واشنگٹن: امریکا میں ایک انجن والا چھوٹا طیارہ گر کر تباہ ہوگیا جس کے نتیجے میں پائلٹ ہلاک ہوگیا۔
غیرملکی خبررساں ادارے کی رپورٹ کے مطابق امریکی ریاست کولوراڈو میں گھریلو طور پر تیار کیا جانے والا چھوٹا طیارہ ایئرپورٹ کے نزدیک مرکزی شاہراہ پر گر کر تباہ ہوگیا جس کے نتیجے میں پائلٹ ہلاک ہوگیا۔
ڈیلٹا پولیس، فائر فائٹرز اور ایمبولینس جائے وقوعہ پر فوری طور پر پہنچیں، فائر فائٹرز نے طیارے میں لگنے والی آگ پر قابو پایا اور ہلاک پائلٹ کی لاش کو اسپتال منتقل کیا گیا۔
عینی شاہدین کے مطابق طیارہ فضا میں ہچکولے کھا رہا تھا، پائلٹ نے پیراشوٹ کے ذریعے ایمرجنسی لینڈنگ کی کوشش کی لیکن وہ ناکام رہا ہے اور طیارہ مرکزی شاہراہ پر گر کر تباہ ہوگیا۔
مزید پڑھیں: امریکا میں ایک انجن والا طیارہ گر کر تباہ
ایوی ایشن حکام کا کہنا ہے کہ طیارہ گھریلو طور پر بنائے جانے والے طیاروں کی ایک شکل ہے، ایک انجن اور کم وزن والے ایسے طیارے نجی طور پر تیار کیے جاتے ہیں، ان طیاروں میں ہنگامی لینڈنگ کے دوران پیراشوٹ کا استعمال کیا جاتا ہے۔
رپورٹ کے مطابق طیارہ گرنے کی تحقیقات کے لیے انکوائری کمیٹی تشکیل دے دی گئی ہے۔
واضح رہے کہ رواں سال فروری میں امریکی ریاست فلوریڈا میں ایک انجن والا طیارہ قریبی آبادی میں گر کر تباہ ہوگیا تھا جس کے نتیجے میں معمر جوڑا ہلاک ہوگیا تھا۔
