ٹرمپ انتظامیہ 36 مزید ممالک کے شہریوں کے امریکا میں داخلے پر پابندی کا ارادہ رکھتی ہے، اس سے قبل یہ پابندی 12 ممالک کے شہریوں پر لگائی گئی تھی۔
غیر ملکی خبر رساں ادارے کی رپورٹ کے مطابق ٹرمپ انتظامیہ امریکا میں داخلے پر پابندیوں کے معاملے کو مزید وسعت دینے پر غور کر رہی ہے، جس کے تحت 36 ممالک کے شہریوں کو امریکہ میں داخل ہونے سے روکا جا سکتا ہے۔
نئی امریکی پالیسی کے تحت ٹرمپ انتظامیہ مزید 36 ممالک کے شہریوں کے داخلے پر پابندی عائد کرنے کا ارادہ رکھتی ہے۔
رپورٹ کے مطابق نئی امریکی پالیسی کے تحت منصوبے میں 25 افریقی ممالک شامل ہیں جن میں مصر اور جیبوتی جیسے امریکہ کے اہم شراکت دار بھی ہیں، اس کے علاوہ کیریبین، وسطی ایشیا اور بحرالکاہل کے متعدد جزیروں کے ممالک بھی پابندی کی فہرست میں شامل ہو سکتے ہیں۔
رائٹرز کو موصول ہونے والے اسٹیٹ ڈپارٹمنٹ کیبل میں کہا گیا ہے کہ یہ اقدام غیر قانونی ہجرت کے خلاف صدر ٹرمپ کی مہم میں ایک نیا قدم ہوگا۔
مذکورہ یادداشت وزیر خارجہ مارکو روبیو کی جانب سے دستخط شدہ ہے اور ہفتے کو متعلقہ امریکی سفارت کاروں کو بھیجی گئی ہے، جس میں کہا گیا ہے کہ پابندی کی زد میں آنے والے ممالک کو 60 دن کی مہلت دی گئی ہے کہ وہ نئی شرائط کو پورا کریں۔
رپورٹ کے مطابق کچھ ممالک میں ایسے شہری بھی زیادہ تعداد میں ہیں جن کی ویزا کی میعاد ختم ہو چکی ہے مگر وہ امریکہ میں تاحال موجود ہیں، مزید یہ کہ بعض شہری امریکہ کے خلاف سرگرمیوں میں ملوث بھی رہے ہیں۔
اس یادداشت میں مزید کہا گیا ہے کہ اگر کوئی ملک تیسرے ملک کے شہریوں کو واپس قبول کرنے کے لیے تیار ہوجائے تو اس کی ویزا پابندیاں نرم کی جا سکتی ہیں۔
مزید پڑھیں : امریکی صدر نے 12 ممالک پر سفری پابندی کا اعلان کردیا
واضح رہے کہ اسی مہینے کے آغاز میں ریپبلکن صدر نے ایک حکم نامہ پر دستخط کیے تھے جس کے تحت 12 ممالک کے شہریوں کے داخلے پر پابندی لگا دی گئی تھی۔
اس حوالے سے ان کا کہنا تھا کہ یہ اقدام امریکہ کو غیر ملکی دہشت گردوں اور دیگر قومی سلامتی کے خطرات سے بچانے کے لیے ضروری ہے۔
