Tag: امیر جماعت اسلامی

گوجرانوالہ: امیر جماعت اسلامی سینیٹر سراج الحق نے کہا ہے کہ پی ڈی ایم بند گلی میں داخل ہو گئی ہے، کرونا وائرس کے ساتھ سیاسی وائرس بھی ختم ہوگا۔

گوجرانوالہ جلسہ عام سے خطاب کرتے ہوئے امیر جماعت اسلامی نے کہا 11جماعتوں کے اتحاد پی ڈی ایم نے کئی جلسے کیے لیکن ان کے ایک جلسے میں بھی اسلامی تعلیمات کا مطالبہ نہیں ہوا۔

سراج الحق کا کہنا تھا مجھ سے پوچھتے ہیں کہ پی ڈی ایم میں شرکت کیو ں نہیں کی، ہم اس سیاسی بریانی کاحصہ نہیں بن سکتے جس کا کوئی منشور اور لیڈر نہیں، اس ملک میں نظام مصطفیٰﷺ ہونا چاہیے۔

انھوں نے کہا پی پی کی تو سندھ میں حکومت ہے لیکن وہاں غریب آدمی سسکتا ہے، تو یہ لاہور اور دیگر علاقوں کا کیا حال کریں گے، کرونا وائرس بھی ختم ہوگا اور سیاسی وائرس بھی ختم ہوگا، یہ ساری پارٹیاں بندگلی میں داخل ہوگئی ہیں۔

سراج الحق نے کہا آج قائد اعظم کے احسان مند ہونے کا دن ہے، پوری قوم آج شرمندہ ہے، ان غلاموں نے پاکستان کے نظریے کے ساتھ غداری کی، ہم اپنا آخری خون کا قطرہ دے کر حقیقی پاکستان بنائیں گے، محمدعلی جناح نے اسلامیہ کالج پشاور میں خطاب میں اعلان کیا تھا کہ پاکستان زمین کا ٹکڑا نہیں بلکہ اسلام گاہ ہوگا۔

لاہور: امیر جماعت اسلامی پاکستان سراج الحق نے اوورسیز پاکستانیوں کے مسائل کے سلسلے میں صدر مملکت، وزیر اعظم پاکستان اور وزیر خارجہ سے اپیلیں کی ہیں۔

اے آر وائی نیوز کے مطابق امیر جماعت سراج الحق نے گزشتہ روز وزیر خارجہ شاہ محمود قریشی کو ٹیلی فون کر کے انھیں اوورسیز پاکستانیوں کے مسائل سے آگاہ کیا، ان کا کہنا تھا کہ سعودی عرب اور امارات میں لاکھوں پاکستانی پھنسے ہیں اور مدد کے منتظر ہیں۔

سراج الحق نے کہا کہ روزگار نہ ہونے کی وجہ سے پاکستانی فاقوں کا شکار ہو گئے ہیں، سعودی عرب اور دیگر بڑے ممالک میں سفارت خانے ہیلپ لائن کا اعلان کریں۔

وزیر خارجہ نے امیر جماعت اسلامی کو یقین دہانی کرائی کہ وہ سفارت خانوں سے رابطہ کر کے انھیں مزید فعال کریں گے، اوورسیز پاکستانیوں کی واپسی پر انھیں مکمل علاج کی سہولت بھی مہیا کی جائے گی۔ انھوں نے مزید کہا کہ صوبائی حکومتیں بھی اس سلسلے میں اپنی ذمہ داریاں پوری کریں۔

قبل ازیں امیر جماعت اسلامی نے صدر مملکت ڈاکٹر عارف علوی اور وزیر اعظم عمران خان سے بھی اپیلیں کی تھیں، انھوں نے اپیل میں کہا کہ حکومت ہنگامی بنیادوں پر بیرون ملک پھنسے پاکستانیوں کی مدد کرے، وہ مشکلات کا شکار ہیں۔

سراج الحق کا کہنا تھا کہ سعودی عرب و دیگر ممالک میں پاکستانی اپنے کمروں میں بند ہیں، انھیں کرونا اور کئی دیگر بیماریوں کا بھی سامنا ہے، جو لوگ جاں بحق ہو گئے ہیں ان کی لاشیں سرد خانوں میں پڑی ہیں، ان لوگوں کی سفارت خانوں تک رسائی بھی مشکل ہے، اس لیے ریاض اور دیگر شہروں میں ہیلپ سینٹرز قائم کیے جائیں۔