پیرس: دو امریکی سیاحوں کو پیر کے روز فرانس کی مشہور ترین یادگار ایفل ٹاور کی چھت پر نشے کی حالت میں کھلے آسمان تلے سوتا پایا گیا، جو گزشتہ رات سیکیورٹی کو چکمہ دے کر ممنوعہ ایریا میں رات گزارنے چلے گئے تھے۔
تفصیلات کے مطابق ایفل ٹاور کے آپریٹر نے منگل کو بتایا کہ دو امریکی سیاح ایفل ٹاور کی چھت پر رات بھر سوتے پائے گئے، جنھوں نے سیکیورٹی کو چکمہ دے دیا تھا، آپریٹر کا کہنا تھا کہ سیکیورٹی گارڈز نے امریکی سیاحوں کو صبح سویرے اس وقت جگایا جب وہ ٹاور کو عوام کے لیے کھولنے سے قبل چکر لگا رہے تھے۔
پیرس کے پراسیکیوٹرز نے اے ایف پی کو بتایا کہ ایسا لگتا ہے کہ بہت زیادہ نشے کی حالت میں تھے اس لیے وہیں سو گئے، آپریٹر کا کہنا تھا کہ شراب کے نشے میں دھت امریکیوں نے رات ایک ایسی جگہ گزاری جو عوام کے لیے بند ہوتی ہے تاہم وہاں انھیں بہ ظاہر کوئی خطرہ لاحق نہیں تھا۔
پولیس حکام کا کہنا تھا کہ امریکیوں نے رات تقریباً 10:40 پر داخلے کا ٹکٹ لیا اور پھر اوپر جا کر حفاظتی رکاوٹوں کو عبور کر کے وہاں رات گزاری، سیاحوں کو وہاں سے نکالنے کے لیے فائر فائٹرز اور خطرناک بلندیوں سے لوگوں کی بازیابی والا ماہر یونٹ طلب کیا گیا تھا۔
بعد ازاں امریکی سیاحوں کو پیرس کے ایک تھانے کی بھی سیر کرنی پڑی، جب کہ آپریٹر کا کہنا تھا کہ وہ ان سیاحوں کے خلاف شکایت درج کرائے گا، انتظامیہ کو سیاحوں کی وجہ سے پیر کی صبح عوام کے لیے ٹاور کھولنے میں ایک گھنٹے کی تاخیر کا سامنا کرنا پڑا تھا۔
یاد رہے کہ اس سے دو دن قبل ہفتے کو ایفل ٹاور میں بم کی جھوٹی اطلاع بھی دی گئی تھی۔
