واشنگٹن : امریکی صدراوباما نے روہنگیا افراد کے ساتھ غیر منصفانہ اور امتیازی سلوک کو ختم کرنے کا مطالبہ کردیا ہے۔
امریکی صدر باراک اوباما نے پریس کانفرنس سے خطاب کرنے ہوئے کہا کہ اس بات میں کوئی شبہ نہیں کہ برما میں اقلیتی روہنگیا افراد کے ساتھ غیرمنصفانہ اورامتیازی سلوک کیا جارہا ہے اوراس امتیازی سلوک کی وجہ سے روہنگیا اپنا ملک چھوڑنے پر مجبورہوگئے ہیں۔
انھوں نے میانمار سے مطالبہ کیا ہے کہ وہ جمہوری انتقال اقتدار کی کامیابی کے لیے ان لوگوں کے خلاف نسل اور عقیدے کی بنیاد پر امتیازی سلوک کا خاتمہ کرے۔
انہوں نے روہنگیا مہاجرین کی مدد کرنے پرانڈونیشیا اور ملائیشیا کی تعریف بھی کی۔
واضح رہے کہ میانمار کی حکومت روہنگیا کے مسلمانوں کو اقلیت ماننے کی بجائے بنگالی قرار دیدیا ہے اور انہیں بنگلہ دیش سے آنے والے غیرقانونی تارکینِ وطن قرار دیتی ہے، جن کی 13 لاکھ آبادی میانمار کے مغرب میں آباد ہے جن کی اکثریت میانمار شہریت سے محروم ہے۔
خیال رہے کہ میانمار کے مختلف علاقوں میں وقفے وقفے سے روہنگیا مسلمانوں اور بدھ مت انتہا پسندوں کے درمیان جھڑپیں ہوتی رہتی ہیں، ماضی میں بدھ متوں کو میانمار کی سکیورٹی فورسز کی حمایت حاصل رہی ہے۔2012ء میں انھوں نے مسلم اکثریتی مغربی ریاست اراکان میں مسلمانوں کا قتل عام کیا تھا اور ان کے مکانوں ،دکانوں اور دیگر املاک کو نذرآتش کردیا تھا۔
