نیویارک: وبا کے دنوں میں شہ سرخیوں میں جگہ پانے والے نہایت مشہور امریکی ڈاکٹر نے ریٹائر ہونے کا عندیہ دے دیا۔
تفصیلات کے مطابق امریکا میں 7 صدور کی انتظامیہ کے تحت طبی خدمات انجام دینے والے مشہور امریکی سائنس دان اور وائٹ ہاؤس کے چیف میڈیکل ایڈوائزر ڈاکٹر انتھونی فاؤچی نے 2025 تک ریٹائر ہونے کا عندیہ دے دیا ہے۔
81 سالہ ڈاکٹر فاؤچی کا کہنا ہے کہ ممکن ہے کہ وہ صدر جو بائیڈن کی موجودہ مدت کے اختتام تک ریٹائر ہو جائیں، ڈاکٹر فاؤچی 1984 سے نیشنل انسٹیٹیوٹ آف الرجی اینڈ انفیکشن ڈیزیز کے ڈائریکٹر ہیں اور 2020 سے کرونا وبا پر قابو پانے کے لیے خدمات انجام دے رہے ہیں۔
کووِڈ نائنٹین کی وبا کے دوران انھوں نے تین سال امریکا کے سب سے مشہور ڈاکٹر کے طور پر گزارے ہیں، جب کہ NIAID میں انھوں نے 50 سال سے بھی زائد عرصہ گزارا۔
ڈاکٹر فاؤچی چاہتے ہیں کہ وہ خاموشی کے ساتھ بائیڈن حکومت ہی کے ساتھ ریٹائر ہو جائیں، انھوں نے کرونا وبا کے دوران اپنے سخت مؤقف کے لیے تنقید اور مخالفت بھی برداشت کی، جس کے جواب میں وہ کہتے رہے کہ ناقدین ان پر نہیں بلکہ سائنس پر حملہ کر رہے ہیں۔
گزشتہ نومبر کو ایک انٹرویو میں انھوں نے کہا کہ ناقدین سائنس پر حملہ کر رہے ہیں کیوں کہ میں تو سائنس کو پیش کر رہا ہوں، میں لوگوں کو بچانے جا رہا ہوں اور یہ جھوٹ بولتے جا رہے ہیں۔ لطف کی بات یہ بھی ہے کہ ناقدین کی جانب سے بھی کرونا وبا اور ایس او پیز کے حوالے سے ان پر جھوٹ کے طومار باندھنے کے الزام لگتے رہے ہیں۔
ابھی پچھلے ہفتے انھوں نے ایک انٹرویو میں اپنے سخت مؤقف کو ایک بار پھر دہراتے ہوئے کہا تھا کہ امریکیوں کو بند گھروں کے اندر بھی ماسک لگانا چاہیے تاکہ وہ محفوظ رہیں۔
بدنام ترین سابق امریکی صدر ڈونلڈ ٹرمپ اور ڈاکٹر فاؤچی میں کیا چیزیں مشترک رہیں؟ اس پر بات کرتے ہوئے بروکلین میں پیدا ہونے والے ڈاکٹر فاؤچی نے انٹرویو میں کہا کہ ہم نے آپس میں ایک دل چسپ رشتہ استوار کر لیا تھا، نیویارک کے دو لڑکے، اپنی رائے اور اپنے نظریے میں ایک دوسرے سے بہت مختلف تھے، لیکن یہ دو لڑکے اس شہر کے ایک ہی ماحول میں پلے بڑھے، میرا خیال ہے کہ ہم اس سلسلے میں ایک دوسرے سے جڑے ہوئے ہیں۔
