امریکی مرکزی بینک کے سربراہ جیروم پاؤل نے ٹرمپ ٹیرف کے نتیجے میں افراط زر کا خدشہ ظاہر کیا ہے۔ ٹیرف جنگ امریکی فیڈرل ریزرو کو سخت مشکلات میں ڈال سکتی ہے۔
بین الاقوامی خبر رساں ادارے کی رپورٹ کے مطابق امریکی مرکزی بینک کے سربراہ جیروم پاؤل کا کہنا ہے کہ تجارتی جنگ امریکی ریزرو کو ایسے مشکل میں ڈال سکتی ہے جس کا سامنا گزشتہ نصف صدی سے نہیں کیا ہوگا۔
اُن کا کہنا تھا کہ اب تک اعلان کردہ ٹیرف کی سطح توقعات سے کہیں زیادہ ہے۔ اس ٹیرف کے نتیجے میں قلیل مدت میں افراط زر بڑھنے کا بہت زیادہ خدشہ ہے۔
اُنہوں نے کہا کہ ٹیرف جنگ سے دیرپا نقصانات بھی ہوں گے۔ ملازمتوں پر بھی بُرا اثر پڑے گا۔
واضح رہے کہ امریکا اور چین کے درمیان تجارتی جنگ شدت اختیار کرگئی ہے، گزشتہ روز ڈونلڈ ٹرمپ نے چینی مصنوعات پر 245 فیصد ٹیرف عائد کرنے کا حکم نامہ جاری کر دیا تھا۔
وائٹ ہاؤس کا کہنا ہے کہ یہ فیصلہ چین کی جانب سے جوابی معاشی اقدامات کے ردعمل میں کیا گیا ہے۔ 15 اپریل کو جاری کردہ اس ایگزیکٹو آرڈر میں ڈونلڈ ٹرمپ نے کہا تھا کہ چین کی ”غیر منصفانہ تجارتی پالیسیوں ”کا جواب دینا بنتا تھا۔
بیان کے مطابق چین کی جانب سے ردعمل نے ہمیں یہ قدم اٹھانے پر مجبور کیا۔ ٹرمپ انتظامیہ کا دعویٰ ہے کہ یہ اقدام معاشی و قومی سلامتی دونوں حوالوں سے اہمیت کا حامل ہے۔
واضح رہے کہ امریکا اور چین کے درمیان ٹیرف معاملے پر کشیدگی میں دن بدن اضافہ ہوتا جارہا ہے، تاہم اب امریکا چین کو تنہا کرنے کے لیے ٹیرف مذاکرات کو استعمال کرنے کا ارادہ رکھتا ہے۔
ٹیرف مذاکرات کو امریکا کے تجارتی شراکت داروں پر دباؤ ڈالنے کے لیے استعمال کیا جائے گا تاکہ وہ چین کے ساتھ تجارت کو محدود کریں۔
امریکی میڈیا رپورٹس کے مطابق 70 سے زائد ممالک سے کہا جائے گا کہ وہ چین کو اپنے علاقوں کے راستے سامان کی ترسیل کی اجازت نہ دیں۔
ان ممالک سے یہ بھی کہا جائے گا کہ امریکی ٹیرف سے بچنا ہے تو اپنے علاقوں میں چینی فرموں کی موجودگی کا خاتمہ کریں۔
