ڈی آئی خان : پاکستان تحریک انصاف کے مرکزی رہنما اور سابق وزیر علی امین گنڈا پور کے پرسنل سیکریٹری لطیف نیازی نے پی ٹی آئی چھوڑنے کا اعلان کردیا۔
ڈیرہ اسماعیل خان میں پریس کانفرنس سے خطاب کرتے ہوئے لطیف نیازی نے کہا کہ علی امین گنڈاپور سے اعلان لاتعلقی اور 9مئی کے واقعات کی بھر پور مذمت کرتا ہوں۔
انہوں نے کہا کہ علی امین گنڈا پور کی کوئی بے نامی جائیداد میرے نام پر نہیں ہے، ہم اداروں کے ساتھ کھڑے ہیں اور ان سے ہر ممکن تعاون بھی کرینگے۔
لطیف نیازی کا کہنا تھا کہ میرا پورا خاندان پاکستان اور ریاستی اداروں کے ساتھ کھڑا ہے، میں افغانی نہیں پاکستانی شہری ہوں۔
انہوں نے مزید کہا کہ مشورے کے بعد دوسری پارٹی میں شمولیت اختیار کروں گا، 9مئی کے بعد سے میرا علی امین گنڈاپور سے کوئی رابطہ نہیں ہے۔
پی ٹی آئی رہنماؤں کی جائیداد ضبط کرنے کا حکم
علاوہ ازیں فیصل آباد کی انسداد دہشت گردی کی عدالت نے نو مئی کے مقدمات میں ملوث تحریک انصاف کے چار مفرور رہنماؤں کی جائیدادیں ضبط کرنے کا حکم دے دیا۔
انسداد دہشت گردی عدالت کے جج محمد حسین نے مقدمے کی سماعت کی، عدالت نے چاروں نامزد پی ٹی آئی رہنماؤں کو اشتہاری بھی قرار دیا ہے۔
عدالت نے حکم جاری کیا کہ صدر ویسٹ پنجاب فیض اللہ کموکا اور بھائی کلیم کی جائیداد ضبط کی جائے، ٹکٹ ہولڈر اسد معظم اور سابق ایم پی اے حبقوق گل کی جائیداد بھی ضبط کرکے اس کی رپورٹ آئندہ سماعت پر پیش کی جائے۔
