کراچی: منعم ظفر نے کہا ہے کہ 40 سال سے پیپلز پارٹی اور ایم کیو ایم مل کر مفادات کا سودا کررہے ہیں اور عوام کی کوئی فکر نہیں ہے۔
جماعت اسلامی کراچی کے امیر منعم ظفر خان نے وزیراعلیٰ ہاؤس کے باہر حقوق کراچی مارچ کے شرکا سے خطاب کرتے ہوئے کہا کہ کراچی کو ڈبونے والے وہ لوگ ہیں جنھوں نے کرپشن اور لوٹ مار کرکے کراچی کو تباہ کردیا، شہر کراچی پاکستان کی امیدوں کا مرکز تھا۔
انھوں نے کہا کہ ظالم حکمرانوں کے ماتھے پر کوئی شکن تک نہیں آتی، کراچی کی عوام کو ہزاروں کی تعداد میں وزیر اعلی ہاؤس پہنچنے پر مبارکباد پیش کرتا ہوں، اہل کراچی نے ثابت کردیا کہ کراچی جاگ رہا ہے۔
امیر جماعت اسلامی نے کہا کہ شہر میں اس وقت قابض مئیر مسلط ہے، قابض مئیر مرتضیٰ وہاب وڈیروں اور جاگیر داروں کی ربڑ اسٹیمپ ہے، سندھ حکومت شہر کو پانی ،بجلی ، سڑکیں صحت ، تعلیم اور ٹرانسپورٹ دینے کے لیے تیار نہیں ہے۔
منعم ظفر نے کہا کہ 1 ہزار ووٹ لینے والے لوگوں کو فارم 47 کے ذریعے عوام پر مسلط کردیا گیا ہے، بلدیاتی انتخابات میں نمبر پورے نہ ہونے پر بندے اٹھالیے جاتے ہیں۔
انھوں نے کہا کہ پیپلز پارٹی نے کہا تھا کہ این ایف سی اور اٹھارویں ترمیم کے بعد اختیارات منتقل کیے جائیں گے، جعلی طریقے سے مسلط ہونے والے اقتدار کے مزے کے رہے ہیں۔
جمہوریت کا راگ الاپنے والے بانی آمر جو ڈیڈی کہنے والے جمہوریت کی بات کرتے ہیں، پیپلز پارٹی کی ذہنیت کراچی دشمنی ہے۔
منعم ظفر نے کہا کہ شہر کا مستقبل جماعت اسلامی سے وابستہ ہے، پیپلز پارٹی کی سیاست میں سعید غنی اور مرتضیٰ وہاب نکل کر آئے ہیں جو عوام کے حقوق غصب کررہے ہیں، آج ہم کراچی کے حقوق کے حصول کے لیے وزیر اعلی ہاؤس میں موجود ہیں۔
انھوں نے کہا کہ جدوجہد اور مزاحمت کے ذریعے گھٹنے ٹیکنے پر مجبور کردیں گے، وزیراعلیٰ ہاؤس پر دھرنا ابھی شروع ہوا ہے، ہم جانے کے لیے نہیں آئے بلکہ حقوق کے حصول کے لیے آئیں ہیں۔
https://urdu.arynews.tv/jamaat-e-islami-opposes-raising-salaries-of-assembly-members/
