امریکی صدر ڈونلڈ ٹرمپ نے دل اور دماغ کے ٹیسٹ کرانے کی تصدیق کرتے ہوئے کہا ہے کہ میرا دل اور دماغ اچھی حالت میں ہیں۔
غیر ملکی ذرائع ابلاغ کے مطابق امریکی صدر ڈونلڈ ٹرمپ نے بتایا ہے کہ سالانہ میڈیکل چیک اپ کرایا ہے جس کی رپورٹ اتوار کو سامنے آئے گی۔
اُنہوں نے کہا کہ میرا فزیکل ٹیسٹ کے ساتھ ساتھ مینٹل ٹیسٹ بھی اچھا رہا ہے۔
ٹرمپ نے کہا کہ ایران کے پاس جوہری ہتھیار نہیں ہو سکتے، چاہتا ہوں ایران ایک عظیم اور خوش حال ملک بنے۔
دوسری جانب عدالتی حکم عدولی پر سپریم کورٹ نے ٹرمپ انتظامیہ کیخلاف فیصلہ سناتے ہوئے غیر قانونی ڈیپورٹیشن پر وضاحت طلب کرلی۔
تفصیلات کے مطابق عدالتی حکم عدولی پر سپریم کورٹ نے ٹرمپ انتظامیہ کیخلاف فیصلہ سنادیا۔ ٹرمپ انتظامیہ کی اپیل مسترد کرتے ہوئے غیر قانونی ڈیپورٹیشن پر وضاحت طلب کرلی۔
عدالت نے ایل سولو اڈور غیر قانونی ڈیپورٹ شخص کو واپس لانے کا حکم دے دیا۔
امریکی میڈیا کے مطابق وفاقی جج کے حکم کے باوجود ٹرمپ انتظامیہ نے قانونی مقیم شخص کو ایل سلواڈر ڈیپورٹ کیا تھا۔
بیجنگ : چین نے امریکا سے”جوابی ٹیرف” عائد کرنے پر بڑا مطالبہ کردیا اور برابری، احترام اور باہمی فائدے پر مبنی مذاکرات کا مشورہ دیا۔
تفصیلات کے مطابق چین کا امریکی صدر کی جانب سے جوابی ٹیرف پر ردعمل سامنے آگیا، جس میں امریکا سے "جوابی ٹیرف” کے غلط اقدام کو درست کرنے کا مطالبہ کیا گیا ہے۔
چین نے امریکا کو برابری، احترام اور باہمی فائدے پر مبنی مذاکرات کا مشورہ دیتے ہوئے کہا کہ امریکی جوابی ٹیرف عالمی تجارتی اصولوں کی خلاف ورزی ہے، تجارتی جنگ میں کوئی فاتح نہیں ہوتا۔
بیجنگ نے واشنگٹن کو انتباہ کیا کہ تحفظ پسندی کسی مسئلے کا حل نہیں، چین اپنے جائزحقوق اورمفادات کے تحفظ کیلئے اقدامات کرے گا۔
چین نے امریکا سے عالمی تجارتی نظام کو نقصان نہ پہنچانے کی اپیل بھی کی۔
یاد رہے امریکا نے ٹیرف جنگ کو دنیا بھر میں پھیلا دیا اور یورپی یونین سمیت سو ملکوں پر بھاری ٹیکس عائد کردیا ، جس میں پاکستان سمیت پچیس ملکوں پر جوابی ٹیرف لگایا۔
صدر ٹرمپ کا پاکستان پر انتیس فیصد، بھارت پر چھبیس فیصد، برطانیہ پر دس، یورپی یونین پر بیس، چین پر چونتیس، جاپان پر چوبیس، اسرائیل پرسترہ، سعودی عرب، قطر اورافغانستان پر دس دس فیصد ٹیرف عائد کیا۔
بعد ازاں امریکی ٹیرف کے جواب میں دنیا بھر نے شدید ردعمل دیا، یورپ نے امریکی ٹیرف کو تجارتی جنگ قرار دے دیا۔۔ یورپی یونین کا جوابی اقدامات کا اعلان کیا جبکہ چین نے بھی اسے بلیک میلنگ قرار دیتے ہوئے جوابی اقدامات کے عزم کا اظہار کیا۔
امریکی صدر ڈونلڈ ٹرمپ کو امید ہے کہ روس تین سال سے یوکرین سے جاری جنگ کو بند کرنے کے لیے رضامند ہو جائے گا۔
غیر ملکی میڈیا کے مطابق امریکی صدر ڈونلڈ ٹرمپ نے واشنگٹن میں ذرائع ابلاغ کے نمائندوں سے گفتگو کرتے ہوئے امید ظاہر کی ہے کہ امریکا اور یوکرین کے حکام کے تیار کردہ جنگ بندی منصوبے پر روس راضی ہو جائے گا۔
صدر ٹرمپ نے مزید کہا کہ انہیں امید ہے کہ آنے والے دنوں میں مکمل طور پر جنگ بندی ہوجائے گی۔۔ وہ سمجھتے ہیں کہ وہ روسی صدر ولادیمیر پیوٹن سے رواں ہفتے بات بھی کریں گے۔
امریکی صدر نے یہ بھی کہا کہ وہ یوکرینی ہم منصب ولادیمیر زیلنسکی کو دوبارہ وائٹ ہاؤس مدعو کریں گے۔
واضح رہے کہ یوکرین نے امریکی تجویز پر 30 روز کے لیے جنگ بندی پر آمادگی ظاہر کر دی ہے۔
امریکی صدر ڈونلڈ ٹرمپ نے جنوبی افریقہ کیلئے فنڈنگ روکنے کا اعلان کر دیا، فیصلے پر فوری طور پر عمل کرنے کا کہا گیا ہے۔
بین الاقوامی خبر رساں ادارے کی رپورٹ کے مطابق امریکی صدر کا کہنا ہے کہ جنوبی افریقہ کے لیے تمام وفاقی فنڈنگ روک رہے ہیں، جنوبی افریقہ کی فنڈنگ روکنے کا عمل فوری شروع ہوگا۔
رپورٹس کے مطابق امریکا نے 2024 میں جنوبی افریقہ کو امداد کی مد میں 323.4 ملین ڈالر فراہم کیے۔ ٹرمپ نے کہا کہ جنوبی افریقہ سے کوئی کسان تحفظ کیلیے نکلنا چاہے تو اسے امریکا آنے کی دعوت دی جائے گی۔
دوسری جانب ٹرمپ کا کہنا ہے کہ وہ یوکرین کے ساتھ جنگ بندی اور امن معاہدہ ہونے تک روس پر پابندیاں عائد کرنے پر سنجیدگی سے غور کر رہے ہیں۔
روئٹرز کی رپورٹ کے مطابق ڈونلڈ ٹرمپ نے یوکرینی صدر زیلنسکی کے ساتھ ناخوشگوار ملاقات کے بعد اس پر جنگ بندی معاہہ قبول کرنے کیلیے دباؤ ڈالا اور انٹیلیجنس شیئرنگ بھی روک دی۔
ڈونلڈ ٹرمپ نے اپنے بیان میں کہا کہ روس اس وقت یوکرین پر طاقتور حملے کر رہا ہے، اس کو مد نظر رکھتے ہوئے میں جنگ بندی اور امن معاہدہ ہونے تک ماسکو پر بڑے پیمانے پر بینکنگ پابندیاں اور ٹیرف لگانے پر سنجیدگی سے غور کر رہا ہوں۔
امریکی صدر ڈونلڈ ٹرمپ نے امریکی فوج میں بھی اکھاڑ پچھاڑ شروع کردی، امریکی جوائنٹ چیفس آف اسٹاف کے چیئرمین جنرل چارلس براؤن، امریکی نیوی کے چیف اورایئرفورس کے نائب چیف کو بھی برطرف کردیا گیا۔
امریکی میڈیا کے مطابق ایئرفورس کے لیفٹیننٹ جنرل ڈین رازین کین جوائنٹ چیفس آف اسٹاف کے چیئرمین مقرر کردیئے گئے۔
چارلس براؤن دوسرے سیاہ فام جنرل تھے جو جوائنٹ چیفس آف اسٹاف کے چیئرمین بنے تھے، امریکا جنرل چارلس براؤن کے 16 ماہ میں یوکرین اور مشرق وسطیٰ جنگوں میں پھنسارہا تھا۔
امریکی میڈیا کے مطابق امریکی نیوی کے چیف اورایئرفورس کے نائب چیف کو بھی برطرف کیا گیا ہے، لیزا فرینشیٹی امریکی نیوی کی پہلی خاتون چیف تھیں۔
وزیردفاع پیٹ ہیگزیتھ نے پینٹاگون میں فوری طور پر نئی بھرتیاں نہ کرنے کا فیصلہ کیا ہے، جبکہ وزیر دفاع پیٹ ہیگزیتھ نے دفاعی بجٹ میں 50 ارب ڈالر کمی کرنے کا عندیہ بھی دیا ہے۔
پیٹ ہیگزیتھ کا کہنا ہے کہ دفاعی بجٹ میں کٹوتی سے حاصل رقم عوامی منصوبوں پر خرچ کی جائیگی۔ حکومت نے محکمہ دفاع میں 5 ہزار چھانٹیاں کرنے کا بھی فیصلہ کیا ہے۔
امریکی صدر ڈونلڈ ٹرمپ نے سوشل میڈیا پر پیغام میں کہا ہے کہ جنرل چارلس براؤن کی خدمات کا اعتراف کرتے ہیں، انہوں نے چارلس براؤن کے بہتر مستقبل کیلئے نیک خواہشات کا اظہار بھی کیا۔
امریکی صدر ڈونلڈ ٹرمپ نے یوکرینی صدر ولادیمیر زیلنسکی کو غیر مقبول ترین شخص قرار دے دیا۔
بین الاقوامی خبر رساں ادارے کی رپورٹ کے مطابق امریکی صدر ڈونلڈ ٹرمپ نے فلوریڈا میں میڈیا سے بات کرتے ہوئے کہا کہ یوکرین کے صدر زیلنسکی کی مقبولیت 4 فیصد سے بھی کم ہے۔
اُنہوں نے کہا کہ یوکرین میں الیکشن روس کا مطالبہ نہیں، انتخابات نہ ہونے پر بعض ممالک کو تشویش ہے۔
دوسری جانب یوکرین کے صدر زیلنسکی نے کہا ہے کہ یوکرین جنگ سے متعلق روس کے کسی بھی الٹی میٹم کو نہیں مانا جائے گا۔ کیف اپنی شمولیت کے بغیر جنگ بندی سے متعلق کسی بھی معاہدے پر دستخط کرنے سے انکار کر دے گا۔
واضح رہے کہ یوکرینی صدر نے ریاض میں جنگ بندی کیلئے روس امریکا مذاکرات کو مسترد کر دیا۔
اُنہوں نے سعودی عرب کا دورہ ملتوی کر دیا ہے جہا امریکا اور روس کے وزرائے خارجہ اعلیٰ سفارتی وفد کے ہمراہ یوکرین جنگ کے خاتمے کے لیے مذاکرات کر رہے ہیں۔
واشنگٹن : امریکی صدر ڈونلڈ ٹرمپ نے کہا ہے کہ بھارت جو ٹیرف لگائے گا ویسا ہی جوابی ٹیرف لگایا جائیگا، یہ بات انہوں نے بھارتی وزیراعظم نریندر مودی سے ملاقات کے بعد میڈیا سے گفتگو کرتے ہوئے کہی۔
تفصیلات کے مطابق بھارتی وزیر اعظم نریندر مودی نے وائٹ ہاؤس میں امریکی صدر ڈونلڈ ٹرمپ سے ون آن ون ملاقات کی ہے۔
ملاقات کے بعد دونوں رہنماؤں نے مشترکہ پریس کانفرنس کی، صدر ٹرمپ نے کہا کہ بھارتی وزیراعظم سے ملاقات کرکے بہت خوشی ہوئی، گزشتہ دور صدرات میں بھی بھارتی وزیراعظم مودی سے بہتر تعلقات رہے ہیں۔
ڈونلڈ ٹرمپ نے کہا کہ بھارت کو تیل اور گیس فراہم کریں گے، ہمارے پاس بہت تیل اور گیس ہے جو بھارت کو دے سکتے ہیں، ان کا کہنا تھا کہ مودی بھارت میں اچھا کام کر رہےہیں یہ بڑے لیڈر ہیں۔
بعد ازاں مشترکہ پریس کانفرنس سے خطاب کرتے ہوئے امریکی صدرٹرمپ نے کہا کہ بھارت امریکی برآمدات پر جو ٹیرف لگائے گا ویسا ہی جوابی ٹیرف لگایا جائیگا۔
ڈونلڈ ٹرمپ نے کہا کہ بھارت نے امریکا کو 70فیصد تک ٹیرف دیا ہوا ہے، بھارت کے ساتھ 100ارب ڈالرز کی تجارت تک جانا چاہتے ہیں۔
انہوں نے کہا کہ بھارتی وزیراعظم کے دورے سے باہمی تعلقات مزید مضبوط ہوئے ہیں، بھارت کو سویلین نیوکلیئر ٹیکنالوجی کے ذریعے سستی بجلی فراہم کرینگے۔
بھارتی وزیراعظم سے دونوں ممالک کے درمیان تعلقات مزید مستحکم کرنے پر بات ہوئی، آرٹیفشل انٹیلی جنس کے میدان میں بھارت کے ساتھ تعاون کا سلسلہ جاری رہیگا،۔
ڈونلڈ ٹرمپ کاکہنا تھا کہ ایف 35سمیت کئی ارب ڈالر کا فوجی سامان بھارت کو دیں گے، ملٹری کے سازو سامان میں مزید اضافہ کریں گے۔
اس موقع پر گفتگو کرتے ہوئے بھارتی وزیر اعظم نریندر مودی اپنے ساتھ جو پرچیاں لکھ کر لائے اور انہیں دیکھ کر پڑھتے رہے، مودی نے پرچیوں پر لکھا بیان کئی بار پڑھا۔
نریندر مودی نے کہا کہ ڈونلڈ ٹرمپ کو صدر منتخب ہونے پر بھارت کی طرف سے مبارکباد پیش کرتا ہوں۔ بھارتی وزیر اعظم کا کہنا تھا کہ ہم اعتماد کے ساتھ مل کر آگے بڑھیں گے، امریکا کے ساتھ اسٹریٹیجک تعلقات آگے بڑھائیں گے۔
انہوں نے کہا کہ خوشی ہے کہ مجھے دوبارہ ڈونلڈ ٹرمپ کے ساتھ کام کرنے کا موقع مل رہا ہے، امریکی صدر سے ایک بات سیکھی ہے کہ وہ قومی مفاد کو اولین ترجیح دیتے ہیں۔
ایک سوال کے جواب میں بھارتی وزیر اعظم نے بتایا کہ میں نے روس یوکرین جنگ کے موقع پر روسی صدر پیوٹن سے کہا تھا کہ جنگ کسی مسئلے کا حل نہیں ہے بیٹھ کر مذاکرات کیے جائیں۔
بھارتی وزیراعظم مودی کا کہنا تھا کہ آج امریکی صدر سے ملاقات میں کئی شعبوں میں باہمی تعاون بڑھانے پربات چیت ہوئی ہے، آرٹیفشل انٹیلی جنس سے لے کرخلائی تعاون پر تبادلہ خیال ہوا۔
بھارتی وزیراعظم مودی نے اپنے خطاب میں امریکی یونیورسٹیوں کو بھارت میں کیمپس کھولنے کی دعوت دینے کے ساتھ امریکی صدرڈونلڈٹرمپ کو دورہ بھارت کی دعوت دی ۔
واضح رہے کہ ماضی میں یہ دونوں رہنما ایک دوسرے کو دوست قرار دیتے رہے ہیں، مودی کا امریکی دورہ ایک ایسے وقت میں آیا ہے جب بھارت امریکا تعلقات کو ٹرمپ کی ٹیرف دھمکیوں اور ملک بدری کے حقائق سے آزمایا جارہا ہے۔
امریکا کے صدر ڈونلڈ ٹرمپ پر سرکاری ویب سائٹس سے صحت عامہ سے متعلق ڈیٹا ہٹانے پر مقدمہ درج کر لیا گیا ہے۔
غیر ملکی میڈیا کے مطابق ڈاکٹرز فار امریکا (ڈی ایف اے) کی جانب سے پبلک سٹیزن لٹیگیشن گروپ نے امریکی صدر ڈونلڈ ٹرمپ کے خلاف مقدمہ دائر کیا ہے۔ یہ مقدمہ صدر کی جانب سے حال ہی میں سرکاری ویب سائٹس سے صحت عامہ سے متعلق ہیلتھ ڈیٹا ہٹانے پر قائم کیا گیا ہے۔
اس مقدمہ میں ڈاکٹرز فار امریکا (ڈی ایف اے) کی جانب سے پبلک سٹیزن لٹیگیشن گروپ نے یہ مقدمہ دائر کیا ہے جس میں آفس آف پرسنل مینجمنٹ، سینٹرز فار ڈیزیز کنٹرول اینڈ پریوینشن، فوڈ اینڈ ڈرگ ایڈمنسٹریشن اور محکمہ صحت اور ہیومن سروسز کو مدعا علیہ کے طور پر نامزد کیا گیا ہے۔
ڈی ایف اے اور پی سی ایل جی نے واشنگٹن میں امریکی ڈسٹرکٹ کورٹ میں دائر کیے گئے مقدمے میں کہا ہے کہ ہیلتھ ویب پیجز اور ڈیٹا کو ہٹانے سے بیماری کے پھیلنے کی نگرانی اور اس کا موثر اقدام کرنے کے لیے دستیاب سائنسی ڈیٹا میں خطرناک خلا پیدا ہوگیا ہے۔
مدعی کا موقف ہے کہ اس اقدام سے ڈاکٹروں کو ایسے وسائل سے محروم کر دیا گیا ہے جو کلینیکل پریکٹس کی رہنمائی کرتے ہیں اور مریضوں کے ساتھ بات چیت اور مشغول ہونے کے کلیدی وسائل کی حیثیت رکھتے ہیں۔
واضح رہے کہ ڈونلڈ ٹرمپ کے گزشتہ ماہ صدر امریکا کا دوسری بار حلف اٹھانے کے بعد کئی احکامات پر مختلف حلقوں کی جانب سے تشویش کا اظہار کیا جا رہا ہے اور ان فیصلوں کے خلاف عدالتوں سے رجوع کرنے کے اعلانات بھی سامنے آ رہے ہیں۔
اس سے قبل پہلی صدارتی مدت کے دوران بھی ٹرمپ کر مختلف نوعیت کے مقدمات درج کیے گئے تھے۔
امریکی صدر ڈونلڈ ٹرمپ کی بہو لارا ٹرمپ نے ایک بار پھر سے امریکی نیوز چینل میں ملازمت کرلی۔
غیر ملکی میڈیا رپورٹ کے مطابق امریکی نیوز چینل کی سی ای او سوزین اسکاٹ کا اس حوالے سے کہنا ہے کہ 42 سالہ لارا ٹرمپ چینل پر ’My View with Lara Trump‘ کے نام سے شو کی میزبانی کریں گی۔
امریکی نیوز چینل کی سی ای او کا کہنا تھا کہ لارا ایک باصلاحیت کمیونیکیٹر ہیں، جن کی خواہش ہے کہ وہ ناظرین سے جڑ جائیں، وہ کامیاب کاروباری شخصیت اور کام کرنے والی ماں بھی ہیں۔
رپورٹس کے مطابق لارا کا شو ہر ہفتے مقامی وقت کے مطابق رات 9 بجے نشر ہو گا، اس پروگرام میں تجزیے، سیاسی و دیگر رہنماؤں کے انٹرویوز، قومی معاملات پر گفتگو اور دن بھر کی ہیڈ لائنز گفتگو ہوگی۔
امریکی میڈیا کی رپورٹس میں کہا گیا ہے کہ لارا کے اس پروگرام کے لیے ایک دوسرے پروگرام کو اتوار 10 بجے منتقل کر دیا گیا ہے۔
ڈونلڈ ٹرمپ کی بہو کا اس حوالے سے کہنا تھا کہ میں اپنی آواز کو فاکس نیوز پر واپس لانے، امریکی عوام کے ساتھ براہِ راست بات کرنے اور اس ملک کو عظیم بنانے کے لیے بہت پر جوش ہوں۔
امریکی میڈیا کی رپورٹس کے مطابق صدر ٹرمپ کی بہو لارا 2020ء سے ’دی رائٹ ویو‘ نامی ایک ویب سیریز کی میزبانی کر رہی ہیں جبکہ انہوں نے 22-2021ء تک فاکس نیوز چینل میں معاون کے طور پر بھی اپنی ذمہ داریاں ادا کی ہیں۔
امریکی صدر کے غزہ پر قبضہ کے متنازع بیان پر فلسطین کی کمسن لڑکی ماریہ حنون نے ڈونلڈ ٹرمپ کو دوٹوک جواب دے دیا ہے۔
غزہ کی پٹی سے فلسطینیوں کی جبری ہجرت کے بعد اب اس خطہ پر قبضے کے بیان پر جہاں دنیا بھر سے اس حوالے سے امریکی صدر کی مذمت کی جا رہی ہے۔ وہیں ایک کسمن مگر بہادر فلسطینی لڑکی ماریہ حنون نے بھی ڈونلڈ ٹرمپ کو کرارا جواب دے دیا ہے۔
سوشل میڈیا ایپ انسٹا گرام پر ایک ویڈیو کلپ وائرل ہو رہا ہے جس میں ننھی لڑکی ماریہ حننون امریکی صدر کے متنازع بیان پر ڈونلڈ ٹرمپ سے ہپ سوال کر رہی ہے کہ "اگر میں آپ سے کہوں کہ اپنے گھر سے نکل جائیں تو کیا آپ نکل جائیں گے؟”
ماریہ کہتی ہے ک جب آپ اپنے گھر سے نکلنے سے انکار کر دیں گے تو پھر مجھے کیوں کہتے ہیں کہ میں اپنے گھر اور وطن سے نکل جاؤں۔
فلسطینی بچی نے ٹرمپ کو دوٹوک جواب دیتے ہوئے کہا کہ "آپ پوری دنیا پر حکم چلاتے ہیں، سوائے غزہ کے کیوں کہ غزہ خود پوری دنیا ہے”۔
ماریہ نے ٹرمپ کا آئینہ دکھاتے ہوئے کہا کہ آپ خود کو جمہوری اور انسانی آزادی والی ریاست کہتی ہیں، مگر کس کی اور کون سی آزادی کی بات کرتے ہیں۔
واضح رہے کہ گزشتہ دنوں امریکی صدر ڈونلڈ ٹرمپ نے پہلے غزہ والوں کو نقل مکانی کر کے دوسرے ممالک جانے کی کہا تھا اور گزشتہ روز غزہ پر قبضہ کرنے سے متعلق بیان دیا تھا جس پر دنیا بھر سے ردعمل سامنے آ رہا ہے۔
