اسلام آباد : 8 فروری کو ہونے والے انتخابات کالعدم قرار دینے کی درخواست پر سماعت آج ہوگی،چیف جسٹس کی سربراہی میں3 رکنی بینچ کیس کی سماعت کرے گا۔
تفصیلات کے مطابق سپریم کورٹ میں 8 فروری کے انتخابات کو کالعدم قرار دینے کی درخواست کی سماعت آج ہوگی۔
چیف جسٹس قاضی فائزعیسی کی سربراہی میں تین رکنی بینچ کیس کی سماعت کرے گا، جسٹس محمد علی مظہر اور جسٹس مسرت ہلالی بنچ کا حصہ ہوں گی۔
درخواست علی خان نامی شہری کی جانب سے دائرکی گئی تھی، جس میں استدعا کی گئی تھی کہ عدلیہ کی زیر نگرانی 30 روز میں نئے انتخابات کرانے کا حکم دیا جائے اور دھاندلی ،الیکشن فراڈکی تحقیقات ،ذمہ داروں کیخلاف کارروائی کے احکامات دئیے جائیں۔
درخواست میں وفاقی حکومت اور الیکشن کمیشن کو فریق بنایا گیا ہے۔
