بیجنگ: پاناما نے ’بی آر آئی‘ سے دست بردار ہونے کا اعلان کیا ہے، جس پر چین نے امریکی مداخلت کے خلاف سخت رد عمل ظاہر کیا ہے۔
غیر ملکی میڈیا رپورٹس کے مطابق پاناما کی ’بیلٹ اینڈ روڈ انیشی ایٹو‘ سے دست برادری پر امریکا پر کڑی تنقید کرتے ہوئے چینی وزارتِ خارجہ نے کہا کہ واشنگٹن کی سرد جنگ کی ذہنیت ابھی ختم نہیں ہوئی۔
ترجمان وزارت خارجہ لن جیان نے کہا ہم بیلٹ اینڈ روڈ انیشی ایٹو کے نقصان پر امریکا کی مذمت کرتے ہیں، امریکا چین کے اندرونی معاملات میں مداخلت اور مفادات کو نقصان پہنچا رہا ہے۔
انھوں نے کہا بیلٹ اینڈ روڈ تعاون کو امریکی دباؤ اور زبردستی کے ذریعے سبوتاژ کرنا، اور بی آر آئی پر مفاہمت کی یادداشت کی تجدید نہ کرنے کا پاناما کا فیصلہ افسوس ناک ہے۔
امریکی دھمکیاں، کینیڈا کے وزیراعظم نے ساتھیوں کو خبردار کردیا
واضح رہے کہ پاناما نے اعلان کیا ہے کہ وہ چین کے ساتھ بیلٹ اینڈ روڈ تعاون کے معاہدے سے دست بردار ہو رہا ہے، اس طرح وہ پہلا لاطینی امریکی ملک بن گیا ہے جو چین کے بیلٹ اینڈ روڈ منصوبے سے باہر نکلا ہے، صدر حوزے راؤل ملینو نے کہا کہ انھوں نے ہدایت کر دی ہے کہ حکام بیجنگ کو 90 دن میں دست برداری کا نوٹس بھیجے۔
بی آر آئی 150 سے زائد ممالک کی شراکت والا اقتصادی تعاون کا منصوبہ ہے، جس میں 20 سے زائد لاطینی امریکی اور کیریبین ممالک بھی شامل ہیں۔ ترجمان وزارت خارجہ نے کہا کہ وہ امید کرتے ہیں کہ پاناما مجموعی دوطرفہ تعلقات اور دونوں ملکوں کے طویل المدتی مفادات کو مدنظر رکھتے ہوئے بیرونی مداخلت کے دباؤ میں نہیں آئے گا اور درست فیصلہ کرے گا۔
