Tag: امریکی قونصل خانے

کراچی: امریکی قونصل خانے، ’ایجوکیشن یو ایس اے‘ اور ’یو ایس ایجوکیشنل فاؤنڈیشن ان پاکستان (USEFP)’ کی جانب سے امریکا میں اعلیٰ تعلیم کے مواقعوں کے بارے میں تعلیمی میلے کا انعقاد کیا گیا۔

میلے میں 22 سے زائد امریکی کالجوں اور جامعات نے اپنے اسٹالز لگائے جبکہ شرکا کو امریکی تبادلہ پروگراموں سے واپس آنے والے طلبا اور امریکی قونصل خانے کے عملے نے ویزا، کالج کی درخواستوں اور امریکا میں زندگی کے بارے میں معلومات فراہم کی۔ اس کے ساتھ ساتھ  USEFP کے عملے نے کراچی کےمختلف تعلیمی اداروں کا دورہ کیا اور سیمینار منعقد کیے۔

اس موقع پر گفتگو کرتے ہوئے کراچی میں مقیم امریکی قونصل جنرل برائن ہیتھنے کہا کہ امریکامیں اس وقت 11 ہزار سے زائد پاکستانی طلبا تعلیم حاصل کر رہے ہیں لیکن امریکی حکومت کی کوشش ہے کہ اس تعداد میں مزید اضافہ ہو۔

’ایجوکیشن یو ایس اے‘ کے تعلیمی مشیر عمیر خان نے کہا کہ اس تعلیمی میلے کے انعقاد کا مقصد طلبا کو امریکا میں تعلیمی تجربے کے بارے میں آگاہی فراہم کرنا ہے۔

ان کا کہنا تھا کہ ایک نئے ملک میں رہائش اختیار کرنا اور تعلیم حاصل کرنا ایک مشکل تجربہ ہوتا ہے جس کیلیے ہمت اور حوصلے کی ضرورت ہوتی ہے۔عمیر نے کہا کہ بیرون ملک تعلیم کا مقصد صرف ڈگری کا حصول ہی نہیں بلکہ کردار سازی اور خود اعتمادی میں اضافہ بھی ہوتا ہے۔

USEFP امریکا اور پاکستان کے عوام کے درمیان تعلیمی اور ثقافتی تبادلوں کے ذریعے باہمی ہم آہنگی کو فروغ دینے کی کوشش کر رہا ہے۔ 1950 میں تشکیل پانے والے اس ادارے کے زیر انتظام تبادلہ پروگراموں میں اب تک 5000 پاکستانی اور 900 سے زائد امریکی شہری شرکت کر چکے ہیں۔ ان تبادلہ پروگراموں میں سب سے اہم فل برائٹ پروگرام ہے۔

امریکا میں تعلیم حا صل کرنے میں دلچسپی رکھنے والے طلبا کی رہنمائی اور معاونت کے لیے USEFP کے دفاتر کراچی، لاہور اور اسلام آباد میں قائم ہیں جہاں TOEFL, SAT, GRE اور ان جیسے دیگر امتحانات کی تیاری بھی کرائی جاتی ہے۔

کراچی: امریکی قونصل خانے کے تحت سندھ کلچر ڈے منایا گیا، کراچی میں متعین امریکی قونصل جنرل برائن ہیتھ نے اپنی رہائش گاہ پر نامور سماجی شخصیات کو مدعو کرکے سندھی موسیقی کی محفل کا انعقاد کیا گیا۔

مہمانوں کا استقبال کرتے ہوئے قونصل جنرل برائن ہیتھ کا کہنا تھا کہ انھیں سندھ کلچر ڈےکے موقع پر اپنی رہائشگاہ پر تقریب منعقد کر کے بے انتہا خوشی محسوس ہو رہی ہے۔

پاکستان کی طرح امریکا بھی مختلف ثقافتوں سے تعلق رکھنے والے افراد کا مجموعہ ہے، یہی وجہ ہے کہ امریکی حکومت مختلف ثقافتوں کو قریب لانے کے ساتھ ساتھ ان کی ترویج کی بھی کوشش کر رہی ہے۔

قونصل جنرل نے کہا کہ موئن جو ڈرو کے زمانے سے سندھ شاعروں اور صوفیائے کرام کی سرزمین رہی ہے۔انھوں نے امریکی عوام کی جانب سے پاکستان اور دنیا بھر میں بسنے والے 6 کروڑ سندھیوں کو نیک تمناوں کا پیغام پہنچایا، موسیقار ذوالفقار فقیر نے اپنے ساتھیوں کے ہمراہ بورنیڈو اور بانسری پر روایتی سندھی گیت پیش کیے۔

سندھ کلچر ڈے منانے کے ساتھ ساتھ امریکی قونصل خانے کراچی نے اپنی پہلی سندھی ویب سائٹ کا بھی آغاز کیا ہے جبکہ فیس بک اور ٹوئٹر پر سندھی زبان میں پیغامات کا سلسلہ بھی جاری ہے۔

امریکی قونصل خانے کی سندھی ویب سائٹ تک رسائی کیلیے وزٹ کریں:www.sindhi.karachi.usconsulate.gov