کراچی: امریکی قونصلیٹ کی شکایت پر شہر قائد میں جعلی دستاویزات کی تیاری میں ملوث ایک ملزم کی گرفتاری عمل میں آئی ہے۔
تفصیلات کے مطابق ایف آئی اے اینٹی ہیومن ٹریفکنگ سرکل کراچی نے ایک کارروائی میں جعلی دستاویزات کی تیاری میں ملوث ملزم کو گرفتار کیا ہے، جس کی شناخت محمد مشتاق راجپوت کے نام سے ہوئی ہے۔
ملزم کو چھاپا مار کارروائی میں کراچی سے گرفتار کیا گیا، یہ کارروائی امریکی قونصلیٹ کراچی کی شکایت پر عمل میں لائی گئی، ابتدائی تفتیش کے مطابق ملزم نے شہری کو جعل اپوائنٹمنٹ لیٹر جاری کیا تھا۔
ایف آئی اے کے مطابق گرفتار ملزم منصور کنسلٹنٹ کے نام سے ویزا کنسلٹینسی کا کام کر رہا تھا، اور اس نے بھاری رقوم وصول کر کے متاثرہ شہری کو جعلی اپوائنٹمنٹ لیٹر جاری کیا، متاثرہ شہری نے پوچھ گچھ پر انکشاف کیا تھا کہ محمد مشتاق نامی ایجنٹ نے اس کو مذکورہ دستاویزات فراہم کی تھیں۔
حوالہ ہنڈی میں ملوث ملزم گرفتار، لاکھوں مالیت کی ملکی وغیرملکی کرنسی برآمد
ملزم مشتاق راجپوت نے شہری سے اس جعل سازی کے عوض 2 لاکھ روپے لیے تھے، امریکی حکام نے مذکورہ جعلی ایجنٹ کے خلاف تحریری شکایت درج کرائی، جس پر ایف آئی اے نے کارروائی کرتے ہوئے ملزم کو گرفتار کر لیا۔
ترجمان ایف آئی اے کے مطابق ملزم کو گرفتار کر کے تفتیش کا آغاز کر دیا گیا ہے۔
