کراچی : نگراں وفاقی وزیراطلاعات مرتضیٰ سولنگی کا کہنا ہے کہ الیکشن کمیشن نے جنوری میں انتخابات کا اعلان کیا ہے حتمی تاریخ کا اعلان بھی جلد کیا جائے گا۔
تفصیلات کے مطابق نگران وفاقی وزیراطلاعات مرتضیٰ سولنگی نے کراچی پریس کلب میں خطاب کرتے ہوئے کہا کہ آزادی صحافت پر یقین رکھتےہیں، کراچی پریس کلب میراپرانا گھرہے، صحافیوں کےمسائل کےحل کیلئےجو ممکن ہوا کریں گے۔
مرتضیٰ سولنگی کا کہنا تھا کہ کچھ لوگ ملک میں الجھنے پیدا کررہےہیں، الیکشن کمیشن نےجنوری میں انتخابات کااعلان کیا ہے، امید ہےانتخابات کی حتمی تاریخ کا اعلان بھی جلدکیا جائے گا۔
نگران وفاقی وزیراطلاعات نے کہا کہ کچھ لوگوں کاکاروبار ہے الجھنے پھیلاناہے لیکن میری اور نگران حکومت کے ذہن میں کوئی الجھن نہیں، منتخب نمائندے ہی ملک کو چلائیں گے۔
ان کا کہنا تھا کہ عام انتخابات کےانعقادکیلئےاپنا بھرپورکرداراداکریں گے اور اپنے اختیارات کے مطابق ہرممکن اقدامات کریں گے۔
نواز شریف کے حوالے سے مرتضیٰ سولنگی نے کہا کہ نوازشریف جب گئے تھے تو جیل کی دیواریں توڑکرنہیں گئےتھے، وہ اس وقت کی حکومت اور عدالت کی اجازت سے گئے تھے، ان کی وطن واپسی پرسب کچھ آئین اور قانون کے مطابق ہوگا۔
