ٹرانسمیشن میں شرکت کیلئے جارہے تھے۔
جس کے بعد اسحاق بوبی،عاصم کیپری کو گرفتار کیا گیا، ملزمان کیخلاف امجدصابری مقدمات زیرِ سماعت ہیں، بعد ازاں حکومتِ سندھ نے امجد صابری کیس کے مرکزی ملزمان کے مقدمات فوجی عدالت میں بھیجنے کا فیصلہ کرتے ہوئے منظوری دیدی تھی۔
