Tag: انتخابات کی خبریں، الیکشن کی خبریں،

اسلام آباد: تحریک انصاف کے سینئر رہنما جہانگیر ترین نے کہا ہے کہ عمران خان کو وزیراعظم بنا کر گھر چلا جاؤں گا، نظر ثانی اپیل دائر کروں گا اگر فیصلہ حق میں آیا تو بہتر ورنہ گھر ہی بیٹھوں گا۔

تفصیلات کے مطابق عمران خان کی رہائش گاہ بنی گالہ کے باہر میڈیا سے گفتگو کرتے ہوئے جہانگیر ترین کا کہنا تھا کہ ’پنجاب میں ہمارے 131 اراکین اسمبلی ہوچکے آج رات تک مزید ایم پی ایز بھی شامل ہوجائیں گے‘۔

پی ٹی آئی کے رہنما نے بڑااعلان کرتے ہوئے کہا کہ ’ نااہلی کے فیصلے پر میرے پاس اپیل کا حق موجود ہے، عدالت میں درخواست دائر کروں گا اگر حق میں فیصلہ آیا تو بہتر ورنہ گھر بیٹھوں گا‘۔

مزید پڑھیں: عمران خان کو ڈی چوک پر حلف اٹھانے کا مشورہ

دوسری جانب وفاق اور پنجاب میں حکومت بنانے کے لیے آزاد امیدوار تحریک انصاف میں شمولیت کا اعلان کررہے ہیں، کچھ دیر قبل ملتان سے کامیاب ہونے والے آزاد امیدوار شیخ سلمان نعیم نے جہانگیر ترین اور علیم خان سے ملاقات کر کے عمران خان کی حمایت کا اعلان کیا۔

واضح رہے کہ الیکشن 2018 میں عمران خان ملک کی بڑی سیاسی جماعتوں کو بڑی شکست دے کر وفاق میں حکومت سازی کی پوزیشن میں آگئے ہیں جس کے لیے تیاریاں عروج پر ہیں۔

کابینہ میں کن لوگوں کو شامل نہیں کیا جائے گا؟

علاوہ ازیں تحریک انصاف کے ذرائع کا کہنا ہے کہ عمران خان نے نیب زدہ منتخب امیدواروں کو کابینہ میں شامل نہ کرنے کا فیصلہ کیا ہے، جب تک مذکورہ ممبران کے خلاف تحقیقات ہیں وہ کسی وزارت یا مرکزی و صوبائی کابینہ کا حصہ نہیں بن سکیں گے۔

یہ بھی پڑھیں: افغان صدر کا عمران خان کو ٹیلی فون، انتخابات میں کامیابی پر مبارک باد

اس ضمن میں عمران خان نے منتخب ممبران کی نیب میں جاری کیسز کی تفصیلات بھی طلب کرلیں جبکہ پارٹی ذرائع نے اس بات کی تصدیق بھی کی ہے کہ کابینہ کی تشکیل میں تاخیر کی اہم وجہ امیدواروں کی چھان بین ہے۔

خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

ریاض: عام انتخابات 2018 میں عمران خان اور تحریک انصاف کی کامیابی کے بعد پی ٹی آئی کارکن نے حرم شریف میں زائرین کو مٹھائی تقسیم کی۔

تفصیلات کے مطابق عام انتخابات میں تحریک انصاف کی واضح برتری اور عمران خان کے ممکنہ وزیراعظم بننے کے بعد دنیا بھر میں بسنے والے پی ٹی آئی کارکنان نے اپنے اپنے طور پر جشن منایا۔

سمندر پار پاکستانیوں نے عام انتخابات میں آنے والی تبدیلی پر مسرت کا اظہار کیا، اس ضمن میں تحریک انصاف کے آسٹریلیا، برطانیہ، امریکا اور جرمنی سمیت دیگر علاقوں میں بسنے والے کارکنان نے ریلیاں بھی نکالیں جس میں کپتان کے حق میں نعرے لگائے گئے۔

مزید پڑھیں: عمران خان جسے چاہیں گے وہی وزیرِ اعلیٰ پنجاب بنے گا، علیم خان

سماجی رابطے کی ویب سائٹ پر ایک ویڈیو شیئر کی گئی جس میں دیکھا جاسکتا ہے کہ حرم کعبہ کے صحن میں ایک شخص زائرین کو مٹھائی تقسیم کررہا ہے۔

ویڈیو شیئر کرنے والے نے دعویٰ کیا ہے کہ مذکورہ شخص پاکستانی اور عمران خان کا ہمدرد ہے جس نے عام انتخابات میں کپتان کی کامیابی اور تحریک انصاف کی واضح اکثریت کا سُن کر زائرین میں مٹھائی تقسیم کر کے خوشی کا جشن منایا۔

A PTI fan celebrating victory of Imran Khan in Haram Shareef by distributing Sweets 🙂 pic.twitter.com/aXyFGdf0Mz

— Arnold Shalwar Nikkar 🇵🇰 (@DaPakiGuy) July 28, 2018

واضح رہے کہ 25 جولائی کو ملک بھر میں عام انتخابات کا انعقاد کیا گیا تھا جس میں تحریک انصاف نے قومی اسمبلی کی 272 نشستوں میں سے 115 سیٹوں پر واضح اکثریت حاصل کی علاوہ ازیں چاروں صوبوں کی صوبائی نشستوں پر بھی پی ٹی آئی نے واضح اکثریت حاصل کی۔

خبر کے بارے میں اپنی رائے کا اظہار کمنٹس میں کریں‘ مذکورہ معلومات  کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

اسلام آباد: پاکستان تحریک انصاف کی منحرف رہنما اور عمران خان پر مبینہ الزامات لگانے والی عائشہ گلالئی کا سیاسی کیریئر شروع ہوتے ہی ختم ہوگیا۔

تفصیلات کے مطابق پی ٹی آئی سے باغی ہوکر اپنی علیحدہ جماعت تحریک انصاف گلالئی بنانے والی خاتون رہنما نے الیکشن 2018 سے قبل اپنی کامیابی کے بلند و بانگ دعویٰ کیے تاہم انتخابی میدان میں وہ بری طرح سے ناکام ہوگئیں۔

عائشہ گلالئی نے قومی اسمبلی کے چار حلقوں سے الیکشن لڑا، انہوں نے این اے 53 سے عمران خان کے خلاف انتخاب لڑا جس میں وہ صرف 138 ووٹ حاصل کرسکیں علاوہ ازیں منحرف رہنما پرویز خٹک کے خلاف این اے 25 اور سید ایاز علی شاہ کے مدمقابل این اے 231 کھڑی ہوئیں جہاں وہ بالترتیب 959 اور 827 ووٹ حاصل کرسکیں اس کے علاوہ لودھراں سے بھی انہیں صرف 614 ووٹ ملے۔

مزید پڑھیں: پاکستان کے لیڈر غریبوں کے ہمدرد ہوتے تواپنی آدھی جائیداد غریبوں کے نام کر دیتے، عائشہ گلالئی

عمران خان پر بے بنیاد الزامات لگانے والی عائشہ گلالئی کی چاروں حلقوں سے ضمانت ضبط ہوئی اس کے علاوہ اُن کی جماعت سیاسی میدان کے پہلے ہی معرکے میں بری طرح سے ناکام ہوگئی۔

واضح رہے کہ پیپلزپارٹی پارلیمنٹیرین، پرویز مشرف کی آل پاکستان مسلم لیگ اور پاکستان تحریک انصاف کا حصہ رہنے والی عائشہ گلالئی نے فروری 2018 میں اپنی علیحدہ سیاسی جماعت پاکستان تحریک انصاف گلالئی بنانے کا اعلان کیا تھا۔

خیال رہے کہ عائشہ گلالئی نے مسلم لیگ ن کی سابق حکومت اور قیادت پر سنگین الزامات عائد کرتے ہوئے کہا تھا کہ لیگی قیادت نے فوج مخالف بیان دینے کی شرط پر سینیٹ کے ٹکٹ کی پیشکش کی تھی۔

یہ بھی پڑھیں: نواز شریف مکار اور عمران خان سے زیادہ خطرناک ہیں، عائشہ گلالئی

تحریک انصاف کی منحرف رہنماء اس سے قبل بھی مسلم لیگ (ن) کے متعدد سینئر رہنماؤں کے خلاف بیان دے چکی ہیں جن کی زد میں سابق ناااہل وزیر اعظم نواز شریف بھی آچکے ہیں۔

واضح رہے کہ عائشہ گلا لئی تحریک انصاف کے ٹکٹ پر ممبر اسمبلی منتخب ہوئی تھیں اور اس سے قبل وہ عمران خان پر نامناسب پیغامات بھیجنے کا الزام بھی لگا چکی ہیں تاہم کئی ماہ گزر جانے کے باوجود انہوں نے اس حوالے کوئی ثبوت یا شواہد پیش نہیں کئے۔

خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

کراچی: ایم کیو ایم پاکستان کے امیدوار اور تحریک انصاف کے چیئرمین عمران خان کے حریف علی رضا عابدی نے کہا ہے کہ میرے 864 پولنگ ایجنٹس نے پوچھا مجھے کیوں نکالا؟ مغرب کے بعد سے فجر تک صورتحال تبدیل ہوئی۔

اے آر وائی کی خصوصی الیکشن ٹرانسمیشن میں گفتگو کرتے ہوئے علی رضا عابدی کا کہنا تھا کہ کراچی میں تحریک انصاف کی کامیابی پر سب کو حیرت ہوئی۔

ایم کیو ایم کے امیدوار کا کہنا تھا کہ آرٹی ایس سسٹم آراو اور الیکشن کمیشن میں رابطے کے لیے تھا، پولنگ ایجنٹس کو اسٹیشنز سے نکال دیا گیا، یہ شکایت صرف میری نہیں بلکہ دیگر جماعتوں کے امیدوران نے بھی کی۔

علی رضا عابدی کا کہنا تھا کہ الیکشن کمیشن کی جانب سے سادے پرچے پرنتیجہ لکھ کردےدیا گیا اور کہا گیا کہ فارم بعدمیں ملےگا، صرف ایک جماعت ایجنٹس کو اندر بیٹھنے کی اجازت دی گئی۔

ووٹر کی تقسیم کے حوالے سے متحدہ پاکستان امیدوار کا کہنا تھا کہ اگر ایم کیو ایم کا ووٹر تقسیم تھا تو پاک سرزمین پارٹی کو ووٹ بھی ملنا چاہیے تھا مگر ایسا دیکھنے میں نہیں آیا، الیکشن کمیشن میں ممکنہ دھاندلی اور نتائج تبدیل کرنے کے خلاف درخواست دائر کردی۔

خیال رہے کہ علی رضا عابدی قومی اسمبلی کے حلقے این اے 243 سے تحریک انصاف کے مدمقابل تھے جنہیں عمران خان نے بڑے ووٹوں کے شکست دی۔

واضح رہے کہ ایم کیو ایم سمیت دیگر جماعتوں نے الزام عائد کیا ہے کہ اُن کے پولنگ ایجنٹس کو اسٹیشنز سے باہر نکال کر نتائج تبدیل کیے گئے جبکہ الیکشن کمیشن کے ترجمان نے الزامات کو مسترد کردیا۔

خبر کے بارے میں اپنی رائے کا اظہار کمنٹس میں کریں‘ مذکورہ معلومات  کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

کراچی: پیپلزپارٹی کے ترجمان اور رہنما مولا بخش چانڈیو نے تحریک انصاف سمیت تمام سیاسی جماعتوں سے بات چیت کا اشارہ دے دیا۔

اے آر وائی نیوز سے گفتگو کرتے ہوئے مولا بخش چانڈیو کا کہنا تھا کہ ہماری دشمنی کسی بھی جماعت سےنہیں، پاکستان کو بحران سے نکالنے کے لیے سب کے ساتھ بات اور کام کرنے کو تیار ہیں۔

اُن کا کہنا تھا کہ مسلم لیگ ن کو ضرورت ہوگی تو وہ ہم سے خود بات کرلے گی، الیکشن نتائج اور دھاندلی سے متعلق اسلام آباد میں ہونے والی آل پارٹیز کانفرنس میں شرکت سے متعلق بات کرنا میرے اختیار کی بات نہیں ہے۔

مولا بخش چانڈیو کا مزید کہنا تھا کہ چاہے کچھ بھی ہوجائے پیپلزپارٹی کسی کا کاندھا نہیں بنے گی، ملک میں استحکام کی خاطر آج بھی سب کے لیے دروازے کھولے ہوئے ہیں۔

خیال رہے کہ ملک بھر میں عام انتخابات کے نتائج آنے کا سلسلہ جاری ہے، قومی اسمبلی کے 272 حلقوں میں سے تحریک انصاف کو واضح اکثریت حاصل ہے جبکہ مسلم لیگ ن دوسرے اور پیپلزپارٹی تیسرے نمبر پر ہے۔

یاد رہے کہ انتخابی مہم کے دوران عمران خان دو ٹوک مؤقف اختیار کرچکے ہیں کہ کسی بھی کرپٹ جماعت سے کوئی الحاق نہیں ہوگی اور اگر مخلوط حکومت بنانے کی صورتحال ہوئی تو تحریک انصاف اپوزیشن بینچوں پر بیٹھے گی۔

خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک’پہنچانے کے لیے سوشل میڈیا پر شیئر کریں۔