واشنگٹن : امریکی محکمہ دفاع پینٹاگون ایرانی میزائل حملوں میں زخمی ہونے والے امریکی فوجیوں کی تعداد بتانے میں کشمکش کا شکار ہیں ، چندہفتوں میں پینٹاگون چوتھی مرتبہ زخمی امریکی فوجیوں کی تعدادبتائی۔
تفصیلات کے مطابق امریکی محکمہ دفاع پینٹاگون کا کہنا ہے کہ ایران کے میزائل حملوں میں چونسٹھ امریکی فوجی زخمی ہوئے، زخمی امریکی فوجیوں کا چیک اپ جاری رہے گا۔
امریکی میڈیا کے مطابق چندہفتوں میں پینٹاگون چوتھی مرتبہ زخمی امریکی فوجیوں کی تعدادبتائی ہے، اس سے قبل پینٹاگون نے زخمی امریکی فوجیوں کی تعدادگیارہ،چونتیس اورپچاس بتائی تھی۔
یاد رہے عراق میں امریکی ڈرون حملے میں جنرل قاسم کی موت کے بعد ایران نے امریکی فوجی اڈوں کونشانہ بنایا تھا اور ایرانی حکام نے دعویٰ کیا تھا کہ امریکی فوجی اڈوں پر میزائل حملوں میں 80 افراد ہلاک ہوئے ہیں۔
مزید پڑھیں : ایرانی حملے میں زخمی امریکی فوجیوں کی اصل تعداد بتا دی
جس کے بعد صدرٹرمپ نے ایران کے امریکی فوجی اڈوں پرحملوں میں کسی امریکی فوجی کے زخمی ہونے یا ہلاکت کی تردید کی تھی۔
بعد ازاں 17 جنوری کو امریکی فوجی حکام نے اعتراف کیا تھا کہ ایرانی حملے میں 11 امریکی فوجی زخمی ہوئے جنھیں کویت اور جرمنی کے اسپتالوں میں منتقل کیا گیا۔
حملے میں بچ جانے والے امریکی فضائیہ کی افسر لیفٹیننٹ کرنل اسٹیکی کولیمین نے حملہ حیران کن قرار دیتے ہوئے کہا تھا کہ حملے سے چند گھنٹے قبل ہی نوٹی فکیشن موصول ہوا تھا کہ بیس پر حملے کا خدشہ ہے اور تین گھنٹے بعد بم باری شروع ہو گئی۔
امریکی اہل کاروں نے حملے کے بعد بتایا تھا کہ وہ حملے کے وقت پانچ گھنٹوں تک بنکروں میں چھپے رہے، اور ان خوف ناک حملوں میں ان کا محفوظ رہنا کسی معجزے سے کم نہیں تھا۔
