Tag: امیر خسرو

حضرت امیر خسرو عمیق فکر کے مالک تھے۔ فارسی کے عظیم شاعر، موسیقار اور صوفی امیر خسرو نے ہندوستان میں اپنے علم و فن سے شہرت اور شخصیت و کردار سے ہر خاص و عام سے سندِ قبولیت پائی اور تاریخ میں نام رقم کیا۔ انھیں دقیق موضوعات میں غور و فکر کی عادت، فطری ذہانت اور نکتہ رسی کے سبب ہندوستان بھر میں ایک مدبر و مصلح سمجھا گیا۔ ان کی نصیحتیں سبھی کو بھائیں اور مشہور ہے کہ ان کے عہد میں لوگ اپنے مسائل کا حل طلب کرنے دور دور سے ان کے پاس چلے آتے تھے۔

خسرو نے اپنی بیٹی کو بھی منظوم نصیحتیں کی تھیں جن کے اردو تراجم ہمیں پڑھنے کو ملتے ہیں۔ یہ ایسا ہی ایک پارہ ہے جس میں اگرچہ نصیحتیں اس دور کے اعتبار سے ہیں، تاہم ان نصیحتوں کو آج کے زمانے سے منطبق کر کے دیکھیں تو یہ بہت مفید اور کارآمد ہیں۔

امیر خسرو ؔنے تیرہویں صدی میں جنم لیا۔ وہ ایسے شاعر تھے جس نے کبھی پہیلیوں اور کہہ مکرنیوں میں علم بانٹا تو کبھی شادی بیاہ کے گیتوں میں لوگوں کی تفریحِ طبع کا سامان کیا۔ وہ ایک شاعر اور ماہر موسیقی تھے۔ کہا جاتا ہے کہ خسرو نے متعدد ساز اور کئی راگ ایجاد کیے۔ امیر خسرو کو ایک صوفی کا درجہ بھی حاصل ہے جو حضرت خواجہ نظام الدّین اولیاء کے مریدِ خاص رہے۔

امیر خسرو کے مکتوب کا اردو ترجمہ ملاحظہ کیجیے۔

’’اے بیٹی تیرا وجود میرے دل کا چشم و چراغ ہے اور میرے دل کے باغ میں کوئی اور میوہ تجھ سے بہتر نہیں۔ اگرچہ تیرے بھائی بھی تیری طرح خوش بخت ہیں مگر جہاں تک میری نظر کا تعلق ہے وہ تجھ سے بہتر نہیں۔

باغبان جب باغ کی طرف نظر اٹھا کر دیکھتا ہے تو اس کے نزدیک سرو کی بھی وہی قدر ہوتی ہے جو سوسن کی ہوتی ہے۔ تیرا نصیب جس نے تجھے نیک فال بتایا، اسی نے تیرا نام مستورہ میمون (نیک بخت و عصمت مآب خاتون) رکھ دیا۔

اس کی وجہ یہ ہے کہ جب اس نے تیرے اندازِ طبیعت کو پہلے سے دیکھا تو میری شرم و حیا اور پاک دامنی کو زیادہ سے زیادہ پایا۔ مجھے امید ہے کہ اس خوش بختی و نیک فالی کے باعث تیرے نام کو تیرے کردار سے چار چاند لگ جائیں گے۔ لیکن تجھے بھی کوشش کرنی چاہیے کہ اپنے نیک انجام سے اپنے اس نام کی بنیاد کو صحیح ثابت کرے۔ عمر کے اعتبار سے تیرا یہ ساتواں سال ہے جب تو سترہ سال کی ہوجائے گی تو ان باتوں کو سمجھ سکے گی۔
جب تو اس عمر کو پہنچے گی تو میری ان نصیحتوں پر عمل کرکے اپنی نیک نامی سے مجھے بھی سر بلند کرے گی۔ اس طرح زندگی بسر کر کہ تیرے شان دار کارناموں سے تیرے قرابت داروں کا نام بھی روشن ہو۔

جس موتی کی طرف بزرگ توجہ مبذول کرتے ہیں، اس کے طفیل میں اس کے والدین یعنی سیپی کو بھی یاد کر لیتے ہیں۔ بہتر ہے کہ اپنی عصمت و عفت کی حفاظت کے لیے تو اپنی نقل و حرکت کو اپنے دامن کی حدود میں منحصر کر دے۔ تاکہ تیرا دامنِ شکوہ و وقار بھی جگہ سے اسی طرح نہ ہلے جس طرح دامنِ کوہ پتھر سے جدا نہیں ہوتا۔ اگر تیرا وقار ایک بھاری پتھر کی طرح تیرے دامن کا لنگر ہے تو یقیناً تیرا دامن تیری عصمت کا محافظ ہے۔
وہ عورت جس کا گھر سے نکلنا آسان ہو جاتا ہے وہ گھر کے اندر سب سے خوف زدہ رہتی ہے۔ جو عورت گلستان و لالہ زار میں ٹہلتی پھرتی ہے وہ اپنا گریبان گل کی نذر کر دیتی ہے اور دامن خار کو بخش دیتی ہے۔

جب اس کی نظر گلِ سرخ پر پڑتی ہے تو پھول کی ہنسی یہ تقاضا کرتی ہے کہ شراب پینی چاہیے۔ تُو اپنے چہرہ سے نمائشِ باطل کا غازہ دھو ڈال اور یہ کوشش کر کہ تو غازہ ہی کے بغیر سرخرو ہو جائے۔ تاکہ صدق و صواب کی شہرتِ عامّہ، تیری اس سرخروئی کی وجہ سے، تجھے حمیرا (حضرت عائشہ صدیقہ رضی اللہ عنہا کے لقب کا مخفف) کا خطاب عطا کر دے۔

جو عورت راحت و آرام سے بے پروا رہی اس کا ویران گھر آباد ہو گیا۔ جو عورت لذتِ شراب کی رو میں بہہ کر پستی کے اندر چلی گئی، اس کا گھر خرابات بن گیا اور وہ خود بھی خراب ہوئی۔ جب اس کی شریف ذات شراب سے آلودہ ہو گئی تو در و دیوار سے دشمن اندر گھس آئے گا۔

اگر بند کمرے میں بھی شراب کا دور چلے تو اس کی بُو پڑوسیوں کو یہ پیغام پہنچا دیتی ہے کہ یہاں شراب پی جا رہی ہے۔ کسی عورت کا ایک چھوٹا سا آنچل جو وہ اپنی نشت گاہ میں بیٹھ کر بطور نقاب ڈال دیتی ہے ان فقیہوں کی پوری دو پگڑیوں سے بہتر ہے جو فسق و فجور میں مست ہیں۔

جلوہ گری یہ نہیں کہ ایک پری چہرہ حسینہ زن و شوہر کے تعلقات میں جلوہ گر ہو۔ جلوہ گری اس عورت کا حصہ ہے جو شرم و حیا اور خوف خدا کے باعث لوگوں کی نظروں سے پوشیدہ ہونے کے باوجود اپنے اعلیٰ کردار کے لیے مشہور ہے۔

تُو سورج کی طرح اپنے آپ کو اجالوں میں چھپا لے اور شرم و حیا کو رخسار کا پردہ بنا۔ جس نے حیا کا نقاب اتار کر پھینک دیا اس سے کوئی امید نہ رکھو، کیونکہ اس کی عزت و آبرو پر پانی پھر گیا۔

جو مرد اس کی عریانی کے لیے کوشش کرتا ہے، وہ اس کو برہنہ کرنے کے بعد پھر اس کی پردہ پوشی کیا کرے گا؟ وہ آوارہ گرد جو بغیر کچھ کیے ہوئے ڈینگیں مارتا ہے، جب کوئی گناہ کر لے گا تو اسے کس طرح ظاہر نہ کرے گا۔

برے لوگوں کی یہ رسم ہے کہ جب کوئی برا کام کرتے ہیں تو اس کی شہرت کو اپنے لیے بڑائی سمجھتے ہیں۔ ہر بننے ٹھننے والی عورت جو نمائشِ حسن کے درپے ہوتی ہے، دس پردوں کے اندر بھی اپنی رسوائی کا سامان مہیا کر لیتی ہے۔

جب کوئی بری عورت تباہی کی طرف رخ ملتی ہے تو اس کی صورت اس کے فسق و فجور کی گواہی دینے لگتی ہے۔ عورت کے لیے فراخ حوصلگی و سخاوت زیب نہیں دیتی، البتہ اگر مرد میں یہ اوصاف نہ ہوں تو وہ عورت بن جاتا ہے۔

لیکن اتنی بد مزاج بھی نہ بن کہ تیری خادمائیں تجھ سے بھاگ کر باہر گلی میں چلی جائیں۔ ایسا گھر جس میں آرام و آسائش کم میسر ہو اگر اپنے ساز و سامان کے اعتبار سے بہشت بھی ہو تو جہنم کے مترادف ہو جاتا ہے۔

اس شوہر کو جس کی بیوی دراز ہو یہ سمجھنا چاہیے کہ ایک وحشی کتؑے کے ساتھ بند کر دیا گیا ہے۔ جو شوہر دولت و ثروت رکھتا ہے، اس کی بیوی خود گھر کے اندر سونے میں پیلی ہوتی ہے۔ لیکن جب کسی شوہر کے پاس پونجی نہ ہو تو اس کی بیوی کے لیے قناعت سے بہتر کوئی زیور نہیں ہے۔ نفس، جو انسان کے قالب میں سرایت کیے ہوئے ہے، انسان دشمن ہونے کے باوجود اس کے تن بدن میں موجود ہے۔ یہ نفس نہیں چاہتا کہ جس دل کو دنیا کا عیش حاصل ہے، وہ عقبیٰ کی فکر میں پڑ جائے اس لیے جہاں تک ہو سکے اس نفس کی رسی دراز نہ ہونے دے۔ یہ ساری مصیبت جو تن پر آتی ہے اس نظر کی بدولت آتی ہے جو توبہ کو توڑ کر گناہ پر مائل کرتی ہے۔

جس طرح موتی سیپ کے اندر چھپا ہوا ہوتا ہے اسی طرح اپنی آنکھ کو شرم و حیا میں چھپا لے تاکہ تو تیرِ بلا کا نشانہ نہ بنے۔ جب آنکھ مائل ہوتی ہے تو دل قابو سے باہر ہو جاتا ہے اور نظر کا ہاتھ دل کے ڈورے کھینچنے لگتا ہے۔

وہ عورت، جسے حق تعالیٰ نے خود داری کا جذبہ دیا ہے، جان دے دیتی ہے مگر تن کو فسق و فجور میں مبتلا نہیں ہونے دیتی۔

ایک بادشاہ اپنے اونچے محل کی چھت پر کھڑا ہوا، ادھر ادھر نظر ڈال رہا تھا۔ اس نے محل کے دیوار کے پیچھے ایک حسینہ کو دیکھا جو اپنے حسن سے اس زمانہ کے تمام حسینوں کو مات کرتی تھی۔ جیسے ہی بادشاہ نے اسے دیکھا، بے چین ہو گیا اور اس کے صبر و قرار کی بنیاد اپنی جگہ سے مل گئی۔ فوراً ایک پیغامبر کو اس کے پاس بھیجا تاکہ اسے بلا کر اس پر دست درازی کرے۔

اس حسینہ نے اپنی پاک دامنی کی بنا پر اپنے وقار کو عصمت کا پردہ بنا لیا اور چھپ گئی۔ پہلے تو ایک عرصہ تک در پردہ گفتگو ہوتی رہی مگر چاہنے والے کی مقصد براری نہ ہوئی۔
جب بادشاہ کا دل ہوس سے ٹکڑے ٹکڑے ہو گیا تو اس نے کھل کر بات کی اور یہ خوف دلایا کہ میں جان سے مار ڈالوں گا۔ خادم کو حکم دیا کہ اسے اپنے گھر سے باہر گھسیٹ کر، بالوں سے کھینچتا ہوا، بادشاہ کی خواب گاہ میں لے آئے۔ (جب وہ حسینہ آئی تو) اس نے کہا کہ” اے فرمانروائے وقت، بادشاہوں کو فقیروں سے کیا واسطہ ہے۔ میرے جسم میں ایسی کون سی چیز ہے جو تیری آنکھوں کو بھا گئی ہے اور جسے تُو نے اپنے جذبۂ دل سے مجبور ہو کر عزیز بنا لیا ہے۔

بادشاہ نے اپنی آرزو مند آنکھوں میں آنسو بھر کر کہا۔” تیری دونوں آنکھوں نے مجھ سے میری نیند چھین لی ہے۔” وہ خوش جمال حسینہ اندر کی طرف ایک کونے میں چلی گئی اور انگلی سے اپنی دونوں آنکھیں باہر نکال لیں۔ اور خادم کو وہ دونوں آنکھیں دے کر کہا۔ "جا انہیں لے جا اور امیر سے کہہ دے کہ میری جو چیز تجھے عزیز تھی اسے تھام۔”

خادم نے جو یہ کیفیت بادشاہ پر ظاہر کی تو اس کے دل میں آگ لگ گئی اور اس کی سوزش سے دھواں بھر گیا۔ اپنے کرتوت پر شرمندہ ہو کر بیٹھ رہا اور اس حسینہ کا پاک دامن اپنے ہاتھ سے چھوڑ دیا۔

اے بیٹی تُو خسرو کی آنکھ کا نور ہے تو بھی اسی طرح اپنی عصمت پر صابر و مستقیم رہ۔‘‘

(امیر خسرو سے منسوب اس منظوم مکتوب کے مختلف اہلِ قلم نے تراجم کیے ہیں جن میں تفاوت ناگزیر ہے)

مؤرخین امیر خسرو کے بارے میں ہمیں جو کچھ بتانا چاہتے ہیں، مجھے تو وہ غیرمتعلق ہی سا معلوم ہوتا ہے۔

وہ 1253 میں پیدا ہوئے۔ وہ اپنے آپ کو ہندوستانی کہتے تھے اور اس پر فخر کرتے تھے۔ مؤرخین اس بات پر بہت زور دیتے ہیں کہ وہ ایسے ترک خاندان سے تھے جسے منگولوں نے گھر سے بے گھر کر دیا تھا۔ ان کے والد نے شاہی افسروں کی حیثیت سے خاصی کامیاب زندگی گزاری تھی، لیکن خسرو کا لڑکپن ہی تھا جب ان کے والد کا انتقال ہو گیا۔ ایک اور عزیز نے خسرو کی سرپرستی کی۔

خسرو جب بڑے ہو گئے تو اس زمانے کے عام رواج کے مطابق انہیں ایسے امراء کی تلاش ہوئی جو ان کے مربی بن سکیں۔ وہ نہیں چاہتے تھے کہ انہیں پڑھایا جائے۔ ان کے استادوں نے پہلے یہ کوشش کی کہ انہیں عام ڈھرے ہی کے مطابق تعلیم دی جائے اور پھر شعر گوئی سے جو انہیں غیرمعمولی طبعی مناسبت تھی اسے سنوارنے میں انہوں نے مدد کی۔ شاعر ہی کی حیثیت سے امراء اور پھر بادشاہوں کے درباروں میں ان کی آؤ بھگت ہوئی اور مؤرخ کے لیے یہ بہت دلچسپی کی بات ہے کہ خسرو نے اپنے مربیوں کی فتوحات کے تاریخی واقعات کو منظوم کر دیا ہے۔ یہ معاصرانہ ماخذ ہیں اور اسی لیے ان کی بڑی قدر و قیمت ہے۔

لیکن شعری کارناموں کی حیثیت سے یہ مغلق، پرتکلف اور بوجھل ہیں۔ میں تو یہ کہتا ہوں کہ انہیں پڑھنے میں مزہ نہیں آتا۔ لیکن معمولی واقعات کے بیچ بیچ میں جنہیں بڑھا چڑھا کر بیان کرنے میں خسرو نے اپنی مشاقی دکھائی ہے بہت ہی حسین غزلیں بکھری ہوئی ہیں۔ ان سے خسرو کو یقیناً اس تھکا دینے والے تکلف و تصنع سے نجات اور سکون مل جاتا ہوگا۔ ان کی وجہ سے ان کے دل کا بوجھ بھی ہلکا ہو جاتا ہوگا کیونکہ وقائع صرف گراں قدر انعامات حاصل کرنے کے لیے لکھے جاتے تھے اور ایک اعتبار سے یہ خسرو اور ان کے زمانے کی غلط نمائندگی کرتے ہیں۔ ان کے لکھنے میں خسرو کو اپنی طبیعت کے خلاف فاتحین کے سخت سیاسی مزاج کو قبول کرنا پڑتا تھا۔ لڑائیوں اور جنگجو سپاہیوں کو ایسے مذہبی اور تہذیبی رنگ میں پیش کرنا پڑتا تھا جوان میں ہوتا ہی نہیں تھا۔ معمولی معمولی آدمیوں اور چھوٹی چھوٹی باتوں کو خلاف قیاس مبالغے کے ساتھ بڑھا چڑھا کر بیان کرنا پڑتا تھا، صداقت اور انصاف کا خیال کیے بغیر طرف داری کرنی پڑتی تھی۔

اس سے انکار نہیں کیا جاسکتا کہ جن بادشاہوں، امرا اور افواج کو خسرو نے ان وقائع میں بڑھا چڑھا کر دکھایا ہے وہ زندگی، خوشی اور مال و املاک کو برباد کر سکتی تھیں اور مصیبت اور عذاب میں مبتلا کر سکتی تھیں۔ یہ ایسی باتیں نہیں تھیں جن سے خسرو کے دل پر کوئی اچھا اثر پڑتا یا یہ ان کے تخیل کو ابھارتیں۔ معلّم اخلاق اس کی توجیہ یوں کرے گا کہ ایسا ضرورت کے تحت ہوا، لالچ کی وجہ سے نہیں، مجبوری تھی جس نے خسرو کو امرا اور بادشاہوں کا قصیدہ خواں بنا دیا۔ حقیقت تو یہ ہے کہ خسرو اور ہی طبیعت کے آدمی تھے۔ ان کا تعلق کسی اور دربار سے اور کچھ اور ہی لوگوں سے تھا۔

تاریخ جو کچھ ہمیں بتاتی ہے وہ ان ترکوں کی سیاسی اور فوجی سرگرمیوں کے بارے میں ہے جنہوں نے ہندوستان میں اپنی حکومت قائم کی۔ مجھے تویقین نہیں آئے گا کہ اگر کوئی یہ کہے کہ ان خاندانوں کی تعداد بیس ہزار سے زیادہ تھی۔ ان تمام ترکوں میں سب کے سب پیشہ ور سپاہی نہیں تھے اور ان میں جو سپاہی پیشہ تھے بھی، انہیں ایسے مؤرخین سے زیادہ واضح طور پر یہ احساس ہو گیا ہو گا جو ہمیں یہ یقین دلاتے ہیں کہ وہ ایک وسیع ملک میں بہت ہی اقلیت میں تھے۔ میرا مقصد ان کے تصورات اور ان کی کامیابیوں کی اہمیت کم کرنا نہیں ہے۔ میں تو صرف اس بات پر زور دینا چاہتا ہوں کہ ان تصورات اور کامیابیوں کا ایک خاص سماجی پس منظر تھا اور ہمارے مؤرخین نے ابھی اس پر توجہ کرنے کی کوشش نہیں کی ہے۔ وہ یہ بھول جاتے ہیں کہ پورے کا پورا ملک سیاسی رقابتوں میں مبتلا نہیں تھا۔ وہ یہ بھول جاتے ہیں کہ پورے کے پورے ملک نے معرکہ آرائیوں میں حصہ نہیں لیا۔ ملک میں امن و امان تھا، خیر خواہی تھی، افہام و تفہیم اور سمجھوتے کی فضا تھی جسے قوی روحانی رجحانات سے مدد ملتی تھی۔

اس زمانے کے ہندوستان کے سماجی پس منظر میں شاید سب سے زیادہ اہم عنصر صوفیوں اور خصوصاً چشتیہ سلسلے کے صوفیوں کا اثر تھا۔ آج ہم ان کی سماجی قدر و قیمت یا اہمیت پر بحث کر سکتے ہیں کیونکہ ان کے سامنے انسان دوستی کی سرگرمیوں کا کوئی منصوبہ، کسی قسم کا کوئی پروگرام نہیں تھا، ان کے مقاصد واضح نہیں تھے۔ وہ تو بس کسی بھی جگہ تکیہ لگا لیتے، عبادت کرتے اور لوگوں سے باتیں کرتے، وہ روحانی وعظ و پند بیان کرتے اور کبھی کبھی ان لوگوں کو بالواسطہ عملی رشد و ہدایت دیتے جنہیں اس کی خواہش ہوتی، ان کے کوئی سیاسی تصورات یا مفادات نہیں تھے اور اگر علانیہ زیادتیاں ہوتیں تو وہ دلوں کے بدلنے کی دعائیں کرتے۔

آج ہمیں یہ بے عملی معلوم ہوتی ہے اور ہم اس کی اثرانگیزی محسوس نہیں کر سکتے۔ صوفی کو ’شاہ‘ یا ’بادشاہ‘ کے نام سے یاد کیا جانے لگا تھا۔ اس کی گدی شاہی تخت کے برابر سمجھی جاتی اور جب لوگ ان سے ملنے آتے تو شاہی دربار کے آداب ہی برتے جاتے۔ بادشاہ ہزار بے گناہ آدمیوں کو مروا سکتا تھا، اس بات کو قسمت کی خرابی پر محمول کیا جاسکتا تھا لیکن اگر وہ کسی صوفی کے خلاف کوئی قدم اٹھاتا تو اس کا تخت ہی خطرے میں پڑ جاتا تھا۔

امیر خسرو دلّی کے عظیم صوفی حضرت نظام الدین اولیاء کے حلقہ خاص میں شامل تھے اور ایک مرتبہ کسی پر ان کا اثر ہو جانے کا مطلب یہ تھا کہ اب اس پر طاقتور سے طاقتور بادشاہ کا بھی اثر نہیں ہو سکتا۔ اس غیر معمولی اور دیرپا اثر کا نتیجہ ہوتا تھا ہمدردی اور رواداری کے جذبات کی پرورش اور ان تمام عقائد کا احترام جنہیں لوگ سچے دل سے مانتے ہیں اور ثابت قدمی کے ساتھ ان پر عمل کرتے ہیں۔ حضرت نظام الدین اولیاء کی مثال سے امیر خسرو کے سامنے اپنی ذہنی اور فنکارانہ صلاحیتوں کو کام میں لانے کا ایک وسیع میدان کھل گیا۔ ان کے لیے کچھ بھی اجنبی، غیرخالی ازعلت یا ایسا نہ رہا جس سے دلچسپی نہ لی جائے۔ معلوم ہوتا ہے کہ گاؤں تک میں بھی ان کا جی لگتا تھا اور یہ دیکھنے اور سمجھنے میں بھی کہ عورتیں اور مرد کس طرح زندگی بسر کرتے تھے، ان کے احساسات کیا تھے اور ان کے رویے کیسے تھے۔

معلوم ہوتا ہے کہ انہوں نے کئی زبانوں کا مطالعہ کیا تھا اور اب بھی بیسیوں ایسے شعر مل جاتے ہیں جن میں انہوں نے الفاظ کو بڑے دل فریب انداز میں تفریحاً استعمال کیا ہے۔ ان کے پیر و مرشد نے ان کی دنیاداری کو معاف کر دیا تھا۔ افکار وعقائد کے بارے میں خسرو جو بے تکلفی برت لیتے تھے، اس پر اور ان کی شاعری پر چاہے اس میں عشق وعاشقی ہی راہ پاگئی ہو، وہ مسکرا دیتے تھے۔ خسرو کی غزلوں میں ان کے مرشد کی شخصیت ہر جگہ اور ہر شکل میں جھلکتی ہے۔ ایک خود دار ہیرو کی شکل میں بھی، ایک ایسی حسین عورت کی شکل میں بھی جس کے حسن کی تعریف نہیں کی جا سکتی۔ میخانہ کے پیرمغاں کی حیثیت سے بھی، انتہائی حسین اور ظالمانہ حد تک بے نیاز ترک کی حیثیت سے بھی جو شراب روحانی سے سرشار کر رہا ہو اور ان کے مرشد ان باتوں کا برا نہیں مانتے تھے۔

ان کو تو حقیقت میں خوشی ہوتی ہوگی اس وقت جب خسرو مروجہ ادبی زبان و بیان کو چھوڑ کر ایک ایسی زبان میں شعر کہتے ہوں گے جسے وہ ’ہندی‘ کے نام سے موسوم کرتے ہیں۔ صوفیاء بول چال کی زبان کو اپنانے اور سنوارنے میں یقین رکھتے تھے اور عوامی بولی کو اعلٰی روحانی خیالات کے اظہار کا ذریعہ بنانے میں انہوں نے ہی پہل کی تھی۔ لوک شاعری کے اثر سے خسرو نے عورت کو عاشق کے روپ میں پیش کیا اور اس زمانے کی شاعری کے جو نمونے ہم تک پہنچے ہیں ان میں سے کوئی بھی اس سے زیادہ پرلطف نہیں ہے جتنی امیر خسرو کی وہ غزلیں جن میں فارسی اور ہندی دونوں ملی جلی ہیں۔ لیکن تعداد کی بنیاد پر ہی فیصلہ کیا جائے تو ہندوستانی انداز میں عشق کا یہ اظہار ادبی تفریح ہی معلوم ہوتا ہے۔

امیر خسرو کا وہ کلام جس کی وجہ سے ان کا نام اب تک مشہور ہے، وہ غزلیں ہیں جو انہوں نے ایسی محفلوں میں گائی جانے کے لیے لکھیں جن میں موسیقی اور شاعری سے مذہبی جوش اور روحانی وجدان کو تقویت ملتی تھی۔ ان میں سے بہت سی غزلوں میں ایسے عقائد کا اظہار ہے جو مسلمانوں کے مروجہ انداز نظر کے اعتبار سے بدعتی ہیں لیکن اس بدعت کے پیچھے دراصل انسانیت کی صوفیانہ روایت تھی، مذہب کی ایسی تعبیر کی روایت تھی جس سے مذہب کو ماننے والے کی مذہبیت تو بڑھتی رہے لیکن اس کے ساتھ ساتھ وہ اسے رسمیات کے بندھنوں سے آزاد بھی کر دے۔ اس سے مسلمان شاعر کو مکمل آزادی مل جاتی تھی اور ایک خاص قسم کا روحانی مرتبہ بھی۔ اس سے بے تکلفی اور احترام کا، حسن اور غم کا، شاعرانہ جرأت اور روحانیت کا وہ امتزاج پیدا ہو گیا جو مسلم تہذیب کی ایک نمایاں خصوصیت ہے۔ خسرو کی غیرمعمولی تخلیقی قوت میں مسلم تہذیب کے یہ وصف غالباً سب سے زیادہ نمایاں ہے۔ خسرو کی شخصیت ایک افسانہ سی بن گئی ہے۔ ان کے معاصرین انہیں طوطی ہند کہتے تھے اور سمجھتے تھے کہ ان کا فارسی کلام ایران کی بہترین شاعری کے ہم پلہ ہے۔

ہندوستانی موسیقی میں انہیں مہارت حاصل تھی اور وہ خاص خاص راگ راگنیوں کے موجد تھے۔ کہا جاتا ہے کہ دیہات کی عورتوں سے وہ شوخی کر لیتے تھے، انہیں اپنی پہیلیوں اور لطیفوں سے خوش کر دیتے تھے اور حیران پریشان بھی۔ اپنی بات میں فارسی اور ہندی کو اس طرح ملا دیتے تھے کہ لوگ اس پر ہنستے بھی تھے اور یہ بھی محسوس کرنے لگتے تھے کہ وہ سب ایک ہی ہیں۔ دلہن کی بدائی یا رخصتی کے وقت جو گیت گایا جاتا ہے اور جو بالکل ہندوستانی رسم ہے، کہا جاتا ہے یہ ان ہی کا لکھا ہواہے۔ ہندی اور فارسی الفاظ اور فقروں کی ایک فرہنگ جو عالمانہ تفریح کا ایک شاہکار ہے، ان ہی کے زور قلم کا نتیجہ بتائی جاتی ہے۔

کوئی ہنسنا چاہے یا عشق ومحبت کرنا، زبان و لسان کا مطالعہ کرنا چاہے یا لوک ادب کا، مقصد گانا ہو یا روحانی کیف وانبساط تو اس کے لیے خسرو کی مثال بطور نقشِ اوّل موجود ہے۔ ان کی وجہ سے روایت ایک دم بھرپور، ہمہ گیر اور نہایت نفیس ہو گئی۔ کئی صدیوں سے انہیں ہندو مسلم تہذیب کا خالق سمجھا جاتا رہا ہے اور اب بھی ہمیں خسرو کو ان باتوں کا سرچشمہ تسلیم کرنا پڑتا ہے جنہیں ہم دل سے چاہتے ہیں۔

بچّو! تم حضرت امیر خسروؒ کو خوب جانتے ہو، اُنھیں اپنے ملک ہندوستان سے بے پناہ محبّت تھی، یہاں کی ہر چیز کو پسند کرتے تھے۔

ایک بار ایسا ہوا کہ امیر خسرو گھوڑے پر سوار کہیں سے آ رہے تھے۔ مہر ولی پہنچتے ہی اُنھیں پیاس لگی، آہستہ آہستہ پیاس کی شدّت بڑھتی چلی گئی۔ اُنھوں نے اپنے پانی والے چمڑے کا بیگ کھولا اس میں ایک قطرہ بھی پانی نہ تھا۔ وہ خود اپنے سفر میں سارا پانی پی چکے تھے۔ مئی جون کے مہینوں میں تم جانتے ہی ہو دلّی میں کس شدّت کی گرمی پڑتی ہے۔

گرمی بڑھی ہوئی تھی، دھوپ تیز تھی، کچھ دور سے اُنھوں نے دیکھا آم کا ایک گھنا باغ ہے۔ اس کے پاس ہی ایک کنواں ہے، نزدیک آئے تو دیکھا وہاں چند بچّے آم کے ایک پیڑ کے نیچے بیٹھے رسیلے آم چوس رہے ہیں اور مٹکے سے پانی نکال نکال کر پی رہے ہیں۔ پانی کا مٹکا دیکھ کر حضرت امیر خسروؒ کی پیاس اور بڑھ گئی۔

یوں تو وہ آم کے دیوانے تھے۔ پھلوں میں سب سے زیادہ آم ہی کو پسند کرتے تھے، لیکن اس وقت آم کا زیادہ خیال نہیں آیا، بس وہ پانی پینا چاہتے تھے۔ گھوڑے پر سوار، آہستہ آہستہ وہ اُن بچّوں کے پاس آئے جو آم چوس رہے تھے اور مٹکے سے پانی پی رہے تھے۔ بچّوں نے اُنھیں فوراً پہچان لیا۔ خوشی سے چیخنے لگے، ’’خسرو بابا خسرو بابا۔’’

امیر خسرو اُنھیں اس طرح خوشی سے اُچھلتے دیکھ کر بہت خوش ہوئے۔ گھوڑے سے اُترے اور بچّوں کے پاس آ گئے۔ بچّوں نے اُنھیں گھیر لیا۔

’’خسرو بابا خسرو بابا کوئی پہیلی سنائیے۔’’

’’ہاں ہاں کوئی پہیلی سنائیے۔’’ بچوّں کی آوازیں اِدھر اُدھر سے آنے لگیں۔

’’نہیں بابا، آج پہیلی وہیلی کچھ بھی نہیں، مجھے پیاس لگ رہی ہے، میری کٹوری میں پانی بھر دو تاکہ میری پیاس بجھے۔ اور میرے گھوڑے کو بھی پانی پلا دو۔’’

امیر خسرو نے اپنی پیالی بچوّں کی طرف بڑھائی ہی تھی کہ ایک بچّے نے کٹوری اُچک لی اور بھاگ کر مٹکے سے پانی لے آیا۔ حضرت کی پیاس بجھی لیکن پوری نہیں بجھی۔ بولے ’’اور لاؤ پانی ایک کٹوری اور۔’’ بچّے نے کٹوری لیتے ہوئے کہا ’’پہلے آپ ایک آم کھالیں، اِس سے پیاس بھی کم ہو جائے گی۔ یہ لیجیے، یہ آم کھائیے، میں ابھی پانی لاتا ہوں۔’’

حضرت امیر خسرو نے مسکراتے ہوئے بچّے کا تحفہ قبول کر لیا اور بچّہ ایک بار پھر دوڑ کر پانی لے آیا۔ حضرت نے پانی پی کر سب بچوّں کو دُعائیں دیں۔ بچّوں نے گھوڑے کو بھی خوب پانی پلایا۔

’’خسرو بابا، اس سے کام نہیں چلے گا آپ کو آج ہمیں کچھ نہ کچھ سنانا ہی پڑے گا ورنہ ہم آپ کو جانے نہ دیں گے۔‘‘ ایک بچّے نے مچل کر کہا۔

’’تو پھر ایسا کرو بچّو، تم لوگ مجھ سے سوال کرو، میں تمھیں جواب دوں گا۔‘‘

حضرت امیر خسروؒ نے بچّوں کے سامنے ایک تجویز رکھی۔ بچّے فوراً راضی ہو گئے۔

’’تو پھر کرو سوال۔‘‘ حضرت امیر خسروؒ نے فرمایا۔ ایک بچّی نے سوچتے ہوئے پوچھا: ’’خسرو بابا، خسرو بابا، آپ کو کون سا پھول سب سے زیادہ پسند ہے؟‘‘

حضرت امیر خسرو نے جواب دیا۔ ’’یوں تو ہندوستان کے تمام پھول خوب صورت ہیں، سب کی خوشبو بہت اچھّی اور بھلی ہے، لیکن تمام پھولوں میں مجھے چمپا سب سے زیادہ پسند ہے۔ میں اسے پھولوں کا سرتاج کہتا ہوں۔‘‘

’’چمپا تو مجھے بھی بہت پسند ہے، اس کی خوش بُو بہت ا چھّی لگتی ہے‘‘ ایک بچّی نے کہا۔

’’خوب! دیکھو نا ہندوستان میں کتنے پھول ہیں، کوئی گِن نہیں سکتا اُنھیں۔ اس ملک میں سوسن، سمن، کبود، گلِ زرّیں، گلِ سرخ، مولسری، گلاب، ڈھاک، چمپا، جوہی، کیوڑا، سیوتی، کرنا، نیلوفر۔ پھر بنفشہ، ریحان، گلِ سفید، بیلا، گلِ لالہ اور جانے کتنے پھول ہیں۔ اپنے مولوی استاد سے کہنا، وہ تمھیں ہر پھول کے بارے میں کچھ نہ کچھ بتا دیں گے۔ مجھے چمپا سب سے زیادہ پسند ہے، یوں چنبیلی بھی مجھے بہت پسند ہے۔‘‘

ایک دوسرے بچّے نے سوال کیا، ’’خسرو بابا، اور پھلوں میں آپ کو سب سے زیادہ کون سا پھل پسند ہے؟‘‘

’’آم۔‘‘ حضرت نے فوراً جواب دیا۔

سارے بچّے کھلکھلا کر ہنس پڑے۔ ’’خسرو بابا، آم ہم سب کو بھی سب سے زیادہ پسند ہے۔ دیکھیے نا ہم کتنی دیر سے بس آم کھائے جا رہے ہیں، آپ بھی کھائیے نا، ہاتھ پر لے کر کیا بیٹھے ہیں؟‘‘ اُس بچیّ نے کہا۔

’’میں اس آم کو تحفے کے طور پر لے جاؤں گا، اپنے بچّوں کا تحفہ ہے نا، گھر پہنچ کر اسے دھو کر اطمینان سے بیٹھ کر کھاؤں گا۔‘‘ حضرت امیر خسرو نے جواب دیا۔

’’اس کے بعد کون سا پھل آپ پسند کرتے ہیں؟‘‘ ایک دوسرے بچّے نے پوچھا۔‘‘

’’آم کے بعد کیلا۔ کیلا بھی مجھے پسند ہے۔’’حضرت نے جواب دیا۔

’’اور خسرو بابا، پرندوں میں کون سا پرندہ آپ کو زیادہ پسند ہے؟‘‘ ایک تیسرے بچّی نے سوال کیا۔

’’پرندوں میں مجھے طوطا بہت ہی پسند ہے، اس لیے کہ طوطے اکثر انسان کی طرح بول لیتے ہیں۔ یوں مجھے مور، مینا، گوریّا بھی پسند ہیں۔ اب آپ لوگ پوچھیں گے، جانوروں میں مجھے کون سا جانور پسند ہے؟ حضرت نے کہا۔

’’میں تو ابھی پوچھنے ہی والا تھا۔‘‘ ایک بچّے نے کہا۔

’’تو سن لو مجھے ہاتھی، بندر اور بکری پسند ہیں۔‘‘ حضرت نے جواب دیا، پھر خود ہی پوچھ لیا۔

’’جانتے ہو بکری مجھے کیوں پسند ہے؟ اور مور کیوں پسند کرتا ہوں؟‘‘

کیوں؟‘‘ کئی بچّے ایک ساتھ بول پڑے۔’’

’’مور اس لیے کہ وہ دُلہن کی طرح سجا سجایا نظر آتا ہے اور بکری اس لیے کہ وہ ایک پتلی سی لکڑی پر چاروں پاؤں رکھ کر کھڑی ہو جاتی ہے۔‘‘ بچّے کھلکھلا پڑے۔

ا چھا بچّو، اب میں چلتا ہوں۔ پانی پلانے کا شکریہ اور اس آم کا بھی شکریہ، میرے گھوڑے کو پانی پلایا اس کا بھی شکریہ۔’’

حضرت امیر خسرو چلنے کو تیّار ہو گئے تو ایک چھوٹے بچّے نے روتے ہوئے کہا۔’’آپ سے دوستی نہیں کروں گا۔’’

بھلا کیوں بابا، آپ ناراض کیوں ہو گئے؟‘‘ حضرت امیر خسرو نے پوچھا۔’’

آپ نے کوئی گانا نہیں سنایا۔ وہی گانا سنائیے نا جو آپ حضرت نظام الدین اولیا کے پاس کل صبح گا رہے تھے۔’’

لیکن تم کہاں تھے وہاں؟’’ حضرت نے حیرت سے دریافت کیا۔

’’میں وہیں چھپ کر سن رہا تھا۔‘‘ پھر رونے لگا وہ بچّہ۔

’’ارے بابا روؤ نہیں، آنسو پونچھو۔ میں تمھیں وہی گانا سناؤں گا۔‘‘ حضرت نے اسے منا لیا اور لگے لہک لہک کر گانے لگے۔

چھاپ تلک سب چھینی رے موسے نیناں ملاے کے

حضرت امیر خسروؒ دیکھ رہے تھے کہ گانا سنتے ہوئے بچّے جھوم رہے ہیں۔ گانا ختم ہوتے ہی بچے چُپ ہو گئے اور پھر اچانک ہنسنے لگے، حضرت بچوّں کو پیار کرنے کے بعد اپنے گھوڑے پر سوار ہوئے اور اپنے گھر کی جانب روانہ ہو گئے۔ آم کے پیڑوں کے نیچے وہ بچّے جھوم جھوم کر گا رہے تھے:

چھاپ تلک سب چھینی رے موسے نیناں ملائے کے

(شکیل الرّحمٰن کئی کتابوں کے مصنّف اردو میں جمالیاتی تنقید نگاری کے لیے پہچانے جاتے ہیں، ان کا تعلق ہندوستان سے تھا، انھوں نے بچّوں کے لیے بھی ادب تخلیق کیا)